༢༠༡༡ ཟླ་ ༩ ཚེས་ ༣ རེས་གཟའ་སྤེན་པ།
༄༅། །དབུས་བོད་མིའི་སྒྲིག་འཛུགས་ཀྱི་ཆོས་རིགས་ལས་ཁུངས་ནས་གོ་སྒྲིག་ཐོག་བོད་རྒྱལ་ལོ་ ༢༡༣༨ ཕྱི་ལོ་ ༢༠༡༡ ཟླ་ ༩ ཚེས་ ༢༢ ནས་ ༢༤ བར་ཉིན་གྲངས་གསུམ་རིང་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་རྣམ་པས་དབུས་བླ་སྤྲུལ་མཁན་པོ་དང་སྐུ་ཚབ་འདུས་པའི་ཆོས་ཚོགས་ཐེངས་བཅུ་གཅིག་པ་རྡ་ས་སུ་རི་ཡ་གསོལ་མགྲོན་དུ་འཚོགས་གཏན་འཁེལ་འདུག
དེ་ཡང་ཆོས་ཚོགས་ཐེངས་བཅུ་གཅིག་པའི་ཐོག་རྙིང་མའི་བླ་ཆེན་སྐུ་ཚབ་གཅིག་ལྕོགས་ཞེ་ཆེན་རབ་འབྱམས་པ་རིན་པོ་ཆེ་མཆོག་དང་རྒྱལ་བ་ཀརྨ་པ་རིན་པོ་ཆེ་མཆོག འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག སྟག་ལུང་མ་སྤྲུལ་རིན་པོ་ཆེ་མཆོག ས་སྐྱ་བདག་ཁྲི་རིན་པོ་ཆེ་མཆོག དགའ་ལྡན་ཁྲི་པ་རི་རྫོང་རིན་པོ་ཆེ་མཆོག སྨན་རི་ཁྲི་འཛིན་རིན་པོ་ཆེ་མཆོག མཚོ་སྣ་རིན་པོ་ཆེ་མཆོག དེ་བཞིན་རྒྱ་གར་ཧི་མ་ལ་ཡ་དང་། འབྲུག བལ་ཡུལ་སོགས་ཀྱི་གནད་ཡོད་སྐུ་ཚབ་བཅས་ཀྱང་ཕེབས་རྒྱུ་ཡིན་འདུག་པ་བཅས། །