༢༠༡༡ ཟླ་ ༩ ཚེས་ ༡༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༡༠ ནས་ ༡༥ བཅས་ཉི་གྲངས་ལྔའི་རིང་ལྡི་ལིར་རྟེན་གཞི་བྱས་པའི་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གིས་གོ་སྒྲིག་འོག་བཙན་བྱོལ་བོད་མིའི་སྤྱི་འཐུས་སྐབས་ ༡༥ པའི་སྐབས་སྤྱི་འཐུས་གསར་འདེམས་བྱུང་བའི་བཀུར་འོས་སྤྱི་འཐུས་ ༢༥ ཙམ་ལ་གཙོ་བོར་དམིགས་ཏེ་རྡ་སའི་ཉེ་འདབས་ཀན་ཡ་རའི་གྲོང་ཚོའི་སུ་ནོ་ཧར་མི་ཊེ་ཇི་(Snow Hermitage)མགྲོན་ཁང་དུ་ཟབ་སྦྱོང་ཞིག་གོ་སྒྲིག་ཞུས་ཡོད། ཟབ་སྦྱོང་གི་བརྗོད་གཞི་གཙོ་བོ་གྲོས་ཚོགས་ནང་ལས་དོན་གནང་ཕྱོགས་དང་འབྲེལ་བའི་སྒྲིག་གཞི། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་དང་ལས་དོན་གནང་ཕྱོགས། རྡ་སར་རྟེན་གཞི་བྱས་པའི་ཚོགས་པ་ཁག་གི་ལས་དོན་བྱེད་ཕྱོགས། སྤྱི་འཐུས་རྒྱུན་ལས་ཀྱི་ཕྱག་ལས་གནང་ཕྱོགས། བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན། བཙན་བྱོལ་བོད་མིའི་གཞི་རྩའི་ཤེས་ཡོན་སྲིད་བྱུས་ལམ་སྟོན། བོད་མིའི་གཞི་ཆགས་ཁག་གི་སྤྱི་ཚོགས་དང་དཔལ་འབྱོར་གྱི་གནས་བབས། བཙན་བྱོལ་ནང་བོད་མིའི་མཉམ་འབྲེལ་སྒྲིག་འཛུགས་བཅས་ཡིན་པ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འཛིན་སྐྱོང་འགན་འཛིན་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་གསལ་བཤད་གནང་ཡོད། ཕྱོགས་མཚུངས་བོད་ནང་གི་འགྲོ་བ་མིའི་ཐོབ་ཐང་དང་རྒྱ་ནག་གི་ཆབ་སྲིད་སྒྲིག་འཛུགས་ཀྱི་ངོ་སྤྲོད་བཅས་ཀྱང་གསལ་བཤད་གནང་འཆར་ཡོད་འདུག
དེ་ཡང་ཕྱི་ཚེས་ ༡༠ ཉིན་ཐོག་མར་གསར་འདེམས་བྱུང་བའི་སྤྱི་འཐུས་རྣམས་ཀྱིས་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པར་གཟིགས་སྐོར་ཕེབས་སྐབས་ཐོག་མར་ཕྱི་དྲིལ་ལས་ཁུངས་སུ་གཟིགས་ཞིབ་གནང་ཡོད། སྐབས་དེར་ཕྱི་དྲིལ་དྲུང་འཕར་བཀྲིས་ལགས་ཀྱིས་ལས་ཁུངས་ཀྱི་ཚན་པ་ཁག་རེ་རེ་བཞིན་ངོ་སྤྲོད་གནང་ཡོད་པ་བཅས།།