༄༅། །མེཀ་སི་ཀོ་བོད་དོན་རྒྱབ་སྐྱོར་ཚོགས་པས་རྒྱ་ནག་གཞུང་གིས་བཙན་གནོན་འོག་བོད་ས་བཙན་བཟུང་དང་དབང་བསྒྱུར་བྱས་པ་ནས་བཟུང་ད་བར་འདས་གྲོངས་སུ་གྱུར་བའི་བོད་མི་རྣམས་ཀྱི་ཆེད་དུ་གདུང་སེམས་མཉམ་སྐྱེའི་མཆོད་འབུལ་སྨོན་ལམ་ཞིག་ཚོགས་གནང་ཡོད།

དེ་ཡང་མེཀ་སི་ཀོའི་སྤྱི་ཚོགས་ཁྲོད་འདས་མཆོད་ནི་དུས་ཚིགས་ཧ་ཅང་གལ་ཆེན་པོ་རྩི་བཞིན་ཡོད་པ་མ་ཟད། འདས་པོའི་དྲན་རྟེན་སླད་ལོ་ལྟར་ཉིན་དེར་འདས་གྲོངས་སུ་གྱུར་བ་རྣམས་ཀྱི་འདྲ་པར་སྒྲིག་གཤོམ་བྱས་ཏེ་ཟས་རིགས་སོགས་འབུལ་གཤོམས་གནང་སྲོལ་ཡོད། ཐེངས་འདིར་མེཀ་སི་ཀོ་བོད་དོན་རྒྱབ་སྐྱོར་ཚོགས་པས་མེཀ་སི་ཀོའི་ཕྱི་འབྲེལ་བློན་ཆེན་ལས་ཁུངས་ཀྱི་མདུན་དུ་རྒྱ་ནག་གཞུང་གིས་བཙན་གནོན་འོག་ད་བར་འདས་གྲོངས་སུ་གྱུར་བའི་བོད་མི་རྣམས་ཀྱི་ཆེད་གདུང་སེམས་མཉམ་སྐྱེའི་མཆོད་འབུལ་གནང་ཡོད།དེ་ཡང་གདུང་སེམས་མཉམ་སྐྱེའི་ལས་འགུལ་སྤེལ་དགོས་དོན་གཙོ་བོ་ནི། མེཀ་སི་ཀོ་གཞུང་གིས་རྒྱ་ནག་གཞུང་དང་མཉམ་དུ་ངན་པ་ལག་སྦྲེལ་གྱིས་ཁ་ཁུ་སིམ་པོར་གནས་པ་དེར་ངོ་རྒོལ་མཚོན་བྱེད་དང་རྒྱལ་སྤྱིའི་མང་ཚོགས་ཁྲོད་རྒྱ་ནག་གཞུང་གིས་བོད་ནང་དྲག་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་པའི་སྐོར་ལ་གོ་རྟོགས་རྒྱ་ཆེ་སྤེལ་སླད་ཡིན།

ཐེངས་འདིའི་མཆོད་འབུལ་གྱི་ལས་འགུལ་འདི་བཞིན་བོད་བསྟན་སྲིད་མི་རིགས་རིག་གཞུང་དང་བཅས་པའི་དོན་དུ་མི་ཚེ་ཧྲིལ་པོའི་རིང་བློས་གཏོང་གནང་མཁན་རྒྱལ་གཅེས་པ་ཆབ་སྲིད་བཙོན་ཟུར་དཔལ་ལྡན་རྒྱ་མཚོ་མཆོག་དང་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་ (Dr Alfredo Martinez Moreno) མཆོག མཱར་ཐ་པོན་སི་ (Martha Ponce)  མཆོག་དང་། ནེན་སི་ (Nancy Flores)  མཆོག་བཅས་ཀྱི་ཆེད་དུ་ཡིན།མང་ཚོགས་ཁྲོད་རྒྱ་ནག་གཞུང་གིས་བོད་ནང་བོད་ཀྱི་རྒྱལ་དར་འཕྱར་མི་ཆོག་པ་དང་སྤྱོ་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་པར་སྒྲིག་གཤོམ་བྱས་མི་ཆོག་པ་སོགས་བོད་ནང་གི་ཛ་དྲག་གི་གནས་སྟངས་དང་། གལ་ཏེ་དེ་ལྟར་བྱེད་ཚེ་རྒྱ་ནག་གཞུང་གིས་རྒྱལ་ཁབ་ཁ་བྲལ་དང་བདེ་འཇགས་ལ་ཉེན་ཁ་བཟོས་པ་སོགས་ཀྱི་ཉེས་མིང་འོག་བཙོན་འཇུག་བྱེད་ཀྱི་ཡོད་སྐོར་སོགས་གོ་རྟོགས་སྤེལ་ཡོད་པ་བཅས། །