༢༠༡༡ ཟླ་ ༩ ཚེས་ ༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༣༡ རེས་གཟའ་ལྷག་པའི་ཕྱེད་ཡོལ་ཆུ་ཚོད་ ༦ ཐོག་གངས་སྐྱིད་ལས་བྱེད་གསོལ་ཐབ་ཁང་དུ་བོད་དང་རྒྱ་དཀར་ནག་སྐོར་གྱི་བགྲོ་གླེང་ཚོགས་འདུ་ཞིག་ཚོགས་ཡོད།
སྐབས་དེར་སྐུ་མགྲོན་གཙོ་བོ་རྒྱ་གར་ཨར་ཨེ་སི་ཨེ་སི་(RSS)ཚོགས་པའི་དབུ་ཁྲིད་ཨིན་དྷི་རེ་ཤི་ཀུ་མར་མཆོག་(Indresh Kumar)དང་དམིགས་བསལ་སྐུ་མགྲོན་བཀའ་ཁྲི་བློ་བཟང་སེང་གེ་མཆོག དེ་བཞིན་ལྷན་ཚོགས་ཀྱི་ཚོགས་གཙོ་ཧི་མ་ཅལ་མངའ་སྡེའི་འཕྲོད་བསྟེན་བློན་ཆེན་སྐུ་ཞབས་ར་ཇིབ་བྷིན་ཌལ་(Rajiv Bindal) མཆོག་བཅས་ཀྱིས་བོད་དང་རྒྱ་གར། རྒྱ་ནག་ཡུལ་གྲུ་གསུམ་གྱི་ཆབ་སྲིད་དང་དཔལ་འབྱོར། དམག་ཀྱི་སྟོབས་ཤུགས། མི་འབོར། ཆོས་དང་རིག་གཞུང་། ཁོར་ཡུག་གི་གནས་སྟངས་སོགས་ཀྱི་གནད་དོན་སྐོར་གསུང་བཤད་གནང་ཡོད།
དེ་ཡང་ཐོག་མར་སྐུ་མགྲོན་གསུམ་པོས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེའི་མདུན་དུ་སྣང་གསལ་ཞལ་ཕྱེ་གནང་རྗེས་ཐོག་མར་མངའ་སྡེའི་འཕྲོད་བསྟེན་བློན་ཆེན་མཆོག་གིས་གསུང་དོན། ད་ཆ་བཙན་བྱོལ་གཞུང་གི་སྒྲིག་འཛུགས་ཀྱི་འགན་དེ་བཀའ་ཁྲི་བློ་བཟང་སེང་གེ་མཆོག་གིས་འཁྱེར་བཞིན་ཡོད་པ་དང་། ཁོང་ནི་དེང་རབས་ཤེས་ཡོན་ཅན་གྱི་གཞོན་སྐྱེས་སྙིང་སྟོབས་ལྡན་པ་ཞིག་ཡིན། ཁོང་བཀའ་ཁྲིའི་དམ་འབུལ་རྗེས་དེ་རིང་ང་དང་ཐེངས་དང་པོ་ཐུག་པར་བརྟེན་ངས་ཁོང་ལ་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག་ཁོང་གི་དམིགས་ཡུལ་རྣམས་མྱུར་དུ་འགྲུབ་པའི་སྨོན་འདུན་ཞུ་རྒྱུ་ཡིན། བོད་དེ་ལོ་ངོ་སྟོང་གི་རིང་རང་བཙན་གཙང་མའི་རྒྱལ་ཁབ་ཅིག་ཡིན་པ་མ་ཟད། ཆོས་དང་རིག་གཞུང་གང་གི་ཆ་ནས་ཀྱང་རྒྱ་གར་དང་ཧ་ཅང་འབྲེལ་བ་ཆེན་པོ་ཡོད་ཅེས་སོགས་ཀྱི་གསུང་བཤད་གནང།
དེ་རྗེས་ཨིན་དྷི་རེ་ཤི་ཀུ་མར་མཆོག་གིས་བཙན་བྱོལ་བོད་མི་དང་རྒྱ་གར་ཡུལ་མི་དབར་གྱི་མཐུན་སྒྲིལ་གལ་ཆེ་ཚུལ་དང། རྒྱ་དཀར་ནག་གི་ས་མཚམས་སྐོར། བོད་དེ་བཞིན་རང་བཙན་གཙང་མའི་རྒྱལ་ཁབ་ཅིག་ཡིན་པའི་བྱུང་རབས་ལོ་རྒྱུས། དེ་བཞིན་དེང་སྐབས་ལྷོ་ཨ་ཕི་རི་ཀ་དང་དཀྱིལ་ཤར་ཡུལ་གྲུའི་ནང་གཅིག་བསྡུས་དབང་འཛིན་ལམ་ལུགས་ལ་མི་མང་གིས་ངོ་རྒོལ་བྱས་ཏེ་མང་གཙོའི་ལམ་བཟང་ཐོག་སྐྱོད་བཞིན་ཡོད་པའི་གསར་བརྗེ་ཆེན་པོ་དང་འབྲེལ། བོད་མི་ཚོར་༸གོང་ས་ཏཱ་ལའི་བླ་མ་མཆོག་གིས་ཆབ་སྲིད་ཀྱི་སྐུ་དབང་རྣམས་རྩིས་སྤྲོད་མཛད་དེ་ཡང་དག་པའི་མང་གཙོའི་ལམ་བཟང་གསར་གཏོད་མཛད་པའི་རླབས་ཆེན་གྱི་མཛད་རྗེས་ལ་བསྔགས་བརྗོད་ཞུས་ཡོད་པ་མ་ཟད།
བོད་དང་རྒྱ་གར་གཉིས་ལོ་ངོ་སྟོང་རིང་བླ་སློབ་ཀྱི་འབྲེལ་བ་ཡོད་པར་བརྟེན། བཙན་བྱོལ་བོད་མི་ཚོས་རྒྱ་གར་ནང་ཕྱི་མི་ཡིན་བསམ་ནམ་ཡང་མ་དྲན་པར་སེམས་ཐག་ཉེ་པོའི་ཐོག་ནས་འཚོ་གནས་ཐུབ་པ་ཞིག་རྒྱ་གར་གཞུང་མང་གཉིས་ཀྱིས་བཟོ་དགོས་ཞེས་དང། དེ་བཞིན་རྒྱ་གར་གྱི་སྲིད་བློན་སྐུ་ཞབས་ནེ་རུས་བོད་དེ་རྒྱ་ནག་གི་མངའ་ཁོངས་ཡིན་པའི་ཆབ་སྲིད་ཀྱི་ལངས་ཕྱོགས་ནོར་བ་དེར་ད་ཆ་རྒྱ་གར་གཞུང་གིས་བསྐྱར་ཞིབ་བྱ་རྒྱུའི་དུས་ལ་བབས་ཡོད་ཅེས་དང། རྒྱ་གར་གཞུང་གིས་བཙན་བྱོལ་བོད་མིའི་སྒྲིག་འཛུགས་དེར་བོད་གཞུང་དུ་ངོས་འཛིན་གནང་དགོས་པའི་འབོད་སྐུལ་ཡང་ཞུས་ཡོད།
ཕྱོགས་མཚུངས་སྐབས་དེར་བཀའ་ཁྲི་བློ་བཟང་སེང་གེ་མཆོག་གིས་དེང་སྐབས་རྒྱ་ནག་གཞུང་གིས་བོད་ནང་མེ་འཁོར་དང་གནམ་ཐང་སོགས་བརྒྱབ་དང་རྒྱག་བཞིན་ཡོད་པ་མ་ཟད། བལ་ཡུལ་ནང་དེང་སྐབས་རྒྱ་མི་ཇེ་མང་ཇེ་མང་དུ་འགྲོ་བཞིན་ཡོད་པར་བརྟེན། རྒྱ་གར་གྱི་བདེ་འཇགས་ལ་ཉེན་ཁ་སླེབ་བཞིན་ཡོད། དེར་བརྟེན་རྒྱ་གར་གཞུང་ནས་བོད་ཀྱི་གནད་དོན་དེ་རྒྱལ་ཁབ་ཀྱི་གནད་དོན་གཙོ་བོ་ཞིག་ཏུ་ངོས་འཛིན་བྱེད་དགོས་པའི་བསམ་ཚུལ་ཡང་བཏོན་ཡོད། དེ་བཞིན་བཀའ་ཁྲི་མཆོག་གིས་སྐབས་དེར་བོད་ཀྱི་གནད་དོན་མྱུར་དུ་སེལ་ཏེ་གཞིས་བྱེས་བོད་མི་མཉམ་འཛོམས་ཐུབ་རྒྱུའི་རེ་བ་ཡོད་སྐོར་གསུངས་པ་དང་སྦྲགས། དེ་སྔ་ཨུ་རུ་སུ་སྤྱི་མཐུན་རྒྱལ་ཁབ་དང་ཇར་མན་ཤར་ནུབ་གཉིས་ཟླ་སྒྲིལ་ཐུབ་ཚུལ། དེང་སྐབས་ལྷོ་ཨ་ཕི་རི་ཀའི་ནང་མང་གཙོའི་འབོད་སྒྲ་ཕྱུར་བཞིན་ཡོད་པ། དེ་བཞིན་ཨ་རབ་དང་ཤར་ཡུ་རོབ་སོགས་འཛམ་གླིང་ཁྱོན་ཡོངས་སུ་མང་གཙོ་དོན་དུ་གཉེར་བཞིན་ཡོད་པའི་ལུང་འདྲེན་ཡང་གནང་ཡོད། ལྷན་ཚོགས་དེ་བཞིན་ཧི་མ་ལ་ཡ་པ་རི་བར་ཞེས་པའི་ཧི་མ་ཅལ་མངའ་སྡེའི་ནང་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་པ་དེས་གོ་སྒྲིག་གནང་བ་ཞིག་ཡིན་འདུག་པ་ཅས།།
བོད་དང་རྒྱ་དཀར་ནག་སྐོར་གྱི་བགྲོ་གླེང་ཚོགས་འདུ་ཚོགས་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)