༢༠༡༡ ཟླ་ ༨ ཚེས་ ༢༥ རེས་གཟའ་ཕུར་བུ།
༄༅། །༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་རྒྱལ་ཁབ་སུད་སི་དང་ཕ་རན་སི། ཨི་སི་ཊོ་ནི་ཡ། ཕིན་ལན་ཌི། ཇར་མན་ནི་བཅས་ཀྱི་ནང་མཛད་འཕྲིན་རྒྱ་ཆེ་བསྐྱངས་ཏེ་ཕྱི་ཚེས་ ༢༥ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་གྷ་གལ་གནམ་ཐང་དུ་༸ཞབས་སོར་འཁོད་སྐབས་བཀའ་ཁྲི་བློ་བཟང་སེང་གེ་མཆོག་དང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དེ་བཞིན་གཞུང་འབྲེལ་མཛད་གཙོ་རྣམ་པ་བཅར་ཏེ་ཕེབས་བསུ་གཟབ་རྒྱས་ཞུས་ཡོད། དེ་རྗེས་ཆུ་ཚོད་ ༡༠ ཡོལ་ཙམ་ལ་བཞུགས་སྒར་ཕོ་བྲང་གི་རྒྱལ་སྒོའི་མདུན་དུ་༸ཞབས་སོར་འཁོད་སྐབས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་པ་ཆེ་བ་མཆོག་གིས་གཙོས་ཁྲིམས་ཞིབ་པ་གཞན་གཉིས། དེ་བཞིན་དད་ལྡན་སེར་སྐྱ་མང་ཚོགས་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་ཡང་ཕྱི་ལོ་ ༢༠༡༡ ཟླ་ ༨ ཚེས་ ༡༡ ཉིན་༸གོང་ས་མཆོག་སུད་སི་གྲོང་ཁྱེར་ཇི་ནི་ཝར་༸ཞབས་སོར་བདེ་བར་འཁོད་རྗེས་གྲོང་ཁྱེར་ཛུ་རིཀ་ཏུ་ཆིབས་སྒྱུར་བསྐྱངས་ཏེ་ས་གནས་བོད་མི་ཚོར་མཇལ་ཁ་དང་ཊི་ཨེ་སི་ཨར་(TSR)ཞེས་པའི་གསར་ཁང་གི་གསར་འགོད་པའི་དྲི་བར་བཀའ་ལན་མཛད་པ་དང་སྦྲགས། སུད་སི་གཞུང་མང་གཉིས་ནས་བཙན་བྱོལ་བོད་མི་ཚོར་ད་བར་རོགས་རམ་གནང་བར་ཐུགས་རྗེ་ཆེ་ཞུས་གནང་མཛད།
ཕྱི་ཚེས་ ༡༢ ཉིན་༸གོང་ས་མཆོག་ཕ་རན་སིའི་ལྷོ་ཕྱོགས་མོན་ཊེ་སལ་(Mont Saleve)ཞེས་པར་ཆིབས་སྒྱུར་བསྐྱངས་ཏེ་རུ་སུའི་གྲོས་ཚོགས་ཀྱི་འཐུས་མི་སྐུ་ཞབས་ར་ཡི་ཕེལ་ཇི་མ་ལོབ་(Mr.Raefel Gimalov)ཡིས་མཐུན་འགྱུར་གནང་བའི་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་གི་བཤད་སྒྲུབ་ཆོས་འཁོར་གླིང་ཆོས་ཚོགས་གསར་བཞེངས་ལེགས་གྲུབ་བྱུང་བར་དབུ་འབྱེད་རབ་གནས་བཀའ་དྲིན་བསྐྱངས་པ་མ་ཟད། ཕྱི་ཚེས་ ༡༣ /༡༤ བཅས་ཉིན་གྲངས་གཉིས་རིང་ཉེ་འགྲམ་གྱི་གྲོང་ཁྱེར་ཏོ་ལོ་སེའི་(Toulouse) ནང་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་མའི་བཀའ་ཆོས་སྩལ།
ཕྱི་ཚེས་ ༡༥ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཏོ་ལོ་སིའི་ཛེ་ནི་ཐིའི་ཚོགས་ ཁང་ཆེན་མོའི་ནང་མང་ཚོགས་ཆིག་ཁྲི་བརྒལ་བར་ཆོས་ལུགས་རིས་མེད་ཀྱི་ལྟ་གྲུབ་ལ་གཞི་བཅོལ་བའི་བཟང་སྤྱོད། ཅེས་པའི་བརྗོད་གཞིའི་ཐོག་བཀའ་སློབ་སྩལ།
ཕྱི་ཚེས་ ༡༦ ཉིན་༸གོང་ས་མཆོག་ཨི་སི་ཊོ་ནི་ཡའི་(Estonia)རྒྱལ་ས་ཊ་ལིན་(Tallinn)དུ་༸ཞབས་སོར་བདེ་བར་འཁོད་དེ་ཕྱི་ཚེས་ ༡༧ ཉིན་ཨི་སི་ཊོ་ནི་ཡའི་སྲིད་འཛིན་ཐོ་མ་སི་ཧེན་ཌི་རིཀ་(Toomas Hendrick IIves) མཆོག་དང་མཇལ་འཕྲད་མཛད་པ་མ་ཟད། ལི་བྷར་ཊི་སི་ཁེ་ཡར་(Liberty Square) ཞེས་པའི་ས་གནས་དེར་ཡུལ་མི་སྟོང་ཕྲག་བརྒལ་བར་ཀུན་ཁྱབ་འགན་འཁུར། ཞེས་པའི་བརྗོད་གཞིའི་ཐོག་བཀའ་སློབ་སྩལ།
ཕྱི་ཚེས་ ༡༧ ཉིན་རྒྱབ་༸གོང་ས་མཆོག་ཕིན་ལན་ཌིར་ཆིབས་སྒྱུར་བསྐྱངས། ཕྱི་ཚེས་ ༡༨ ཉིན་ཁུལ་དེའི་ཊར་ཊུ་གཙུག་ལག་སློབ་གྲྭས་༸གོང་ས་མཆོག་ལ་མཁས་དབང་གི་ཕྱག་འཁྱེར་འབུལ་ལམ་ཞུས།
ཕྱི་ཚེས་ ༡༩ ཉིན་༸གོང་ས་མཆོག་གིས་ཕིན་ལན་ཌིའི་རྒྱལ་ས་ཧེལ་སིང་ཀིའི་ནང་ཚོང་ལས་ནང་བཟང་སྤྱོད་གལ་ཆེ་ཚུལ་(Ethics in Bussiness) ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་ཆེ་བ་སྩལ་བ་མ་ཟད། ཧེལ་སིང་ཀིའི་གཙུག་ལག་སློབ་གཉེར་ཁང་གིས་གོ་སྒྲིག་འོག་བོད་མིའི་འཐབ་རྩོད་ལ་མིག་དཔེར་བཟུང་སྟེ་འཚེ་མེད་ཞི་བའི་སྒོ་ནས་རྩོད་རྙོག་འདུམ་འགྲིག་བྱེད་ཚུལ་ཞེས་པའི་ལྷན་ཚོགས་སུ་ཆིབས་སྒྱུར་བསྐྱངས་ཏེ་བཀའ་སློབ་སྩལ།
ཕྱི་ཚེས་ ༢༠ ཉིན་༸གོང་ས་མཆོག་གིས་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་བཀའ་ཆོས་སྩལ། ཉིན་རྒྱབ་ཧེལ་སིང་ཀའི་ཉེ་འགྲམ་དུ་ཡོད་པའི་གྲོང་ཁྱེར་ཨི་སི་པུའི་(Espoo)བྷ་རོ་ན་ཚོགས་ཁང་(Barona Arena) དུ་མང་ཚོགས་ ༧༠༠༠ བརྒལ་བར་བྱམས་བརྩེའི་ནུས་སྟོབས་ཞེས་པའི་བརྗོད་གཞིའི་ཐོག་བཀའ་སློབ་སྩལ།
ཕྱི་ཚེས་ ༢༡ ཉིན་༸གོང་ས་མཆོག་ཇར་མན་དུ་ཆིབས་སྒྱུར་བསྐྱངས་ཏེ་གྲོང་ཁྱེར་ཧམ་བྷག་ནང་དྲན་པ་ཉེར་བཞག་ཐོག་བློ་སྦྱོང་གི་ཉམས་ལེན་བྱེད་ཚུལ་སྐོར་གྱི་རྒྱལ་སྤྱིའི་ལྷན་ཚོགས་ཀྱི་མཇུག་བསྡོམས་མཛད་སྒོར་བཀའ་སློབ་སྩལ།
ཕྱི་ཚེས་ ༢༢ ཉིན་ཇར་མན་ཧེ་སེ་(Hesse State Government)མངའ་སྡེའི་གཞུང་ནས་ཇི་ལྟར་གསོལ་འདེབས་ཞུས་དོན་ལྟར་ཕ་རན་ཕོ་ཊ་(Frankfurt)གྷོ་ཐེ་གཙུག་ལག་སློབ་གྲྭར་(Goethe University) ཆིབས་སྒྱུར་བསྐྱངས་ཏེ་འགྲོ་བ་མིའི་བཟང་སྤྱོད་ཀྱི་རིན་ཐང་དང་དབུ་ཁྲིད་ཀྱི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་སྩལ།
ཕྱི་ཚེས་ ༢༣ ཉིན་གྱི་ཕྱེད་ཡོལ་༸གོང་ས་མཆོག་ཧེ་སེ་མངའ་སྡེའི་གྲོས་ཚོགས་སུ་ཆིབས་སྒྱུར་བསྐྱངས་ཏེ་བཀའ་སློབ་སྩལ།
དེ་ཡང་༸གོང་ས་མཆོག་གིས་ཐེངས་འདིའི་ཡུ་རོབ་རྒྱལ་ཁབ་ལྔའི་ནང་གི་མཛད་འཕྲིན་སྐབས་མི་མང་དང་སློབ་ཕྲུག གསར་འགོད་པ། རྒྱ་རིགས། སོག་རིགས། བོད་རིགས། གྲོས་ཚོགས་ཀྱི་འཐུས་མི། བོད་དོན་རྒྱབ་སྐྱོར་བ། དབང་པོ་སྐྱོན་ཅན། མངའ་སྡེའི་སྲིད་འཛིན་དང་སྲིད་བློན་བཅས་ལ་མཇལ་ཁ་དང་ཆོས་འབྲེལ། བཀའ་སློབ་བཅས་ལེགས་པར་གྲུབ་སྟེ་ཞུགས་སྒར་དུ་༸ཞབས་སོར་བདེ་བར་འཁོད་ཡོད།
