༢༠༡༡ ཟླ་ ༨ ཚེས་ ༡༢ རེས་གཟའ་པ་སངས།
༄༅།  འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན།  ཕྱི་ལོ་ ༢༠༡༡ ཟླ་ ༨ པའི་ཚེས་ ༡༠ རེས་གཟའ་ལྷག་པའི་ཉིན་དཀར་མཛེས་བེ་རི་གསེར་ཁར་གྲོང་ནས་ཡིན་པའི་ཆབ་སྲིད་བཙོན་ཟུར་རྒྱལ་གཅེས་པ་འཕྲིན་ལས་ལགས་རང་ཁྱིམ་དུ་འདས་གྲོངས་སོང་བའི་ཡིད་སྐྱོའི་གནས་ཚུལ་ཐོན་འདུག    དམ་པ་ཁོང་ནི་ཕྱི་ལོ་ ༢༠༠༩ ལོའི་ཕྱི་ཟླ་ ༤ པའི་ནང་དཀར་མཛེས་རྫོང་ཁུལ་དུ་བོད་སྤྱི་དོན་སླད་ཞི་བའི་ལས་འགུལ་ནང་ཞུགས་རྐྱེན་རྒྱ་ནག་གཞུང་གི་སྤྱི་བདེ་ཚན་པས་འཛིན་བཟུང་བྱས་ཏེ་དུས་ཡུན་ཟླ་བ་བདུན་ལྷག་བཀག་ཉར་བྱས་རིང་ཚད་ལས་འདས་པའི་ཉེས་རྡུང་བཏང་སྟེ་གཟུགས་པོ་གཅོང་ཅན་བཟོས་པ་དང་སེམས་པ་ཐང་པོ་མེད་པར་གྱུར་རྗེས་གློད་བཀྲོལ་བཏང་བ་ཞིག་ཡིན་པ་དང་།  ཁྱིམ་མི་ཚོས་དཔལ་འབྱོར་གྱི་འཁོས་དཔག་ཞན་མིན་ལ་མ་ལྟོས་པར་དམ་པ་དེར་སྨན་བཅོས་གང་ཡོང་ཞུ་རིང་ཀླད་པར་ཡང་ན་ཚ་ཕོག་ཡོད་སྐོར་སྨན་པས་བརྗོད་ཡོད་འདུག་ཅིང་།  རྗེས་སུ་ནང་མིས་ཁྱིམ་དུ་འཁྲིད་དེ་ལྟ་རྟོག་གང་ཡོང་བྱས་ཀྱང་ལུས་པོ་ཡོངས་གཅོང་ཅན་དུ་གྱུར་ཟིན་སྟབས་ཕན་འབྲས་དེ་ཙམ་མ་ཐོན་པར་ད་ལྟ་རང་ལོ་ ༢༥ སོན་པའི་རྒྱལ་གཅེས་པ་འཕྲིན་ལས་ལགས་ཕྱི་ལོ་ ༢༠༡༡ ཟླ་ ༨ ཚེས་ ༡༠ རེས་གཟའ་ལྷག་པའི་ཉིན་དཀར་མཛེས་སུ་རང་ཁྱིམ་དུ་འདས་གྲོངས་སོང་བའི་ཡིད་སྐྱོའི་གནས་ཚུན་ཐོན་འདུག་པ་དང་།   དམ་པ་དེའི་ཕ་བློ་བུ་དེ་སྔ་ནས་ཚེ་ལས་འདས་ཟིན་པ་དང་།  ད་ལྟ་ཁྱིམ་དུ་མ་རིན་ཆེན་སྒྲོལ་མ་དང་།  འདས་པོ་འཕྲིན་ལས་ལགས་ཀྱི་བཟའ་ཟླ་རྡོ་དགའ་བཅས་ལས་མེད་ཅིང་།  འདས་པོའི་སྐུ་ཕུང་བོད་ཀྱི་ལུགས་སྲོལ་ལྟར་བྱ་གཏོར་བྱེད་སྐབས་ལུས་པོ་ནག་པོ་ཆགས་ཡོད་པའི་གནས་ཚུལ་ཡང་ཐོན་འདུག་པ་ལྟར།  དམ་པ་དེས་གཙོས་པའི་བོད་ཆོལ་གསུམ་དུ་གནས་པའི་ཆབ་སྲིད་བཙོན་ཟུར་མང་དག་ཅིག་རྒྱ་ནག་གཞུང་གི་བཙོན་ཁང་ནང་བཙོན་འཇུག་འོག་མནར་བཅོད་དང་ཉེས་རྡུང་ཚད་མེད་བཏང་བའི་རྐྱེན་གྱིས་ཆབ་སྲིད་བཙོན་པ་མི་ཉུང་བ་ཞིག་ལོ་ན་ཤིན་ཏུ་ཕྲ་བའི་དུས་ནས་ནད་གཅོང་གིས་མནར་ཏེ་འཇིག་རྟེན་འདི་ནས་ཁ་བྲལ་དགོས་པའི་ཡིད་སྐྱོའི་གནས་ཚུལ་འདི་ནི་བོད་ནང་རྒྱུན་ཆད་མེད་པར་ཐོན་དང་འཐོན་བཞིན་ཡོད།།