༄༅། །ཕྱི་ལོ་ ༢༠༢༡ ཟླ་ ༧ ཚེས་ ༡༣ རེས་གཟའ་མིག་དམར་ཉིན་ཨ་རིའི་གྲོས་ཚོགས་གོང་མས་ལྕམ་སྐུ་ཨུ་ཛི་ར་ཛེ་ཡ་ (Uzra Zeya ) མཆོག་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་གནས་རིམ་དུ་བསྐོ་གཞག་གནང་ཡོད། 

དེ་སྔ་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་ནས་ཨ་རིའི་བོད་དོན་དམིགས་བསལ་འབྲེལ་མཐུད་པའི་ལས་ཁུར་གཅིག་ལྕོགས་གནང་ཡོད།

དེ་ཡང་ལྕམ་སྐུ་ཨུ་ཛི་ར་ཛེ་ཡ་མཆོག་འདི་ལོའི་ཕྱི་ཟླ་ ༤ ནང་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་གནས་རིམ་གྱི་འོས་མི་ཁོངས་སུ་བདམས་ཐོན་བྱུང་སྐབས་ཁོང་གིས། རྒྱ་ནག་གཞུང་གིས་བོད་པ་དང་། ཡི་ཤུ། དེ་བཞིན་གྲངས་ཉུང་མི་རིགས་གཞན་སོགས་ལ་དྲག་གནོན་བྱེད་བཞིན་ཡོད་པའི་སྐོར་གསུངས་ཡོད།

གཞན་ཡང་ཁོང་གིས་རྒྱ་རིགས་དང་ལྷན་ཕྱག་ལས་གནང་བའི་ཉམས་མྱོང་དང་། དེ་བཞིན་ད་ལྟའི་ཆར་རྒྱ་ནག་གཞུང་གིས་ཡུ་གུར་མི་རིགས་རྩ་གཏོར་གཏོང་བཞིན་ཡོད་པ་སོགས་ཀྱི་སྐོར་གསུངས། ཕྱོགས་མཚུངས་ལྕམ་སྐུ་ཨུ་ཛི་ར་ཛེ་ཡ་མཆོག་གིས་དྲུང་ལས་ཀྱི་ལས་ཡུན་རིང་ཨ་རིའི་གྲོས་ཚོགས་ནས་གཏན་འབེབས་གནང་བའི་རྒྱལ་སྤྱིའི་མེག་ནི་སི་ཀི་ཁྲིམས། (Global Magnitsky Act) དང་། ཡུ་གུར་འགྲོ་བ་མིའི་ཐོབ་ཐང་གི་ཁྲིམས་སོགས་ལག་བསྟར་གནང་རྒྱུའི་ཐུགས་འདོད་ཡོད་པའི་སྐོར་གསུངས།

བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས། ལྕམ་སྐུ་ཨུ་ཛི་ར་ཛེ་ཡ་མཆོག་གི་ཤེས་ཚད་དང་ཉམས་མྱོང་ལ་གཞིགས་ན་ཁོང་ནི་ཨ་རིའི་བོད་དོན་དམིགས་བསལ་འབྲེལ་མཐུད་པ་ཞིག་ཆགས་ངེས་ཡིན་ཞིང་། ང་ཚོས་ཁོང་དང་ལྷན་མགྱོགས་མྱུར་ཕྱག་ལས་གནང་ཐུབ་པའི་རེ་སྒུག་ཞུ་བཞིན་ཡོད། ཅེས་གསུངས།

ལྕམ་སྐུ་ཨུ་ཛི་ར་ཛེ་ཡ་མཆོག་ནི། དེ་སྔ་ཨོ་བྷ་མ་སྲིད་གཞུང་སྐབས་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་ལས་དོན་ཚན་པའི་དྲུང་ཆེ་ལས་རོགས་ཀྱི་ལས་ཚབ་ཀྱི་ཕྱག་ལས་གནང་མྱོང་ཡོད། ཁོང་ནི་ཨ་རིའི་ཕྱི་སྲིད་ལྷན་ཁང་གི་དྲུང་ལས་གནས་རིམ་ཐོག་ཕྱག་ལས་གནང་མཁན་ཨེ་ཤི་ཡའི་མི་རིགས་ཤིག་ཨ་རིའི་མི་སེར་ཡིན་པ་ཐེངས་དང་པོ་དེ་ཆགས་ཀྱི་ཡོད། །