༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨི་ཊ་ལཱིའི་རྒྱལ་ས་རོམ་ (Rome) དུ་རྟེན་གཞི་བྱས་པའི་ཀུན་ཏུ་བཟང་པོ་ཆོས་ཚོགས་སུ་ཨི་ཊ་ལཱིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷེར་ཏོ་རཱམ་པི་ (Senator Robetro Rampi) མཆོག་དང་། དེ་བཞིན་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཁག་གཅིག་མཇལ་འཕྲད་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན། དེ་སྔ་ཕྲན་རང་འདི་གར་བཅར་བའི་སྐབས་དཀའ་ངལ་ཞིག་ཡོད་པ་དེ་སེལ་རོགས་གནང་བར་ཀུན་ཏུ་བཟང་པོ་ཆོས་ཚོགས་ཀྱི་ཚོགས་གཙོས་ཐུགས་རྗེ་ཆེ་ཞེས་གསུངས་སོང་། ད་ལྟའི་དུས་སུ་དཀའ་ངལ་སེལ་ཟིན་པ་དེས་གང་སྟོན་གྱི་ཡོད་དམ་ཞེ་ན། ནང་པའི་ཆོས་ནང་རྟག་པར་ཁས་མི་ལེན་པ་དེ་རང་བཞིན་གྱིས་སྒྲུབ་ཀྱི་ཡོད། སྤྱིར་མི་སྒེར་གྱི་མི་ཚེ་དང་། སྒྲིག་འཛུགས། མི་རིགས། རྒྱལ་ཁབ་ཡིན་ནའང་རེད་གདོང་ལེན་བྱེད་དགོས་པ་མང་པོ་ཡོང་གི་རེད། འོན་ཀྱང་སྐབས་དང་དུས་སོ་སོར་དཀའ་ངལ་དེ་དག་རིམ་བཞིན་སེལ་ནས་འགྲོ་བཞིན་པ་རེད།
བོད་སྤྱི་པའི་རྩ་དོན་དང་འབྲེལ་ནས་བཤད་པ་ཡིན་ནའང་ང་ཚོ་བཙན་བྱོལ་དུ་འབྱོར་ནས་ལོ་ངོ་ ༦༠ ལྷག་ཕྱིན་ཡོད་ནའང་བོད་རྒྱ་གཉིས་ཀྱི་དཀའ་རྙོག་གང་མགྱོགས་སེལ་ཐུབ་པའི་རེ་བ་མུ་མཐུད་རྒྱག་བཞིན་ཡོད་པ་མ་ཟད་འབད་བརྩོན་ཡང་བྱེད་བཞིན་ཡོད། ད་ལྟ་འདིར་སྐད་ཆ་བཤད་པའི་སྐབས་ཕར་ཚུར་ཐུགས་རྗེ་ཆེ་ཞུ་བཞིན་ཡོད། གང་ལྟར་གཅིག་ཕན་གཅིག་གྲོགས་དང་ལྟ་བ་རྟེན་འབྱུང་ཁས་ལེན་བཞིན་ཡོད། བོད་ཀྱི་རྩ་དོན་ཐོག་བོད་པས་དཀའ་ལས་གཙོ་བོ་རྒྱག་དགོས། ད་བར་རྣམ་པ་ཚོའི་རྒྱབ་སྐྱོར་ལ་བརྟེན་ནས་བོད་ཀྱི་གནད་དོན་འདི་མ་ཡལ་པར་མུ་མཐུད་གནས་ཐུབ་པ་འདི་ཚང་མས་ཧུར་ཐག་གནང་བའི་རྒྱུ་མཚན་ལ་བརྟེན་ནས་བྱུང་བ་ཡིན་སྟབས། ངས་སླར་ཡང་རྣམ་པ་ཚོར་ཐུགས་རྗེ་ཆེ་ཞེས་ཞུ་རྒྱུ་ཡིན།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་པ་ནས་བཟུང་ཕུགས་རྒྱང་རིང་པོར་དགོངས་པ་བཞེས་ནས་མང་གཙོའི་ལམ་ལུགས་སྲོལ་གཏོད་མཛད་པ་དང་། བོད་པའི་འཐབ་རྩོད་མུ་མཐུད་འགྲོ་ཐུབ་པའི་ཐུགས་རེ་བཅངས་པ་ལྟར་ད་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་བོད་མི་རང་གིས་འགན་འཁུར་གནང་བའི་ཐོག་མི་མང་གིས་འགོ་ཁྲིད་འོས་འདེམས་བྱས་ཏེ་ལོ་ཉི་ཤུ་ལྷག་འགྲོ་བཞིན་ཡོད།
ང་ཚོས་ད་བར་གྲུབ་འབྲས་གང་ཐོན་པ་དེ་དག་ཚང་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། ཐུགས་རྗེའི་སྦྱིན་རླབས་འོག་ནས་བྱུང་བ་སྨོས་མེད་ཡིན་པ་བོད་མི་དང་བོད་དོན་རྒྱབ་སྐྱོར་བ་ཚོས་དུས་རྟག་ཏུ་དྲན་དགོས་རྒྱུ་གལ་ཆེན་པོ་རེད། ད་ལྟའི་དུས་སུ་བོད་ནང་གི་དཀའ་ངལ་དེ་ཡུ་གུར་སོགས་ནང་བཞིན་མངོན་གསལ་དོད་པོ་མེད་པ་མ་གཏོགས་གནས་ཚུལ་ཧ་ཅང་ཛ་དྲག་ཏུ་འགྲོ་བཞིན་འདུག གཙོ་བོ་རྒྱ་ནག་གཞུང་གིས་བོད་མི་རིགས་ཀྱི་ངོ་བོ་རྩ་བརླག་གཏོང་རྒྱུའི་སྲིད་བྱུས་དང་ལས་འཆར་མང་དག་ཅིག་བང་སྒྲིག་བཞིན་ཡོད། བོད་ཀྱི་སྐད་ཡིག་ལ་མཚོན་ན་མཐོང་མེད་པ་ཆགས་རྒྱུ་དང་། སྔོན་འགྲོ་ནས་རྒྱ་སྐད་བསླབ་དགོས་པ། བོད་ཀྱི་སྐད་ཡིག་རྩ་མེད་ཆགས་པ་ཡིན་ན་རང་བཞིན་གྱིས་ནང་ཆོས་དང་བོད་ཀྱི་རིག་གཞུང་སོགས་ལ་དོ་ཕོག་འགྲོ་གི་ཡོད། གང་ཡིན་ཞེ་ན། བོད་ཀྱི་སྐད་ཡིག་ནི་བོད་ཀྱི་ཆོས་དང་རིག་གཞུང་གི་རྨང་གཞི་ཆགས་ཀྱི་ཡོད་པ་རེད།
སྤྲུལ་སྐུ་ཡང་སྲིད་ངོས་འཛིན་བྱེད་རྒྱུའི་ཐད་རྒྱ་ནག་གཞུང་གིས་ཐེ་བྱུས་བྱེད་རྒྱུ་འགོ་བཙུགས་ཏེ་ཆབ་སྲིད་ཀྱི་ངོ་བོར་བེད་སྤྱོད་བྱེད་ཀྱི་ཡོད་པ་གསལ་པོ་རེད། མདོར་ན། རྒྱ་ནག་གཞུང་གིས་བོད་ནང་སྲིད་བྱུས་འཛིན་པ་དང་། སྲིད་བྱུས་དེ་དག་གི་ཐོག་ནས་ལས་གཞི་བང་སྒྲིག་པ་ཁག་བོད་མི་རིགས་ཀྱི་ངོ་བོ་རྩ་བརླག་གཏོང་རྒྱུའི་ཆེད་དུ་ཡིན་པ་གསལ་པོ་ཆགས་ཡོད། ཅེས་སོགས་ཀྱི་གསུང་བཤད་གནང་གྲུབ་མཚམས་རོམ་ནས་མི་ལན་གྲོང་ཁྱེར་དུ་ཕེབས་ཐོན་གནང་ཡོད། །
