༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༡༢ ནས་ ༡༣ བར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་གངས་སྐྱིད་སྲིད་སྐྱོང་ཚོགས་ཁང་དུ་རྒྱ་བལ་འབྲུག་གསུམ་ཁུལ་གྱི་བོད་མིའི་སོ་ནམ་གཞིས་ཆགས་ ༡༨ དང་རྒྱ་གར་ནང་གི་བོད་མིའི་མཉམ་འབྲེལ་ཁག་ ༡༥ ཚོགས་ཆེན་ཐེངས་ ༨ པའི་དབུ་འབྱེད་མཛད་སྒོ་ཚོགས་ཡོད་པ་དང་། དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་མཉམ་འབྲེལ་ཚོགས་པའི་ཚོགས་གཙོ་དང་སྤྱི་ཟུར་པདྨ་བདེ་ལེགས་ལགས་དང་། བཀའ་དྲུང་ཡིག་ཚང་གི་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས། ནང་སྲིད་དྲུང་ཆེ་ཚེ་དབང་སྒྲོལ་མ་ལགས་དང་དྲུང་འཕར་ཚེ་བརྟན་སྐལ་བཟང་ལགས། དྲུང་འཕར་ཟླ་བ་ཚེ་རིང་ལགས། དྲུང་གཞོན་དོན་གྲུབ་ཚེ་རིང་ལགས་སོགས་ཕེབས་ཡོད།
དེ་ཡང་དབུ་འབྱེད་མཛད་སྒོའི་ཐོག་མར་ནང་སྲིད་དྲུང་ཆེ་ཚེ་དབང་སྒྲོལ་མ་ལགས་ཀྱིས་ཐེངས་འདིའི་ཚོགས་ཆེན་སྐོར་ངོ་སྤྲོད་གནང་གྲུབ་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན།མཉམ་འབྲེལ་ཚོགས་པ་ཁག་བཙུགས་པ་ནས་བཟུང་ས་གནས་མི་མང་ལ་ཕན་ཐོགས་པོ་བྱུང་ཡོད་པ་དང་། ཕྱི་ལོ་ ༢༠༠༧ ནས་ ༢༠༢༡ བར་དུས་ཡུན་ལོ་༡༤ ཕྱིན་ཡོད། ས་གནས་མཉམ་འབྲེལ་ཚོགས་པ་ཁག་གི་འགན་འཛིན་རྣམ་པས་ལོ་གཅིག་གི་ལས་བསྡོམས་ནང་སྲིད་ལས་ཁུངས་བརྒྱུད་བཀའ་ཤག་ལ་དུས་ཚོད་ཏག་ཏག་ལ་འབུལ་དགོས་པ་དང་། འབྱུང་འགྱུར་ནང་སྲིད་ལས་ཁུངས་ཀྱི་ལས་བྱེད་ས་གནས་ཁག་གི་མཉམ་འབྲེལ་ཚོགས་པ་ཁག་ལ་ཕེབས་ཏེ་གནས་སྟངས་རྟོག་ཞིབ་གནང་དགོས་པ། ས་གནས་འཐུས་ཚོགས་མེད་མཁན་གྱི་ས་གནས་ཁག་ཏུ་ས་གནས་འཐུས་ཚོགས་འཛུགས་རྒྱུའི་འཆར་གཞི་ཡོད་པ་། དེ་བཞིན་བཙན་བྱོལ་བོད་མིའི་གཞིས་ཆགས་ཁག་ཏུ་བོད་པའི་མི་འབོར་ཉུང་དུ་འགྲོ་བཞིན་ཡོད་སྟབས་གཞིས་ཆགས་སྲ་བརྟན་ཡོང་སླད་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པའི་སྐོར་གོ་བསྡུར་གནང་དགོས་པ། ས་གནས་ཡུལ་སྐོར་སྤྲོ་འཆམ་བསྟི་གནས་བཟོ་ཐབས་དང་ཕུགས་རྒྱང་རིང་པོར་བསམ་བློ་བཏང་ནས་སྟོན་འབྲས་རིགས་འདེབས་རྒྱུ། གཞིས་ཆགས་ཁག་ཆུང་བ་རིགས་ཟླ་སྒྲིལ་གཏོང་རྒྱུ་དང་། ནང་སྲིད་ས་ཁང་གི་སྒྲིག་གཞི་བསྐྱར་བཅོས་གནང་དགོས་གལ། སོ་ནམ་འདེབས་ལས་སྐོར་གོ་བསྡུར་གནང་དགོས་པ། ཁྲིམས་དང་སྒྲིག་གཞི་གཞིར་བཞག་ཐོག་ཕྱག་ལས་གནང་དགོས་པ་སོགས་ཀྱི་སྐོར་གསུང་བཤད་གནང་ཡོད་པ་བཅས།།
བཙན་བྱོལ་བོད་མིའི་སོ་ནམ་གཞིས་ཆགས་དང་མཉམ་འབྲེལ་ཁག་གི་ཚོགས་ཆེན་ཐེངས་ ༨ པའི་དབུ་འབྱེད་མཛད་སྒོ་ཚོགས་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)