༄༅། །ཕྱི་ལོ་ ༢༠༢༡ ཟླ་ ༨ ཚེས་ ༥ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༡ དེ་སྤེལ་ཡོད་པ་དང་། གསལ་བསྒྲགས་གནང་མཁན་སྨན་པ་ཚེ་རིང་མཚམས་གཅོད་ལགས་དང་སྨན་པ་བསྟན་འཛིན་བརྩོན་འགྲུས་ལགས་རྣམ་གཉིས་ཡིན།
དེ་ཡང་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༣ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༦ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་གྲངས་ ༡༩ ནང་གི་བོད་མི་རང་ཁྱིམ་དུ་མི་གྲངས་ ༨༨༠ དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༧༥ བཅས་ཁྱོན་བསྡོམས་བོད་མི་གྲངས་ ༡༦༣༠ འགོག་དབྱེ་ཟུར་བཀག་ཐོག་བཞུགས་ཡོད།
ད་བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་དབུས་བོད་ཀྱི་སྨན་རྩིས་ཁང་ནས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་ ༤༡༦༡༨ ལ་རིན་མེད་བགོ་འགྲེམས་གནང་ཡོད། སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་འདིའི་ནང་མི་གྲངས་ ༡༠༨ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་གནང་ཐུབ་པ་བྱུང་ཡོད། ནད་ཡམས་ཁྱབ་བརྡལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༧ དང་བལ་ཡུལ་ནང་གི་ས་གནས་ ༣ བཅས་ཀྱི་བོད་མི་གྲངས་ ༡༢༠༡ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་གྲངས་ ༢༡༠༠༧ ལ་སྔོན་འགོག་སྨན་ཁབ་རིམ་པ་དང་པོ་དང་། མི་གྲངས་ ༢༨༧༢༦ ལ་སྔོན་འགོག་སྨན་ཁབ་རིམ་པ་དང་པོ་གཉིས་པ་གཉིས་ཀར་བརྒྱབ་ཟིན། ཕྱོགས་མཚུངས་བལ་ཡུལ་ནང་གི་བོད་མི་སྔོན་འགོག་སྨན་ཁབ་ (Covishield) རིམ་པ་དང་པོ་ཐོབ་ཟིན་པ་མི་གྲངས་ ༨༣༡ བྱུང་འདུག་པ་དང་། ཇོན་སན་དང་ཇོན་སན་ (Johnson & Johnson) ཞེས་པའི་སྔོན་འགོག་སྨན་ཁབ་ཐོབ་པ་མི་གྲངས་ ༢༠༣༩ ལ་ཐོབ་འདུག
འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༢༣༢ བྱུང་ཡོད་པ་ལས་སྐྱེས་པ་གྲངས་ ༡༤༩ དང་། བུད་མེད་གྲངས་ ༨༣དེའི་ནང་ནས་དགུང་ན་མཐོ་ཤོས་དེ་ ༩༢ དང་ཆུང་ཤོས་དེ་བྱིས་པ་མ་འབྱར་ཟླ་བ་ ༡ ཡིན། བློ་ཕམ་པའི་གནས་ཚུལ་ཞིག་ལ་བདུན་ཕྲག་འདིའི་ནང་ཏོག་དབྱིབས་གཉན་རིམས་ཀྱིས་རྐྱེན་པས་མི་གྲངས་ ༢ འདས་གྲོངས་སུ་གྱུར་ཡོད། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༥༩༤༨ དང་། དྲག་སྐྱེད་བྱུང་བ་མི་གྲངས་ ༥༣༥༤ ། འདས་གྲོངས་སུ་གྱུར་བ་མི་གྲངས་ ༡༤༠། ད་ལྟ་ནད་མནར་གསོ་བཅོས་བྱེད་བཞིན་པ་མི་གྲངས་ ༤༥༤ ཡོད།
མི་མང་ལ་ཐུགས་སྣང་ལམ་སྟོན་ཞུ་རྒྱུར། འདས་པའི་ལོ་གཅིག་དང་ཕྱེད་ཀ་ཙམ་གྱི་རིང་འཛམ་གླིང་ཁྱོན་ཡོངས་ལ་ཏོག་དབྱིབས་གཉན་རིམས་ཁྱབ་བརྡལ་ཤུགས་ཆེ་ཕྱིན་ཡོད་པ་མ་ཟད། ད་ལྟའི་ཆར་ཨ་རི་ནི་ནད་གཞི་ཕོག་མཁན་ཚད་མཐོ་ཤོས་དང་། གཉིས་པ་དེ་རྒྱ་གར་ཆགས་ཀྱི་འདུག རྒྱ་གར་ནང་འདས་པའི་ཆུ་ཚོད་ ༢༤ ནང་ནད་གཞི་གསར་པ་ཕོག་མཁན་མི་གྲངས་ ༤༢༩༨༢ དང་། ཉིན་རེར་ནད་གཞི་གསར་པ་ཕོག་མཁན་མི་གྲངས་སྟོང་ཕྲག་ ༣༠་་་༤༠ ཡས་མས་ཆགས་ཀྱི་འདུག ད་ལྟའི་ཆར་རྒྱ་གར་ནང་གི་མངའ་སྡེ་ཀེ་རལ་དང་། མཧཱ་རཱཥཊྲ། ཧི་མཱ་ཅལ། ཇམ་མུ་དང་། ཀཤ་མཱིར། པུ་ཌུ་ཅེ་རཱི། མི་ཛོ་རམ་སོགས་སུ་ནད་གཞི་གསར་པ་ཕོག་མཁན་གྱི་གྲངས་ཚད་མཐོ་རུ་འགྲོ་བཞིན་འདུག ཅེས་སོགས་གསུངས།
མཐར་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས་ལམ་སྟོན་གནང་དོན། སྤྱིར་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་བཟང་པོ་ལྟ་བུ་འདུག་ཀྱང་མངའ་སྡེ་ཁག་གཅིག་གི་ནང་དུ་དུང་ཡིན་ནའང་གནས་སྟངས་ལྗིད་པོ་ཆགས་ཡོད་འདུག ཧི་མཱ་ཅལ་མངའ་སྡེ་ལྟ་བུར་ཆ་མཚོན་ན་ཕྱི་ཚེས་ ༤ ཉིན་ནད་གཞི་གསར་པ་ཕོག་མཁན་མི་གྲངས་ ༤༣ དང་། འདས་གྲོངས་སུ་གྱུར་པ་མི་གྲངས་ ༤ བྱུང་སྟབས། ནད་ཡམས་ཀྱི་གནས་སྟངས་ཕྲན་བུ་ལྗིད་དུ་འགྲོ་བཞིན་ཡོད་པར་བརྟེན་ཧི་མཱ་ཅལ་མངའ་སྡེའི་ནང་ཕྱི་ནས་ཡོང་མཁན་ཚོར་ཆུ་ཚོད་ ༧༢ ནང་ཚུད་བརྟག་དཔྱད་བྱས་པའི་ཏོག་དབྱིབས་ནད་རྟགས་མེད་པའི་ངོས་སྦྱོར་ངེས་པར་དུ་དགོས་འདུག ཧི་མཱ་ཅལ་ནང་ཁུལ་ལ་འགྲུལ་བཞུད་བྱེད་མཁན་ཚོར་ངོས་སྦྱོར་འདི་རིགས་དགོས་ཀྱི་མི་འདུག བཀོད་ཁྱབ་འདི་ཉིད་ད་ལྟའི་ཆར་ཡུལ་སྐོར་སྤྲོ་འཆམ་པ་ཁོ་ནར་རེད་འདུག
དེ་བཞིན་བཙན་བྱོལ་བོད་མིའི་གཞིས་ཆགས་ཆེ་ཁག་ཀརནཱ་ཊཀ་མངའ་སྡེའི་ནང་ཆགས་ཡོད་སྟབས། ཀརནཱ་ཊཀ་མངའ་སྡེའི་ནང་ནད་གཞི་གསར་པ་ཕོག་མཁན་མི་གྲངས་ ༡༧༦༩ དང་མི་གྲངས་ ༣༠ འདས་གྲོངས་སུ་གྱུར་ཡོད། ཅེས་སོགས་གསུངས། །
