༄༅། །འདི་གར་ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཐའེ་ཝན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་གྲོས་ཚོགས་འཐུས་མི་ཝན་ཏིང་ཡུས་མཆོག་དང་། ལྷན་ཚོགས་ཀྱི་དྲུང་ཆེ་ཝུ་ཨེར་ཁའེ་ཞི་མཆོག་ནས་མགྲོན་འབོད་གནང་བ་ལྟར། ཕྱི་ཟླ་ ༡༡ ཚེས་ ༥ ཉིན་གུང་ཆུ་ཚོད་ ༡༢ ནས་ ༡༥ བར་ཐའེ་ཝན་ཞི་ལའེ་ཌིན་གསོལ་མགྲོན་ཁང་དུ་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། དོན་ཁང་གི་དྲུང་ཆེ་བསོད་ནམས་རྡོར་རྗེ་གཉིས་ཆེད་བཅར་གྱིས་ཕན་ཚུན་བཀའ་མོལ་ལྷུག་པོ་བྱུང་ཡོད།
དེ་རིང་གི་གསོལ་སྟོན་དེ་བཞིན་གཙོ་བོ་སྐུ་ཚབ་དོན་གཅོད་ལགས་ལས་གནས་སུ་ཕེབས་པར་འཚམས་འདྲི་ཞུ་ཆེད་ཡིན་པ་དང་། གསོལ་སྟོན་ཐོག་གྲོས་ཚོགས་འཐུས་མི་དང་། ཐའེ་ཝན་གཞུང་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི། བོད་དོན་རྒྱབ་སྐྱོར་བ། གསར་འགྱུར་བརྒྱུད་ལམ་བཅས་ཚོགས་མི་ ༢༠ ལྷག་མཉམ་ཞུགས་གནང་ཡོད། གསོལ་སྟོན་ཐོག་དྲུང་ཆེ་ཝུ་ཨེར་ཁའེ་ཞི་མཆོག་ནས་དགའ་བསུའི་གསོལ་སྟོན་དེ་སྔ་ས་ནས་གཤམས་དགོས་ཀྱང་། གདུག་རྩུབ་ནད་ཡམས་དེས་དེ་རིང་བར་དུ་ཕར་འགྱངས་དགོས་པའི་རྒྱུ་མཚན་ནས་མ་འོངས་པར་འགྲོ་བ་མིའི་ཐོབ་ཐང་ལས་དོན་དང་འབྲེལ་བའི་སྐོར་བོད་དང་། ཡུ་གུར། སོག་པོ། ཧོང་ཀོང་། ཐའེ་ཝན་སོགས་མཉམ་ལས་མང་པོ་བྱ་ཐུབ་པའི་རེ་བ་དང་། ༸གོང་ས་མཆོག་སྐུ་གཟུགས་བདེ་ཐང་དང་། སླར་ཡང་ཐའེ་ཝན་དུ་ཆིབས་བསྒྱུར་བསྐྱང་བའི་རེ་སྨོན་ཡོད་ཅེས་གསུངས།དེ་ནས་གྲོས་ཚོགས་འཐུས་མི་རེ་རེ་བཞིན་སྡིང་ཆའི་ཐོག་ཕེབས་ཏེ་སྐུ་ཚབ་དོན་གཅོད་ལགས་ལས་གནས་གསར་པའི་ཐོག་ཕེབས་པར་འཚམས་འདྲི་དང་། ཚང་མ་བོད་དོན་ལ་དོ་སྣང་ཆེན་པོ་ཡོད་མཁན་ཤ་སྟག་ཡིན་སྟབས། མ་འོངས་པར་དོན་གཅོད་ལས་ཁུངས་དང་མཉམ་ལས་མང་ཙམ་དང་། བོད་མི་ཚོའི་ལག་ཁྱེར་དང་ཐོངས་མཆན་དཀའ་ངལ་སེལ་རྒྱུའི་ཐབས་ལམ་འཚོལ་རྒྱུའི་ཞལ་བཞེས་གནང་། དེ་རིང་གྲོས་ཚོགས་སུ་ཡུ་རུབ་གྲོས་ཚོགས་ཀྱི་གཞུང་འབྲེལ་སྐུ་ཚབ་སྣེ་ལེན་གྱི་དུས་ཚོད་དང་གདུང་ཐུག་བྱས་ཡོད་ཀྱང་། གྲོས་ཚོགས་འཐུས་མི་རྣམས་གལ་ཆེ་དོན་ཆེར་རྩིས་ནས་ཕྱོགས་གཉིས་ཀར་མཉམ་ཞུགས་བྱས་པ་དང་། གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ཝང་ཏིང་ཡུས་མཆོག་ནས་ཆེད་དུ་སྐུ་ཚབ་དོན་གཅོད་ལགས་ལ་གཞུང་ཚབ་ཅེས་འབོད་པ་དང་། ཐའེ་ཝན་དུ་ལས་དོན་མཐའ་དག་ལེགས་འགྲུབ་ཡོང་བའི་སྨོན་འདུན་དང་ཆབས་ཅིག་ཐའེ་བོད་གྲོས་ཚོགས་གཉིས་དབར་ཕན་ཚུན་འབྲེལ་ལམ་ཡག་ཏུ་གཏོང་རྒྱུ་དང་། ལས་དོན་གང་ཅིའི་ཐོག་དེང་སང་རྒྱལ་སྤྱིའི་ཁོར་ཡུག་བཟང་པོ་དེའི་འོག་ཏུ་མཉམ་ལས་མང་ཙམ་ཡོང་ཐབས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐའེ་ཝན་དུ་ཆིབས་བསྒྱུར་བསྐྱང་ཐུབ་པའི་རེ་སྨོན་ཡང་ཞུས།
མཐར་སྐུ་ཚབ་དོན་གཅོད་ལགས་ཀྱིས་ཚང་མར་ཐུགས་རྗེ་ཆེ་ཞུས་པ་དང་། ཐའེ་ཝན་གཞུང་དང་། མང་ཚོགས་ནས་བོད་མིར་བཅངས་པའི་བརྩེ་སེམས་དང་། བོད་དོན་ལ་གདུང་སེམས་མཉམ་བསྐྱེད་དང་རྒྱབ་སྐྱོར་ཆེན་པོ་གནང་བ་དེས་བོད་མི་ཚོ་སེམས་འགུལ་ཆེན་པོ་ཐེབས་བཞིན་པའི་རྣམ་པ་ངོ་སྤྲོད་དང་བཅས་མུ་མཐུད་ལས་དོན་ལ་རྒྱབ་སྐྱོར་དང་། མ་འོངས་པར་ཐའེ་ཝན་གྱི་ནུས་པ་ཆེ་ཙམ་བཏོན་ཏེ་རྒྱ་ནག་རང་དབང་མང་གཙོ་ཅན་དུ་འགྱུར་བར་མི་རྒྱུ་གཉིས་ཀའི་རྒྱབ་སྐྱོར་མང་ཙམ་གནང་ཐུབ་པའི་རེ་བའང་བཏོན་ཡོད། གསོལ་སྟོན་ཐོག་ཚང་མས་མ་འོངས་ལས་དོན་སྤེལ་ཕྱོགས་སྐོར་དང་། མཉམ་ལས་བྱ་ཕྱོགས་སྐོར། དེང་སང་རྒྱལ་སྤྱིའི་གནས་སྟངས་འོག་བོད་དང་། ཡུ་གུར། སོག་པོ། ཧོང་ཀོང་། ཐའེ་ཝན། རྒྱ་ནག་སོགས་ཀྱི་གནས་ཚུལ་ཇི་ཆགས་སོགས་སྐོར་བཀའ་བསྡུར་ལྷུག་པོ་གནང་ཡོད་པ་བཅས།།