༄༅། །ཕྱི་ལོ་ ༢༠༢༡ ཟླ་ ༨ ཚེས་ ༡༧ ནས་ ༢༣ བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་གྲངས་ཐོ་ཚན་པས་དྲ་ལམ་བརྒྱུད་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ ༣༣ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་བདུན་གྱི་ས་གནས་འཕྲོད་བསྟེན་སྨན་ཁང་གི་འགན་འཛིན་དང་། སྨན་ཞབས་པ། འཕྲོད་ལས་པ་བཅས་ཁྱོན་མི་གྲངས་ ༥༨ ལ་འཕྲོད་བསྟེན་དང་འབྲེལ་བའི་གྲངས་ཐོ་བཀོལ་སྤྱོད་མཉེན་ཆས་ (OpenMRS and DHIS2) བེད་སྤྱོད་གཏོང་ཕྱོགས་སྐོར་ཟབ་སྦྱོང་ཞིག་གོ་སྒྲིག་གནང་ཡོད།

དེ་ཡང་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་ཀྱིས་མཉམ་ཞུགས་པ་རྣམས་ལ་ཐེངས་འདིའི་ཟབ་སྦྱོང་གི་གལ་གནད་སྐོར་གསུང་བཤད་གནང་ཡོད། རྒྱ་གར་གྱི་འཕྲོད་བསྟེན་གྲངས་ཐོ་ཚན་པས་དྲ་ལམ་བརྒྱུད་ཟབ་སྦྱོང་གནང་། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་རྒྱ་གར་གྱི་འཕྲོད་བསྟེན་གྲངས་ཐོ་ཚན་པ་མཉམ་འབྲེལ་གྱིས་གྲངས་ཐོ་བཀོལ་སྤྱོད་མཉེན་ཆས་མ་ལག་དང་བཅས་པ་ལག་བསྟར་གནང་བཞིན་ཡོད།

ད་ལྟའི་ཆར་གྲངས་ཐོ་བཀོལ་སྤྱོད་མཉེན་ཆས་ (OpenMRS ) འདི་ཉིད་སྦིར་དང་། བདེ་སྐྱིང་གླིང་། སྦེལ་ཀོབ། ཧུན་སུར་རབ་རྒྱས་གླིང་། ཀོ་ལེ་གྷལ་དོན་ལྡན་གླིང་། མོན་གྷོ་འདོད་རྒུ་གླིང་བཅས་སུ་བེད་སྤྱོད་གནང་བཞིན་ཡོད་པ་དང་། གྲངས་ཐོ་བཀོལ་སྤྱོད་མཉེན་ཆས་ (DHIS2) ཞེས་པ་འཕྲོད་བསྟེན་ལས་ཁུངས་ནས་ས་གནས་འཕྲོད་བསྟེན་སྨན་ཁང་གཞན་ཁག་གི་ནང་བེད་སྤྱོད་གནང་བཞིན་ཡོད་པ་བཅས།།