༄༅། །ཕྱི་ལོ་ ༢༠༢༡ ཟླ་ ༧ ཚེས་ ༦ ཉིན་འབུམ་སྡེ་ལ་བོད་མིའི་གཞིས་ཆགས་སུ་༸སྐུའི་འཁྲུངས་སྐར་གོ་སྒྲིག་ཚོགས་ཆུང་ནས་ལྷར་བཅས་སྲིད་ཞིའི་གཙུག་རྒྱན་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཐམས་ཅན་མཁྱེན་ཅིང་གཟིགས་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་དྲུག་ལ་ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད།དེ་ཡང་༸སྐུའི་འཁྲུངས་སྐར་གྱི་མཛད་སྒོ་ཐོག་ཐུབ་མཆོག་དགའ་ཚལ་གླིང་དགོན་པའི་གུ་རུ་སྤྲུལ་སྐུ་རིན་པོ་ཆེ་མཆོག་དང་། དགོན་རྩེ་དགའ་ལྡན་རབ་རྒྱས་གླིང​་གི་མཁན་རིན་པོ་ཆེ་མཆོག སྐུ་མགྲོན་གཙོ་བོ་མངའ་སྡེའི་གྲོས་ཚོགས་འཐུས་མི་ (Dongru Siongju) ལགས། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ཁེར་མེ་ལགས། འབུམ་སྡེ་ལའི་རྫོང་དཔོན་ཀརྨ་ལེགས་སྐྱེས་ལགས་དང་རྫོང་དཔོན་གཞོན་པ་སངས་མཁའ་འགྲོ་ལགས། རྟ་དབང་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་བརྟན་ལགས། འབུམ་སྡེ་ལ་ས་གནས་འགོ་འཛིན་ལས་ཁུངས་ཀྱི་ལས་དྲུང་ཚེ་ལྷ་ལགས། དེ་བཞིན་ས་གནས་ཀྱི་ཚོགས་སྐྱིད་ཁག་གི་སྐུ་ཚབ་སོགས་མཉམ་ཞུགས་གནང་ཡོད།སྐབས་དེར་ས་ཕྱོགས་ཁག་གསུམ་དུ་ཤིང་སྣ་གྲངས་ ༢༠༠ འདེབས་འཛུགས་གནང་ཡོད་པ་མ་ཟད། ༸སྐུའི་འཁྲུངས་སྐར་གོ་སྒྲིག་ཚོགས་ཆུང་ནས་ཏོག་དབྱིབས་གཉན་རིམས་ཕོག་པ་རྣམས་ལ་ (Horlics) བགོ་འགྲེམས་དང་། འབུམ་སྡེ་ལ་ས་གནས་འགོ་འཛིན་ལས་ཁུངས་ནས་མང་ཚོགས་ལ་ཁ་རས་དང་། རྫོང་དཔོན་བརྒྱུད་རྫོང་གི་སྨན་ཁང་ལ་རང་སྲུང་ཡོ་བྱད་དྲུག་དང་། གདོང་འགེབས་ (Face shields) གྲངས་བཞི་བཅས་གནང་ཡོད་པ་བཅས། །