༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༩ ཉིན་བེལ་ཇི་ཡམ་བོད་རིགས་ཚོགས་པའི་གོ་སྒྲིག་འོག་ཉིན་གྲངས་གཉིས་རིང་དང་བླངས་དཔྱ་དངུལ་ལག་དེབ་ཉིན་མོ་ཞེས་པའི་དུས་དྲན་ཞིག་བེལ་ཇི་ཡམ་གྱི་གྲོང་ཁྱེར་ཨེན་ཊི་ཝར་པེན་ (Antwerpen) དུ་སྲུང་བརྩི་གནང་ཡོད།
དང་བླངས་དཔྱ་དངུལ་ལག་དེབ་ཉིན་མོ་ཞེས་པའི་དུས་དྲན་སྲུང་བརྩི་ཞུ་དགོས་པའི་དམིགས་ཡུལ་གཙོ་བོ་ནི། བེལ་ཇི་ཡམ་ནང་ཡོད་པའི་བོད་པ་མི་རེ་ངོ་རེ་ལ་དང་བླངས་དཔྱ་དངུལ་ལག་དེབ་ཐོབ་ཐབས་དང་། དུས་ཚོད་ཕར་འགྱང་། བསྐྱར་བཅོས། དང་བླངས་དཔྱ་དངུལ་དུས་ཐོག་བསྡུ་རྒྱུ་སོགས་ཀྱི་ཆེད་དུ་ཡིན།དེ་ཡང་ལས་འགུལ་འདི་བཞིན་ཚགས་ཚུད་ཡོང་སླད་བེལ་ཇི་ཡམ་སྐུ་ཚབ་དོན་གཅོད་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་རྩིས་པ་བསྟན་འཛིན་ལེགས་བཤད་ལགས། དེ་བཞིན་བོད་རིགས་ཚོགས་པ་ཁག་གི་དང་བླངས་སྐུ་ཚབ་རྣམས་ཀྱིས་མཉམ་རུབ་ཐོག་ཕྱག་ལས་གནང་ཡོད། བེལ་ཇི་ཡམ་བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་དབུ་འབྱེད་གསུང་བཤད་གནང་ཡོད་པ་དང་། སྐབས་དེར་ཁོང་གིས་བེལ་ཇི་ཡམ་དུ་བོད་མི་གྲངས་ ༦༠༠༠ ཙམ་ཡོད་པའི་ཁྲོད་ནས་བོད་མི་གྲངས་༢༠༠༠ ཙམ་གྱིས་དང་བླངས་དཔྱ་དངུལ་འབུལ་གྱི་ཡོད་པ་དང་། བོད་མི་བརྒྱ་ཆ་ ༦༠ ནས་ ༧༠ ཀྱིས་དང་བླངས་དཔྱ་དངུལ་འབུལ་ཐུབ་ཀྱི་མེད་སྟབས། བེལ་ཇི་ཡམ་གྱི་བོད་པ་མི་རེ་ངོ་རེ་ལ་དང་བླངས་དཔྱ་དངུལ་ལག་དེབ་ཐོབ་ཐབས་སུ་འབད་བརྩོན་ཞུ་རྒྱུ་དང་། བེལ་ཇི་ཡམ་སྐུ་ཚབ་དོན་གཅོད་ཁང་གིས་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
སྐུ་མགྲོན་གཙོ་བོ་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་བོད་མིའི་སྒྲིག་འཛུགས་ནས་དང་བླངས་དཔྱ་དངུལ་ལག་དེབ་བཟོས་པའི་རྒྱབ་ལྗོངས་ལོ་རྒྱུས་དང་། བཙན་བྱོལ་བོད་མི་རྣམས་ནས་ཕྱི་ལོ་ ༡༩༧༢ ལོ་ནས་བཟུང་དང་བླངས་དཔྱ་དངུལ་འབུལ་འགོ་བཙུགས་པ། བོད་མི་ཚང་མས་དང་བླངས་དཔྱ་དངུལ་འབུལ་དགོས་པའི་གལ་གནད་སོགས་ཀྱི་སྐོར་གསུངས། ཐེངས་འདིར་བོད་མི་གྲངས་ ༥༠ ལ་དང་བླངས་དཔྱ་དངུལ་ལག་དེབ་གསར་པ་བཟོས་པ་དང་། བོད་མི་གྲངས་ལྔ་བཅུའི་དང་བླངས་དཔྱ་དངུལ་ལག་དེབ་བསྐྱར་བཅོས་གནང་ཐུབ་ཡོད། དེ་དག་ལ་བརྟེན་ནས་ཡུ་རོབ་སྒོར་ ༣༠༠༠༠ ཐམ་པ་བསྡུ་ཐུབ་ཡོད། དེ་བཞིན་བེལ་ཇི་ཡམ་གྱི་གྲོང་ཁྱེར་ཨོ་སི་ཊན་ཌེ་ (Ostende) དང་། བྷི་རུ་ཇི་ (Brugge) ལུ་ཝན་ (Lueven) བཅས་ཀྱི་ནང་དེ་ལྟ་བུའི་ལས་འགུལ་སྤེལ་ཡོད་པ་བཅས།།