༢༠༡༡ ཟླ་ ༩ ཚེས་ ༣ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༣༡ ཉིན་ལྷོ་ཨ་ཕི་རི་ཁའི་གསར་ཤོག་དྷ་ནིའུ་ཨེ་ཇི་(The New Age)ཞེས་པའི་རྩོམ་སྒྲིག་པའི་གཏམ་ནང་ཁོང་གིས་ལྷོ་ཨ་ཕི་རི་ཁའི་སྲིད་གཞུང་གིས་ད་ཐེངས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་དགོས་སྐོར་འཁོད་དོན།
བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་རྒྱུར་ལྷོ་ཨ་ཕི་རི་ཁའི་སྲིད་གཞུང་ལ་དཀའ་ངལ་གང་ཡང་འཕྲད་མི་དགོས་པ་ལྟ་བུ་ཞིག་ཆགས་ཡོད། ལྷོ་ཨ་ཕི་རི་ཁའི་རྒྱལ་ཁབ་ལྟ་བུར་མཚོན་ན་མི་རིགས་དཀར་ནག་དབྱེ་འབྱེད་ཀྱི་དུས་སྐབས་སུ་རང་དབང་འཐབ་རྩོད་གནང་མཁན་གྱི་དབུ་ཁྲིད་མང་པོ་ཐོན་ཡོད་པ་ཁོང་རྣམས་འཛམ་གླིང་རྒྱལ་ཁབ་མང་པོས་སྣེ་ལེན་ཞུས་ཡོད།
བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཚོན་ན་སྐུ་ཚེ་ཧྲིལ་པོའི་རིང་རྒྱ་ནག་གི་བཙན་དབང་འོག་བོད་རྒྱལ་ཁབ་དེ་བཞིན་གློད་བཀྲོལ་ཐོབ་ཆེད་ཐུགས་བརྩོན་མཛད་ཡོད། ཁོང་ནི་རང་དབང་འཐབ་རྩོད་མཛད་མཁན་ཡང་དག་པའི་དབུ་ཁྲིད་གཅིག་ཆགས་ཡོད།
བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ཁོང་གི་མི་མང་རྣམས་ཀྱིས་ནང་ཆོས་ནས་གསུངས་པ་ལྟར་འཚེ་མེད་ཞི་བའི་ལམ་ནས་བོད་དེ་རྒྱ་ནག་གི་དབང་འོག་ལས་ཐར་ཐབས་མཛད་བཞིན་ཡོད། དེ་ལྟར་ནའང་རྒྱལ་ཁབ་གཞན་ཚོ་དང་འདྲ་བར་ལྷོ་ཨ་ཕི་རི་ཁ་ཡང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གནོན་ཤུགས་འོག་ཚུད་པ་ལྟར་སྣང།
རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གྲོགས་མེད་ཁེར་རྐྱང་བཟོ་ཆེད་ཐེ་ཚོམ་མེད་པའི་སྒོ་ནས་རྒྱལ་སྤྱིའི་ཐོག་རྒྱ་ནག་གི་དཔལ་འབྱོར་དབང་ཤུགས་ཡོད་པ་རྣམས་བེད་སྤྱོད་བྱས་ཡོད། རྒྱལ་ཁབ་སུ་རུང་ཞིག་གིས་༸གོང་ས་ཏཱ་ལའི་བླ་མ་མཆོག་དང་བོད་མིའི་འཐབ་རྩོད་ལ་ཤ་ཚ་དང་རྒྱབ་སྐྱོར་གྱི་རྣམ་པ་སྟོན་སྐབས་རྒྱ་ནག་གཞུང་གིས་སྡིགས་ར་སྐུལ་བཞིན་ཡོད།  བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་དད་མོས་དང་བོད་མིའི་དཔའ་ངར་ལྡན་པའི་འཐབ་རྩོད་ལ་རྒྱབ་སྐྱོར་བྱེད་མཁན་གྱི་མི་དཀྱུས་མ་ཞིག་ལ་མཚོན་ན་རྒྱ་ནག་གི་བྱ་སྤྱོད་དེར་བྱབ་ཆུང་ཞིག་ཆགས་ཡོད།
ཐེངས་འདིར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ལྷོ་ཨ་ཕི་རི་ཁའི་སྲིད་གཞུང་གིས་མཐོང་མཆན་འབུལ་ལམ་ཞུ་རྒྱུ་གལ་ཆེན་པོ་ཡིན་པ་མ་ཟད་དེར་རྒྱུ་མཚན་ཧ་ཅང་ཆེན་པོ་ཡོད། གང་ཡིན་བརྗོད་ན་ལྷོ་ཨ་ཕི་རི་ཁའི་ཡེ་ཤུའི་ཆོས་དཔོན་སྐུ་ཞབས་ཌེ་སི་མོན་ཊུ་ཊུ་མཆོག་དགུང་གྲངས་ ༨༠ ཕེབས་པའི་འཁྲུངས་སྐར་དུ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གདན་ཞུ་གནང་བ་ཞིག་ཡིན། ཆོས་དཔོན་ཊུ་ཊུ་མཆོག་ལྟ་བུར་མཚོན་ན་སྐུ་ཞབས་ནེལ་སོན་མན་ཌེ་ལ་མཆོག་དང་སྐུ་ཞབས་ཨོ་ལི་ཊར་ཊམ་བྷོ་མཆོག སྐུ་ཞབས་ཝལ་ཊར་མཆོག་དང་ཨེལ་བྷར་ཊི་ནོ་སུ་སུ་ལུ་མཆོག་བཅས་ང་ཚོ་ལྷོ་ཨ་ཕི་རི་ཁ་བ་ཚོས་ཆེས་མཐོང་དང་བརྩི་བཀུར་ཧ་ཅང་ཆེན་པོ་ཞུ་རྒྱུའི་མི་སྣ་གྲགས་ཅན་གྱི་གྲས་ཤིག་ཆགས་ཡོད། དེར་བརྟེན་ད་ཐེངས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ལྷོ་ཨ་ཕི་རི་ཁའི་སྲིད་གཞུང་གིས་མཐོང་མཆན་འབུལ་ལམ་ཞུ་རྒྱུའི་རྒྱུ་མཚན་དང་གོ་སྐབས་འདི་ལས་ལྷག་པ་ཞིག་ཐོབ་རྒྱུ་མེད་པ་ལྟ་བུ་ཆགས་ཡོད།