༢༠༡༡ ཟླ་ ༨ ཚེས་ ༡༧ རེས་གཟའ་ལྷག་པ།
༄༅། འདི་གར་ཕྱི་ལོ་ ༢༠༡༡ ཟླ་ ༨ ཚེས་ ༡༧ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན་ དེ་རིང་བོད་ནང་གི་ཞོགས་པའི་ཆུ་ཚོད་ ༧ ཙམ་ལ་ཕྱི་ཟླ་ ༨ ཚེས་ ༡༥ ཉིན་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ངོ་རྒོལ་གནང་མཁན་རྒྱལ་གཅེས་པ་རྟའུ་ཉ་མཚོ་དགོན་པའི་གྲྭ་ཚེ་དབང་ནོར་བུ་ལགས་ཀྱི་སྐུ་ཕུང་དགོན་པའི་ཉེ་འཁྲིས་སུ་ཞུགས་འབུལ་བྱས་ཡོད་པ་དང་།  ཞུགས་འབུལ་བྱེད་སྐབས་རྒྱ་མིའི་ཉེན་རྟོག་མི་སྣས་ཉ་མཚོ་དགོན་པའི་དགེ་འདུན་པ་ཁོ་ན་མ་གཏོགས་གཞན་ཚང་མ་བཀག་འགོག་བྱས་པ་མ་ཟད།  ཐ་ན་ཞུགས་འབུལ་བྱ་ཡུལ་གྱི་མཐའ་བསྐོར་ཡོངས་རྫོགས་དྲག་ཆས་དམག་མིས་བསྐོར་བ་རིམ་པ་གསུམ་ཙམ་བསྐོར་ཏེ་ཞུགས་འབུལ་བྱེད་དུ་བཅུག་སྟེ་རྒྱུན་གཏན་གྱི་ཕུང་པོ་ཞུགས་འབུལ་བྱེད་ས་དེར་བཏང་མེད་ཀྱང་།  དགོན་པའི་དགེ་འདུན་པ་ཚོས་ཕུང་པོ་ཞུགས་འབུལ་བྱ་རྒྱུ་འདི་ནི་མི་སྤྱིར་བཏང་ཞུགས་འབུལ་བྱས་པ་དང་མི་འདྲ་བར་དགོན་པའི་ཉེ་འཁྲིས་ཤིག་ཏུ་ཞུགས་འབུལ་བྱས་ཡོད་འདུག་ཅིང་།  སྐབས་དེར་བྲག་དཀར་བཙུན་དགོན་གྱི་བཙུན་མ་ཁག་ཅིག་ནས་ཕུང་པོ་ཞུགས་འབུལ་བྱ་ཡུལ་དུ་ཡོང་སྐབས་ལམ་བར་དྲག་ཆས་དམག་མིས་བཀག་འགོག་བྱས་རྐྱེན་བཙུན་མ་ཚོས་མི་འདོད་པའི་རྣམ་འགྱུར་ཤུགས་ཆེ་བསྟན་ཡོད་པའི་གནས་ཚུལ་ཐོན་འདུག
ད་ལྟ་རང་ལོ་ ༢༩ ཙམ་དུ་སོན་པའི་རྒྱལ་གཅེས་པ་དམ་པ་གྲྭ་ཚེ་དབང་ནོར་བུ་ལགས་ནས་ཕྱི་ཟླ་ ༨ ཚེས་ ༡༥ ཉིན་གྱི་ཉིན་དགུང་ཆུ་ཚོད་ ༡༢།༣༠ ཙམ་དུ་ཁྲོམ་གཞུང་དུ་རང་ལུས་མདེར་བསྲེགས་དང་འབྲེལ་༸གོང་ས་མཆོག་བོད་ལ་གདན་འདྲེན་ཞུ་དགོས།  བོད་རང་བཙན་ཡིན་སོགས་ཀྱི་འབོད་ཚིག་བསྒྲགས་ཏེ་སྐར་མ་བཅུ་ལྷག་ཙམ་རིང་སྐད་འབོད་བྱས་རྗེས་འདས་གྲོངས་ཕྱིན་རྗེས་ཕྱི་ཚེས་ ༡༥ དགོང་མོ་ནས་ས་གནས་སུ་ཁ་དཔར་འབྲེལ་ལམ་བཅད་པ་དང་།  ཕྱི་ཚེས་ ༡༦ ཉིན་སློབ་གྲྭ་དང་ཚོང་ཁང་སོགས་ཆ་ཚང་སྒོ་བརྒྱབ་བཅུག་པ་མ་ཟད།  དམག་མི་ཁྱོན་ཆེ་འབྱོར་ཏེ་དམ་བསྒྲགས་ཆེན་པོ་བྱས་ཡོད་ཅིང་།  དེ་ཉིན་དཀར་མཛེས་ཁུལ་གྱི་ཧྲུའུ་ཅི་ལིའུ་ཏའོ་པིང་རྟའུ་ཉ་མཚོ་དགོན་དུ་འབྱོར་ཏེ་སྐུ་ཕུང་དགོན་པར་ཉར་མི་ཆོག་པའི་བཙན་བཀའ་བཏང་བའི་གནས་ཚུལ་ཡང་ཐོན་ཡོད་འདུག་ཀྱང་མཐར་དགོན་པའི་ཉེ་འཁྲིས་སུ་བཞུ་འབུལ་བྱ་ཐུབ་པ་བྱུང་ཡོད།  རྟའུ་རྫོང་ཁོངས་སུ་ཕྱི་ལོ་ ༢༠༠༨ ལོ་ནས་ཞི་རྒོལ་གྱི་ལས་འགུལ་ཐོན་ཡོད་པ་མ་ཟད།  ལྷག་པར་ཕྱི་ལོ་ ༢༠༡༠ ཟླ་ ༩ ཙམ་རྟའུ་རྫོང་དུ་ཧྲུའུ་ཅི་གསར་པ་ཞིག་བསྐོ་གཏོང་བྱས་པ་དངའབྲེལ་ལས་བྱེད་རྒས་ཡོལ་ཕྱིན་པ་རྣམས་ཆོས་ཕྱོགས་དང་འབྲེལ་བའི་བྱ་བ་སྤེལ་མི་ཆོག་པ་སོགས་ལས་བྱེད་དང་མང་ཚོགས་ཀྱི་འདོད་མོས་དང་མ་མཐུན་པའི་ལས་འགུལ་སྣ་ཚོགས་སྤེལ་བཞིན་པ་མ་ཟད།  རྟའུ་ཉ་མཚོ་དགོན་པར་རྒྱ་ནག་གཞུང་གི་རྒྱལ་དར་སྒྲེང་འཛུགས་བྱ་དགོས་པ་སོགས་ཀྱི་བཙན་བཀའ་བཏང་ཡོད་ཀྱང་།  དགོན་པའི་མཁན་རིན་པོ་ཆེ་སོགས་ནས་རྩ་བ་ནས་ཁས་ལེན་བྱས་མེད་པ་མ་ཟད།  དགོན་པའི་ངོས་ནས་ཁོར་ཡུག་སྲུང་སྐྱོབ་ཐད་དོ་སྣང་ཆེན་པོ་གནང་སྟེ་ཤིང་ནགས་གཅོད་དྲེགས་དང་གཏེར་ཁ་བསྔོག་འདོན་བྱ་རྒྱུ་སོགས་ཀྱི་ཐད་མང་ཚོགས་ལ་སློབ་གསོ་དང་།  ལྷག་པར་ཕྱི་ལོ་ ༢༠༡༡ ལོར་རྟའུ་རྫོང་གི་གནས་རི་ཞིག་ཏུ་གཏེར་ཁ་བསྔོག་འདོན་བྱ་འཆར་ཡོད་པར་དགོན་པའི་མཁན་རིན་པོ་ཆེ་སོགས་ནས་འབྲེལ་ཡོད་ལ་ཞུ་གཏུགས་བྱས་ཏེ་གཏེར་ཁ་བསྔོག་འདོན་བྱ་རྒྱུ་བཀག་འགོག་ཐུབ་པ་བྱུང་ཡོད་པ་དང་།  འདི་ལོ་ཕྱི་ཟླ་ ༧ པའི་ནང་༸གོང་ས་༸སྐྱབས་མགོན་ཆེན་པོའི་འཁྲུངས་སྐར་སྐབས་དམ་བསྒྲགས་ཤིན་ཏུ་ཆེན་པོ་བྱས་པ་མ་ཟད།  རྟའུ་ཉ་མཚོ་དགོན་དང་བཙུན་དགོན་བཅས་ལ་ཆུ་དང་གློག་བཀག་པའི་གནས་ཚུལ་ཐོན་པ་སོགས་རྒྱ་ནག་གཞུང་གིས་ཆེད་གཏོང་བྱས་པའི་དཔོན་རིགས་དེ་ཚོས་མང་ཚོགས་དང་དགེ་བཙུན་ཚོར་དམིགས་བསལ་སྡང་ཟུག་ཆེ་བའི་སྲིད་བྱུས་འདྲ་མིན་བཟུང་བཞིན་པར་བརྟེན་ད་ལྟ་རྟའུ་རྫོང་ཁོངས་སུ་སེར་སྐྱ་མང་ཚོགས་ཚོས་རྒྱ་ནག་གཞུང་གི་འཛིན་བཞིན་པའི་སྲིད་བྱུས་ལ་མི་འདོད་པའི་རྣམ་འགྱུར་ཤུགས་ཇེ་ཆེར་འགྲོ་བཞིན་ཡོད་ལ།  ད་ལྟའི་ཆར་རྟའུ་རྫོང་ཁོངས་སུ་ཉ་མཚོ་དགོན་པ་གཙོ་བོར་གྱུར་བའི་ས་གནས་ཁག་ཏུ་དྲག་ཆས་དམག་མི་ཁྱོན་ཆེ་བཀྲམས་ཏེ་དམ་བསྒྲགས་ཤིན་ཏུ་ཆེན་པོའི་འོག་ཕྱི་ཕྱོགས་སུ་འབྲེལ་བ་བྱ་རྒྱུར་དམ་བསྒྲགས་དེ་བས་བྱེད་བཞིན་ཡོད་པའི་གནས་ཚུལ་ཐོན་འདུག  །།