༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མངོན་དགའ་སློབ་གྲྭར་འཚམས་གཟིགས་དང་འབྲེལ་གསུང་བཤད་གནང་དོན། མངོན་དགའ་སློབ་གྲྭ་བཙུགས་ནས་ལོ་མང་ཕྱིན་པ་རེད། དེ་སྔ་ཡིན་ན་བོད་པའི་སྤྱི་ཚོགས་ནང་ལུས་སེམས་མི་བདེ་བ་མང་པོ་ཞིག་ཡོད་པ་རེད་བསམ་པ་དྲན་མ་སོང་། ང་རང་སྒེར་གྱི་མི་ཚེའི་ནང་ཆ་བཞག་པ་ཡིན་ན་ངའི་ཨ་ཅ་ལགས་ལ་ཕྲུ་གུ་ (Spastic) ཞིག་སྐྱེས་ནས་ལོ་བཅུ་གསུམ་བར་བསྡད་པ་རེད། རང་རེའི་སྤྱི་ཚོགས་ནང་ལུས་སེམས་མི་བདེ་བ་མང་ཉུང་ཇི་ཙམ་ཡོད་མེད་ལ་མ་ལྟོས་པར་རྡ་སར་སྒེར་གྱིས་བཙུགས་པ་ཞིག་དང་། འདིར་བོད་མིའི་སྒྲིག་འཛུགས་ནས་བཙུགས་གནང་བ་རེད། རྒྱ་གར་ལྷོ་ཕྱོགས་སུ་ཕན་བདེ་དགའ་ཚལ་གླིང་བཅས་བཙུགས་ཡོད་ནའང་ད་དུང་ཡིན་ནའང་མཐུན་རྐྱེན་མ་འདང་བའི་གནས་སྟངས་ཤིག་ཡོང་བཞིན་འདུག མཐུན་རྐྱེན་ཡོད་པ་ཁག་གནས་ཚད་མཐོ་རུ་དང་ཕྲུ་གུ་ཚོར་ཁ་ཡོད་ལག་ཡོད་ཀྱི་ཕན་ཐོགས་པ་གང་བྱེད་རྒྱུ་འདུག
ཕྲུ་གུ་རེ་རེའི་གནས་སྟངས་ཞིབ་འཇུག་བྱས་ནས་འགྲོ་སྟངས་ག་འདྲ་བཟོ་དགོས་ཀྱི་འདུག མཐུན་རྐྱེན་ཀྱི་ཆ་ནས་ག་འདྲ་ཆགས་ས་རེད། དེ་བཞིན་སེམས་ཁམས་ཀྱི་དཀའ་ངལ་ཡོད་མཁན་མང་པོ་འདུག ནང་སྲིད་ལས་ཁུངས་དང་འཕྲོད་བསྟེན་ལས་ཁུངས་ཀྱིས་གསུངས་པ་ལྟར་ན། རང་རེའི་སྤྱི་ཚོགས་ནང་སེམས་ཁམས་ཀྱི་དཀའ་ངལ་ཡོད་མཁན་མི་གྲངས་ ༣༠༠ ཙམ་ཡོད་ས་རེད། ཉེ་ཆར་རྒྱ་གར་ལྷོ་ཕྱོགས་ཁུལ་དུ་ཉམ་ཐག་ཞིབ་འཇུག་ཚོགས་ཆུང་གི་ཟུང་དྲུང་གསུམ་བཏང་བ་རེད། ཁོ་ཚོའི་སྙན་ཐོ་ཞིབ་ཕྲ་ལྟ་ཀློག་བྱེད་རྒྱུ་མ་བྱུང་། འོན་ཀྱང་རྒྱ་གར་ལྷོ་ཕྱོགས་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་ལྔ་གཅིག་པུའི་ནང་སེམས་ཁམས་ཕྲན་བུ་མི་བདེ་བ་མི་གྲངས་ ༡༢༨ ཙམ་འདུག་ཟེར་གྱི་འདུག ཁྱོན་བསྡོམས་ ༣༠༠ ཙམ་ཡོད་པ་ཡིན་ན་དེ་དག་ཧ་ཅང་དཀའ་ངལ་ཆེན་པོ་རེད། ལྷག་པར་ལོ་ཆུང་བ་དང་ལུས་སྟོབས་ཡོད་པར་བརྟེན་སྟངས་འཛིན་བྱེད་རྒྱུར་ཧ་ཅང་དཀའ་ངལ་འདུག དེ་ཚོའི་རིགས་ལ་ང་ཚོས་གང་བྱེད་དགོས། སེམས་ནད་ (Mental Health) ཟེར་དུས་རྦད་དེ་ལོགས་དགར་རེད། མ་འོངས་པར་སྨན་ཁང་བཟོ་རྒྱུའི་བསམ་བློ་བཏང་བ་ཡིན་ནའང་སྨན་པ་དང་ཆེད་ལས་པ་སྨན་ཞབས་པ་དགོས་ཀྱི་ཡོད་པ་རེད། བྱུང་ན་མཻན་པཱཊ་ལྟ་བུར་གནམ་གཤིས་དང་ས་ཆ་རྒྱ་ཆེན་པོ་ཡོད་པ་རེད། ད་ཆ་ལམ་སང་གང་བྱེད་དགོས་མིན་ཤེས་ཀྱི་མི་འདུག
ཁག་གཅིག་གིས་འདི་རིགས་ལ་རོགས་བྱེད་རྒྱུའི་ཆེད་དང་དུ་བླངས་ནས་དམིགས་བསལ་སློབ་སྦྱོང་གནང་སྟེ་ཕེབས་ཡོད། ཁག་གཅིག་ནི་ཤ་ཚ་རང་བྱས་ནས་ཕེབས་ཡོད། སྨན་རྩིས་ཁང་གི་སྨན་པ་ཕེབས་ཀྱི་ཡོད་ཅེས་གསུངས་པ་བཞིན་ཁོ་ཚོའི་ངོས་ནས་བོད་སྨན་གྱི་ཐོག་ནས་རིག་པ་གསར་པ་འདྲ་འདོན་རྒྱུ་ཡོད་དམ། བོད་སྨན་དང་ཕྱི་ལུགས་སྨན་གྱི་ཐོག་ནས་གང་བྱེད་རྒྱུ་འདུག རྣམ་པ་ཚོ་འདིར་དངོས་སུ་ཕྱག་ལས་གནང་བཞིན་ཡོད་སྟབས་ཤེས་ཀྱི་ཡོད་པ་རེད། འཕྲོད་བསྟེན་ལས་ཁུངས་ལ་མངགས་ནས་མ་འོངས་པར་གནས་སྟངས་ཞིབ་འཇུག་ཡག་པོ་བྱས་ནས་ད་དུང་ཡིན་ནའང་མཐུན་རྐྱེན་གང་སྦྱོར་དགོས་ཀྱི་འདུག ཞན་ཆ་གང་ནས་འགྲོ་གི་འདུག་དེ་དག་བལྟས་ནས་མ་འོངས་པར་གོམ་པ་ཇི་ལྟར་བརྒྱག་དགོས་ཀྱི་འདུག་དེ་དག་ལྟ་དགོས་ཀྱི་འདུག
རྣམ་པ་ཚོར་དཀའ་ངལ་ཧ་ཅང་ཡོད་པ་རེད། སྒྲིག་འཛུགས་ག་འདྲ་ཞིག་ཡིན་ནའང་ཕྱི་གསལ་ནང་གསལ་དགོས། དཀའ་ངལ་འཕྲད་ཀྱི་ཡོད་ན་དཀའ་ངལ་དེ་དག་དངོས་སུ་བཏོན་ནས་དེ་ལ་གདོང་ལེན་ཇི་ལྟར་བྱེད་དགོས་ཀྱི་འདུག་དེར་བསམ་བློ་གཏོང་དགོས། ལམ་སང་སེལ་ཐུབ་དང་མ་ཐུབ་ནི་གནས་ཚུལ་ཐ་དད་རེད། རིམ་པས་སེལ་དགོས་པ་མ་ཟད་སེལ་ཐུབ་ཀྱི་རེད། ཕྲུ་གུའི་ཁེ་ཕན་ཆེད་གང་དགོས་ཀྱི་ཡོད་ནའང་ཁ་གསང་པོ་བྱས་ནས་བཤད་དགོས། ཚང་མས་ཧུར་ཐག་གནང་རོགས། བཀའ་ཤག་གི་ངོས་ནས་འགྱོད་པ་མེད་པར་གང་ཐུབ་ཅི་ཐུབ་ཀྱིས་འབད་བརྩོན་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་ཡོད་པ་བཅས། །