༢༠༡༡ ཟླ་ ༨ ཚེས་ ༡༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༩ ཉིན་རྒྱ་གར་གྲོས་ཚོགས་སུ་ཕྱོགས་འགལ་ཚོགས་པ་བྷ་ར་ཏི་ཡ་ཇན་ཏ་པར་ཊི་ཡི་མགྲིན་ཚབ་པ་དང་གྲོས་ཚོགས་འཐུས་མི་སྐུ་ཞབས་ཏ་རུན་ཝི་ཇེ་(Tarun Vijay) ལགས་ཀྱིས་རྒྱ་གར་གཞུང་གི་རྩ་ཁྲིམས་ནང་བྷོ་ཊའི་སྐད་ཡིག་ལ་ངོས་འཛིན་དགོས་པའི་རེ་འདུན་གྱི་གྲོས་གཞི་བཏོན་པའི་ནང་འཁོད་དོན། རྩ་ཁྲིམས་ནང་བྷོ་ཊིའི་སྐད་ཡིག་ལ་ངོས་འཛིན་གནང་ཐུབ་ཚེ་ཧི་མཱ་ལ་ཡའི་ས་ཁུལ་དུ་ཡོད་པའི་རྒྱ་གར་གྱི་ཡུལ་མི་རྣམས་རྒྱ་གར་སྐམ་ས་ལས་ལོགས་སུ་ཟུར་འབུད་ཀྱི་བསམ་བློ་དོར་ཏེ་རྒྱ་གར་གྱི་ཡུལ་མི་ཡིན་བསམ་པའི་སེམས་ཐག་ཉེ་རུ་འགྲོ་རྒྱུར་ཕན་ཐོགས་ཡོད། བྷོ་ཊའི་སྐད་ཡིག་དེ་བཞིན་འབྲུག་དང་བལ་ཡུལ། བོད། སོག་པོ། པ་ཀི་སི་ཐན་བཅས་སུ་བེད་སྤྱོད་གཏོང་བཞིན་ཡོད། རིག་གཞུང་དང་ཆོས་ལུགས། རྒྱལ་ཁབ་མི་འདྲ་བ་སོ་སོའི་ནང་བྷོ་ཊའི་སྐད་ཡིག་འདི་བེད་སྤྱོད་བྱེད་བཞིན་པ་དེས་རྣམ་པ་ཐ་དད་ནང་ཆིག་སྒྲིལ་ཡོད་པ་མཚོན་ཐུབ།
སྤྱིར་བྷོ་ཊའི་སྐད་ཡིག་དེ་བཞིན་རྒྱ་གར་ཧི་མཱ་ལ་ཡའི་རི་རྒྱུད་བྱང་ལ་དྭགས་ནས་ཤར་མོན་རྟ་དབང་བར་བེད་སྤྱོད་བྱེད་བཞིན་པ་མ་ཟད། ཧི་མཱ་ཅལ་པར་ཌེ་ཤི་དང་། ཨུ་ཏར་ཁཎྜ། ཨ་རུ་ན་ཅལ་པར་ཌེ་ཤི། སི་ཀིམ། ནུབ་བྷེང་གལ་བཅས་སུའང་བེད་སྤྱོད་གཏོང་བཞིན་ཡོད་པ་བཅས།།