༄༅། །རྒྱ་ནག་གཞུང་གིས་མཚོ་སྔོན་ཞིང་ཆེན་མགོ་ལོག་ཁུལ་པདྨ་རྫོང་ནས་ཡིན་པའི་བོད་མི་རྩོམ་པ་པོ་དང་ཤེས་ཡོན་པ་བློ་བཟང་ལྷུན་གྲུབ་བམ་སྨྱུག་མིང་ལ་དྷཱི་ལྷ་ལྡན་ལགས་ཕྱི་ལོ་ ༢༠༡༩ ཟླ་ ༦ ནང་རྒྱ་ནག་ཁྲིན་ཏུའུ་གྲོང་ཁྱེར་ནས་འཛིན་བཟུང་གིས་ད་བར་ལོ་གཉིས་འགྲོ་བཞིན་ཡོད་ཀྱང་ཁྲིམས་ཐག་སོགས་གང་ཡང་མ་བཅད་པར་བཀག་ཉར་འོག་བཞག་མུས་ཡིན་འདུག

དེ་ཡང་ཨེ་ཤེ་ཡ་རང་དབང་རླུང་འཕྲིན་ཁང་གི་གནས་ཚུལ་སྤེལ་གསལ་ལྟར་ན། བློ་བཟང་ལྷུན་གྲུབ་ལགས་ཀྱི་ངོ་ཤེས་གྲོགས་པོ་ཚོས་ཁོང་ཀློད་གྲོལ་ཡོང་བའི་རེ་བ་བཅངས་ནས་ད་བར་ཁོང་གི་སྐོར་གྱི་གནས་ཚུལ་ཕྱི་ཕྱོགས་སུ་བཤད་མེད་པ་དང་།  ད་ལྟ་ཁོང་འཛིན་བཟུང་བྱས་ཏེ་ལོ་གཉིས་འགྲོ་བཞིན་ཡོད་ན་ཡང་། ད་དུང་ཐག་གཅོད་དང་ཐུག་འཕྲད་སོགས་གང་ཡང་བྱས་འཇུག་མེད་སྟབས་ད་ཆ་ནང་མི་དང་ཉེ་འབྲེལ་ཚོས་སེམས་འཚབ་བྱེད་བཞིན་ཡོད།

ཕྱི་ལོ་ ༢༠༢༠ ཟླ་ ༡༢ ཚེས་ ༤ ཉིན་བློ་བཟང་ལྷུན་གྲུབ་ལགས་ཀྱི་ནང་མི་ཚོར་གོང་རིམ་ནས་བརྡ་ལན་ཞིག་འབྱོར་ཏེ་ཁོང་འཛིན་བཟུང་ཐད་ཐག་གཅོད་བྱ་རྒྱུ་ཡིན་སྐོར་བཤད་པ་ལྟར། ཁོང་གི་ནང་མི་དང་སྤུན་མཆེད་སོགས་སོང་ཡོད་ན་ཡང་། སྐབས་དེར་ཐག་གཅོད་གང་ཡང་བྱས་མེད་པ་མ་ཟད། ནང་མི་དང་ཐུག་འཕྲད་ཀྱང་བྱེད་བཅུག་མེད་པ་རེད་འདུག

བློ་བཟང་ལྷུན་གྲུབ་ལགས་ནི་ཕྱི་ལོ་ ༡༩༧༡ ལོར་བོད་མགོ་ལོག་པདྨ་རྫོང་དུ་སྐྱེས་ཤིང་། ལོ་ན་ ༡༣ ཐོག་ཆོས་སྒོར་ཞུགས་ཏེ་གསེར་རྟ་བླ་རུང་སྒར་དུ་སློབ་གཉེར་གནང་ཡོད་པ་མ་ཟད།  ཕྱིས་སུ་ལོ་ན་ ༢༧ སྟེང་ནས་བོད་ཀྱི་རྒྱལ་ས་ལྷ་སའི་གདན་ས་འབྲས་སྤུངས་དང་སེ་ར་གཉིས་སུ་ནང་ཆོས་ཀྱི་གཞུང་ཆེན་མོར་སློབ་གཉེར་གནང་འདུག ཕྱི་ལོ་ ༢༠༠༨ ལོ་ནས་བོད་ཀྱི་ས་ཁུལ་མང་པོར་འགྲུལ་བཞུད་ཀྱིས་བོད་ཁུལ་གྱི་དངོས་ཡོད་གནས་ཚུལ་སྐོར་ལ་རྩོམ་འབྲིའི་ཕྱག་ལས་གནང་འགོ་ཚུགས་ཡོད་པ་མ་ཟད། ཁོང་གིས་སྔ་ཕྱིར་ཕྱི་ལོ་ ༢༠༠༨ ལོའི་བོད་ནང་གི་ས་བྱི་ཞི་རྒོལ་ཆེན་མོ་དང་འབྲེལ་བའི་དཔེ་དེབ་ཚེ་སྲོག་གིས་བསྐྲུན་པའི་སྐད་ཆ་དང་། བསྟུན་རྒོལ་ཁྲིམས་གཏུགས། དེ་མིན་གཞན་སྤྱི་ཚོགས་དཔྱད་བརྗོད་ཀྱི་དཔེ་དེབ་དོགས་པའི་རྩོམ་བཅས་བྲིས་ཡོད་འདུག །