༢༠༡༡ ཟླ་ ༩ ཚེས་ ༩ རེས་གཟའ་པ་སངས།
༄༅། །ཨ་རིའི་གཞུང་ཕྱོགས་ནས་ཨ་སྒོར་ཐེར་འབུམ་བདུན་གྱི་འགྲོ་གྲོན་ལྡན་པའི་སྣུམ་རྫས་བོགས་གཏོང་མཐུད་འབྲེལ་བྱ་རྒྱུའི་ལས་གཞི་དེའི་ཆེད་དུ་ཁེ་ཎ་ཌའི་བཟོ་ཚོང་ཚན་པས་རིན་གོང་འགྲན་བསྡུར་གནང་བཞིན་པའི་སྐབས་དེར་ལས་གཞི་དངོས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ནོ་བེལ་ཞི་བདེའི་དེད་དཔོན་དགུ་ཡིས་ལས་གཞི་དེས་གོ་ལ་སྤྱི་ཡོངས་ལ་གནོད་སྐྱོན་ཡོང་གི་ཡོད་པས་འགྲེལ་བརྗོད་མཛད་པའི་ཕྱག་བྲིས་ཤིག་གནང་འདུག
དེ་ཡང་ཕྱི་ལོ་ ༢༠༡༡ ཟླ་ ༩ ཚེས་ ༨ ཉིན་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར། ནོ་བེལ་ཞི་བདེའི་དེད་དཔོན་དགུ་ཡིས་ཨ་རིའི་སྲིད་འཛིན་བྷ་རཀ་ཨོ་བྷ་མ་མཆོག་ལ་ཨ་རིའི་ལྷོ་ཕྱོགས་སྣུམ་འཚག་རྒྱག་གི་མཚོ་འགྲམ་བར་དུ་འཐེན་རྒྱུའི་བོགས་གཏོང་འབྲེལ་མཐུད་ཀྱི་ལས་གཞི་དེར་ཆོག་མཆན་མ་གནང་བའི་འབོད་སྐུལ་གནང་འདུག ཨ་རིའི་སྲིད་འཛིན་མཆོག་གིས་ལས་གཞི་དེར་ཆོག་མཆན་མ་གནང་བ་ཡིན་ན། དེས་འཛམ་གླིང་ནང་ནུས་ཤུགས་འདོན་ཐབས་སུ་སྣུམ་དང་རྡོ་སོལ་སོགས་ཀྱི་བེད་སྤྱོད་ཀྱི་ཚབ་ཏུ་རང་འབྱུང་ནུས་ཤུགས་ཆེད་མ་རྩ་འཛུགས་འཇོག་མང་ཙམ་གནང་ཐུབ་རྒྱུར་ཕན་ཐོགས་ཆེན་པོ་ཡོང་ངེས་ཡིན། ཞེས་ནོ་བེལ་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་ལྷོ་ཨ་ཕི་རི་ཀའི་ཡེ་ཤུ་ཆོས་དཔོན་ཌེ་སི་མན་ཊུ་ཊུ་(Archbishop Desmond Tutu)མཆོག་སོགས་ཞི་བདེའི་དཔོན་དགུ་ཡིས་མཚན་རྟགས་བསྐྱོན་པའི་ཕྱག་བྲིས་ཤིག་གནང་འདུག་པ་བཅས། །