༄༅། །རྒྱ་ནག་གཞུང་གིས་ཀན་སུའུ་ཞིང་ཆེན་གྱི་ཁོངས་གཏོགས་སུ་ཡོད་པའི་མཁར་དམར་དགོན་པ་སྒོ་རྒྱག་དགོས་པ་དང་གྲྭ་བཙུན་རྣམས་སྐྱ་སར་འབབ་དགོས་པའི་བཙན་བཀའ་བཏང་འདུག་པར་བརྟེན་མཁར་དམར་དགོན་པའི་གྲྭ་བཙུན་རྣམས་ནས་ངུ་ངག་གིས་ཞི་བའི་ངོ་རྒོལ་གནང་ཡོད།

མཁར་དམར་དགོན་པ་ནི་ཀན་སུའུ་ཞིང་ཆེན་ཁ་ཆེ་མི་རིགས་རང་སྐྱོང་ཁུལ་ཉིང་ཤཱ་ཀྲའོ་ཡུང་ཅིན་རྫོང་ཤིས་ཧོ་གྲོང་བརྡལ་དུ་ཆགས་ཡོད་པ་དང་། དུས་རབས་ ༡༢ ནང་ས་སྐྱ་འགྲོ་མགོན་ཆོས་རྒྱལ་འཕགས་པས་རྒྱ་སྐྱེད་གནང་བ་ཞིག་ཡིན། སྤྱི་ཚོགས་གསར་འགྱུར་བརྒྱུད་ལམ་ཁག་གི་ནང་བརྙན་ཐུང་ཞིག་ཁྱབ་བཞིན་པའི་ནང་མཁར་དམར་དགོན་པའི་གྲྭ་བཙུན་རྣམས་ཀྱིས་ངུ་འབོད་ཆེན་པོའི་སྒོ་ནས་ཞི་བའི་ངོ་རྒོལ་གནང་ཡོད་པ་མ་ཟད། ཁོང་ཚོའི་འཕྲེད་དར་སྟེང་བཙན་དབང་གིས་དགེ་འདུན་པ་ཕྱིར་ཕུད་དང་སྐྱ་སར་འབབ་དགོས་ཟེར་བ་དེ་རྒྱལ་ཁབ་ཀྱི་ཁྲིམས་དང་འགལ་བ་རེད། ཅེས་འཁོད་ཡོད།མཁར་དམར་དགོན་པ་སྒོ་རྒྱག་དགོས་དོན་ནི། གསར་འགྱུར་བརྒྱུད་ལམ་ཁག་གི་ནང་འཁོད་པ་ལྟར་ན། ན་ནིང་རྒྱ་ནག་ཏུ་ཏོག་དབྱིབས་གཉན་རིམས་ཁྱབ་བརྡལ་བྱུང་སྐབས་མཁར་དམར་དགོན་པའི་བླ་མ་ཀུན་བཟང་འཕྲིན་ལས་ཆོས་ཀྱི་རྒྱལ་མཚན་མཆོག་གིས་ས་གནས་གང་སར་གནས་པའི་ཁོང་གི་སློབ་ཕྲུག་རྣམས་ཀྱི་ལག་ནས་རྒྱ་སྒོར་ཁྲི་སུམ་ཅུ་ཙམ་ཞལ་འདེབས་སུ་བསྡུས་ཡོད་སྟབས། ས་གནས་སྲིད་གཞུང་གིས་དགོན་པར་རྒྱ་སྒོར་ཕོན་ཆེན་དེའི་ཡོང་ཁུངས་སྐོར་འདྲི་རྩད་བྱས་ཡོད་པ་མ་ཟད། ལོ་རེའི་དགོན་པའི་ཡོང་འབབ་དང་ས་ཁང་ཕྱེད་ཀ་ས་གནས་སྲིད་གཞུང་ལ་སྤྲོད་དགོས་པའི་བཙན་བཀའ་བཏང་བར་མཁར་དམར་དགོན་པའི་ངོས་ནས་ཞལ་བཞེས་གནང་མེད་པར་བརྟེན། ས་གནས་སྲིད་གཞུང་གིས་མཁར་དམར་དགོན་པ་སྒོ་རྒྱག་དགོས་པ་དང་གྲྭ་བཙུན་རྣམས་སྐྱ་སར་འབབ་དགོས་པའི་བཙན་བཀའ་བཏང་བ་ཞིག་ཡིན་པའི་སྐོར་འཁོད་ཡོད།།