༄༅། །ཕྱི་ལོ་ ༢༠༢༡ ཟླ་ ༩ ཚེས་ ༡༡ ཉིན་བེལ་ཇི་ཡམ་བརྩེ་ཆེན་ཚོགས་པའི་གོ་སྒྲིག་འོག་དཔལ་ས་སྐྱ་ཕུན་ཚོགས་ཕོ་བྲང་གི་གདུང་སྲས་ཨ་སངྒ་བཛྲ་རིན་པོ་ཆེ་དབུ་བཞུགས་ཐོག་འཁོན་རིགས་བསྟན་པའི་མངའ་བདག་སྐྱབས་མགོན་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་རིན་པོ་ཆེ་མཆོག་དགུང་གྲངས་དོན་བདུན་ལ་ཕེབས་པའི་འཁྲུངས་སྐར་དུས་ཆེན་བེལ་ཇི་ཡམ་གྱི་གྲོང་ཁྱེར་ཨན་ཌི་ཝབ་ (Antwerp) ནང་སྲུང་བརྩི་གཟབ་རྒྱས་ཞུས་ཡོད་པ་དང་། སྐབས་དེར་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་མཉམ་ཞུགས་གནང་ཡོད།
དེ་ཡང་འཁོན་གདུང་ཨ་སངྒ་བཛྲ་རིན་པོ་ཆེ་མཆོག་གིས་བེལ་ཇི་ཡམ་བརྩེ་ཆེན་ཚོགས་པ་ནས་ཇི་ལྟར་གསོལ་འདེབས་ཞུས་དོན་ལྟར་ཏོག་དབྱིབས་གཉན་རིམས་འདི་ཉིད་མགྱོགས་མྱུར་ཞི་སླད་དད་ལྡན་ཆོས་ཞུ་བ་ཡོངས་ལ་གྲུབ་ཐོབ་ཐང་སྟོང་རྒྱལ་པོའི་རྡོ་རྗེའི་གསུང་ནད་ཀྱི་འཇིགས་པ་ཞི་བའི་གསོལ་འདེབས་ས་སྐྱ་ནད་གྲོལ་མའི་ལྗགས་ལུང་གནང་ཡོད། འཁོན་གདུང་ཨ་སངྒ་བཛྲ་རིན་པོ་ཆེ་མཆོག་དང་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་རྣམ་གཉིས་ནས་མངར་ཟས་ཀེཀ་ (Cake) གཏུབས་ཏེ་འཁོན་རིགས་བསྟན་པའི་མངའ་བདག་སྐྱབས་མགོན་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་རིན་པོ་ཆེ་མཆོག་དགུང་གྲངས་དོན་བདུན་ལ་ཕེབས་པའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད།
མཛད་སྒོར་ས་གནས་བོད་རིགས་གཞོན་སྐྱེས་རྣམས་ཀྱིས་བོད་ཀྱི་སྲོལ་རྒྱུན་གཞས་སྣ་འཁྲབ་སྟོན་གཟིགས་འབུལ་ཞུས་ཡོད། གོང་ཚེས་ཉིན་གྱི་སྔ་དྲོ་འཁོན་གདུང་ཨ་སངྒ་བཛྲ་རིན་པོ་ཆེ་མཆོག་གིས་དད་ལྡན་མང་ཚོགས་ལ་ཆོས་འབྲེལ་དང་ཚེ་དབང་བཀའ་དྲིན་གནང་ཡོད། སྐབས་དེར་དད་ལྡན་མང་ཚོགས་ཕོན་ཆེན་བཅར་ཡོད་པ་བཅས།།
བེལ་ཇི་ཡམ་ནང་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་རིན་པོ་ཆེ་མཆོག་དགུང་གྲངས་དོན་བདུན་ལ་ཕེབས་པའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)