ཕྱི་ལོ་ ༢༠༠༨ ཟླ་ ༠༦ ཚེས་ ༡༥ རེས་གཟའ་ཟླ་བ།
༄༅། །༢༠༠༨ ཕྱི་ཟླ་ ༦ ཚེས་ ༡༦ ཉིན་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་གྱི་མཛད་སྒོའི་ཐོག་མར་སྔ་དྲོ་ཆུ་ཚོད་ ༦ པའི་ཐོག་བཞུགས་སྒར་ལྷ་རྒྱལ་རིར་མི་མང་འདུ་འཛོམས་གནང་སྟེ་བསྟན་སྲུང་དགྲ་ལྷ་ཆེན་པོ་རྣམས་དབུ་འཕང་དགུང་ལ་འདེགས་པའི་བསངས་གསོལ་ཟབ་རྒྱས་ཞུས། དེ་རྗེས་དངོས་གཞིའི་མཛད་སྒོ་གངས་སྐྱིད་ལས་བྱེད་གསོལ་ཐབ་ཁང་གི་ཡང་སྟེང་ཚོགས་ཁང་དུ་སྐོང་ཚོགས་གནང་ཡོད་པ་རེད། མཛད་སྒོའི་ཐོག་མར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཆོག་ནས་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་ཕུལ་གནང་བ་དང་སྦྲགས་ཚང་མས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་བསྟན་སྲིད་མི་རིགས་བཅས་ཀྱི་ཆེད་དུ་ལུས་སྲོག་དོར་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་སྐར་མ་གཅིག་རིང་མྱ་ངན་གུས་འདུད་གནང་རྗེས་དུས་དྲན་གོ་སྒྲིག་ཚོགས་ཆུང་གི་ཚོགས་གཙོ་སྤྱི་ཟུར་གླིང་ཚང་ཚེ་རྡོར་ལགས་ནས་དུས་དྲན་དང་འབྲེལ་བའི་བྱེད་སྒོ་ཁག་འགྲེལ་བརྗོད་གནང་བ་དང་། མདོ་ཁམས་ཆུ་བཞི་སྒང་དྲུག་དབུས་རྒྱུན་ལས་ཁང་གི་ཚོགས་གཞོན་དགེ་བཤེས་གཡུང་དྲུང་རྒྱལ་མཚན་ལགས་ནས་དབུས་རྒྱུན་ལས་ཀྱི་ཡོངས་ཁྱབ་གཏམ་བཤད་སྒྲོགས་སྦྱང་གནང་གྲུབ་རྗེས་མགྲོན་གྱི་གཙོ་བོ་བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་གིས་སྤྱི་འཐུས་རྒྱུན་ལས་ཀྱི་གསུང་བཤད་གནང་བ་དང་སྦྲགས་སྐུ་ངོ་མཆོག་གིས་ཆུ་སྒང་གི་གཙོ་འཛིན་དང་དམག་སྤྱི་རྣམ་པར་གཟེངས་བསྟོད་ཕྱག་འཁྱེར་གནང། དཔལ་ལྡན་ཁྲིམས་ཞིབ་པ་ཆེ་བ་བྲེ་ནང་རྣམ་རྒྱལ་ཚེ་རིང་མཆོག་དང་། དཔལ་ལྡན་ཁྲིམས་ཞིབ་པ་ཨ་མྱེ་ཚང་ཐུབ་བསྟན་བཀྲིས་མཆོག་རྣམ་གཉིས་ནས་ཨ་རིར་གསང་བའི་དམག་སྦྱོང་དང་། ཏར་འཕྲིན་རུ་ཁག བོད་དུ་གནམ་རྒྱག་མྱོང་མཁན་རྣམས་པར་གཟེངས་བསྟོད་ཕྱག་འཁྱེར་གནང་། དཔལ་ལྡན་ཆོས་རིག་བཀའ་བློན་མཆོག་དང་། དཔལ་ལྡན་དཔལ་འབྱོར་བཀའ་བློན་མཆོག་ནས་ཆུ་སྒང་དང་བླངས་དམག་མི་རྣམས་ལ་ཕྱག་འཁྱེར་དང་། དཔལ་ལྡན་ཁྲིམས་ཞིབ་པ་ཆེ་བ་ཟུར་པ་བྱ་དུར་བཟང་པོ་མཆོག་ནས་ཆུ་སྒང་རྒྱུན་ལས་ཟུར་པ་རྣམས་པར་ཕྱག་འཁྱེར་བཅས་གནང་བ་དང་། དཔལ་༸རྒྱལ་བ་ཀརྨ་པའི་ལྕམ་སྲིང་རྗེ་བཙུན་དངོས་སྒྲུབ་དཔལ་འཛོམས་ལགས་ནས་ཆུ་སྒང་ས་གནས་རྒྱུན་ལས་ཁག་ལ་ཆུ་སྒང་རྟགས་ཅན་གྱི་སྟེགས་མ་དང་། ཆུ་སྒང་དར་ཆ་དང་ཏོག་ཆ་འགྲིག་རེ་གནང་གྲུབ་རྗེས་དུས་དྲན་གོ་སྒྲིག་ཚོགས་ཆུང་གི་ཚོགས་གཙོ་སྤྱི་ཟུར་གླིང་ཚང་ཚེ་རྡོར་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་དངོས་གཞི་ལེགས་པར་གྲུབ་ཡོད་པ་རེད་འདུག
