༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༥ ཚེས་ ༡༧ དགོང་དྲོ་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་ནས་གཙོ་འགན་ཐོག་༼བཙན་ཁྲིད་བྱས་ནས་ལོ་ངོ་ ༢༦ འཁོར། ༸པཎ་ཆེན་རིན་པོ་ཆེ་མྱུར་དུ་གློད་འགྲོལ་གཏོང་དགོས།༽ཞེས་དྲ་རྒྱའི་ཐོག་ནས་གསར་འགོད་གསལ་བསྒྲགས་ཀྱི་ལས་འགུལ་ཞིག་སྤེལ་ཡོད་པ་རེད།
ཐོག་མར་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་ཐེངས་འདིའི་གསར་འགོད་གསལ་བསྒྲགས་སྤེལ་དགོས་པའི་དགོས་དམིགས་ངོ་སྤྲོད་གནང་བ་དང་། ཁོང་གིས་གསུང་དོན་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་རྒྱ་ནག་གཞུང་གིས་བཙན་འཁྲིད་བྱས་ནས་ལོ་ ༢༦ འཁོར་ཞིང་། རྒྱ་གཞུང་གིས་༸གོང་ས་མཆོག་གིས་ངོས་འཛིན་གནང་བའི་ཚབ་ཏུ་པཎ་ཆེན་གཞན་ཞིག་བསྐོ་གཞག་བྱས་པ་ནི་ཡོང་ཐབས་མེད་པ་ཞིག་རེད། གཞིས་བྱེས་གཉིས་ཀྱི་བོད་མི་ཡོངས་ནས་ཁོང་མུ་མཐུད་བཙལ་འཚོལ་བྱ་རྒྱུ་ཡིན་གནས་གསུངས།
དེ་རྗེས་སྐུ་མགྲོན་གཙོ་བོ་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་ཐའེ་ཝན་གྱི་གཞུང་འབྲེལ་མིན་པའི་ཚོགས་པ་ཁག་ནས་ནད་ཡམས་ཁྱབ་བརྡལ་ཇེ་ཆེར་འགྲོ་བཞིན་པའི་ཛ་དྲག་གནས་སྟངས་འོག ད་དུང་ལས་འགུལ་འདི་སྤེལ་བར་ཐུགས་རྗེ་ཆེ་ཞུས་པ་དང་། ༸གོང་ས་མཆོག་གིས་ངོས་འཛིན་མཛད་པའི་ཁྲིམས་མཐུན་གྱི་ཆོས་ལུགས་དབུ་འཁྲིད་པཎ་ཆེན་རིན་པོ་ཆེ་ད་ཆ་དགུང་གྲངས་ ༣༢ ལ་ཕེབས་ཀྱི་ཡོད་པས། རྒྱལ་སྤྱི་དང་རྒྱ་ནག་གཞུང་གི་འབྲེལ་ཡོད་ཁྲིམས་སྒྲིག་ནང་གསལ་ལྟར་ཁོང་ལ་སྔ་ས་ནས་༼རྒྱ་གཞུང་གི་སྲུང་སྐྱོབ་ཀྱི་ལྟ་སྐུལ།༽བྱེད་དགོས་དོན་མེད། ཁོང་དང་ཁོང་གི་ནང་མིར་གཞི་རྩའི་འཚོ་བ་སྐྱེལ་རྒྱུའི་རང་དབང་ཐོབ་དགོས་ཞེས་དང་།
དེ་བཞིན་རྒྱ་ནག་གི་སྤྱི་དམངས་དང་བོད་མི། རྒྱ་ཆེའི་བོད་བརྒྱུད་ནང་བསྟན་གྱི་རྗེས་འཇུག རྒྱལ་སྤྱིའི་མི་སྣ་སོགས་ལ་ཁོང་གི་ད་ལྟའི་གནས་སྟངས་གང་འདྲ་ཡོད་མེད་ཤེས་རྟོགས་ཐུབ་པའི་ཐོབ་ཐང་ཡོད་པས། རྒྱ་གཞུང་གིས་༼ནང་སྲིད་ལ་ཐེ་བྱུས་མི་ཆོག༽ཅེས་པའི་མཁྲེགས་འཛིན་སྲིད་བྱུས་མུ་མཐུད་ལག་བསྟར་བྱས་ཚེ། རྒྱལ་སྤྱིའི་ཐོག་པཎ་ཆེན་ཆུང་སྲིད་རིན་པོ་ཆེ་རྩད་འཚོལ་གྱི་ལས་འགུལ་མཚམས་འཇོག་བྱེད་སྲིད་ཀྱི་མ་རེད་ཅེས་གསུངས་པ་མ་ཟད། ན་ནིང་བོད་མིའི་སྒྲིག་འཛུགས་ནས་རྒྱལ་སྤྱིའི་ཆབ་སྲིད་མི་སྣ་དང་། ཚོགས་སྡེ་ཁག་ལ་པཎ་ཆེན་ཆུང་སྲིད་རིན་པོ་ཆེ་གློད་འགྲོལ་ཡོང་ཆེད་ཁོང་གི་ཞིབ་ཕྲའི་གནས་ཚུལ་ཁག་འབུལ་ལམ་ཞུས་པ་དང་། མཉམ་འབྲེལ་རྒྱལ་ཚོགས་གཙོས་རྒྱལ་སྤྱིའི་ཐོག་པཎ་ཆེན་རིན་པོ་ཆེའི་སྐོར་རྒྱབ་སྐྱོར་དང་ཐུགས་སྣང་ཇི་ལྟར་གནང་བཞིན་པ་སོགས་ཀྱང་ངོ་སྤྲོད་གནང་།
ཐའེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་ད་ལྟའི་རྒྱ་གཞུང་གི་བྱེད་བབ་སྐོར་གསུང་དོན། ང་ཚོ་གུང་བྲན་ཏང་དང་རྒྱ་ནག་གཞུང་ལ་ཡིད་ཆེས་བརླགས་སོང་། འོན་ཀྱང་རྒྱ་མི་རིགས་ལ་ཡིད་ཆེས་ཡོད། རྒྱ་གཞུང་གིས་ད་ལྟ་བྱེད་བཞིན་པའི་རྫུན་གཏམ་དང་ཁྲམ་པ་མུ་མཐུད་བྱས་ན། དེ་ནི་རྒྱ་ནག་རྒྱལ་ཁབ་སྤྱི་དང་རྒྱ་མི་རིགས་ཡོངས་ལ་ཉེན་ཁ་ཆེན་པོ་ཞིག་རེད་སོགས་གསུངས།
ནད་ཡམས་ཀྱི་འདུ་འཛོམས་ཁྲིམས་སྒྲིག་ལྟར་མི་གྲངས་ལྔ་ལས་མང་བ་འཛོམས་མ་ཆོག་སྟབས། ཐའེ་ཝན་བོད་ཀྱི་ས་གནས་གཞོན་ནུའི་ཚོགས་གཙོ་དཀོན་མཆོག་ལྷག་པ་ལགས་ཀྱིས་ཡིག་ཐོག་གནང་བའི་གཏམ་བཤད་གཙོ་སྐྱོང་བས་སྒྲོགས་སྦྱང་གནང་བ་དང་། ཁོང་གིས་གཞུང་འབྲེལ་མིན་པའི་ཚོགས་པར་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་རེད།
ཐའེ་ཝན་འགྲོ་བ་མིའི་ཐོབ་ཐང་སྐུལ་སྤེལ་ཚོགས་པའི་དྲུང་ཆེ་ནས་པཎ་ཆེན་རིན་པོ་ཆེ་གར་སོང་ཆ་མེད་གྱུར་བའི་གནས་སྟངས་དེ། མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་ཁྲིམས་སྒྲིག་གི་ནང་དོན་གཞིར་བཟུང་རྒྱ་ནག་གཞུང་གིས་ཁྲིམས་འགལ་ལག་བསྟར་བྱས་པ་འགྲེལ་བརྗོད་གནང་བ་དང་། ཐའེ་ཝན་བོད་རང་དབང་སློབ་ཕྲུག་ཚོགས་པའི་ཚོགས་མི་སྲས་མོ་ལིའི་ལགས་ཀྱིས། རྒྱ་གཞུང་གིས་པཎ་ཆེན་རིན་པོ་ཆེ་བཙན་ཁྲིད་བྱས་པ་རྒྱལ་སྤྱིའི་བྱིས་པའི་ཁྲིམས་ལུགས་དང་འགལ་བའི་སྐོར་དང་། དེ་བཞིན་ཐའེ་ཝན་ཡུན་གནས་ཚོགས་པའི་དྲུང་ཆེ་གཞོན་པ་ནས་གསུང་དོན། གུན་བྲན་ཏང་གི་སྲིད་དབང་གིས་འཛམ་གླིང་ཡོངས་ལ་གནོད་འཚེ་བཏང་ཡོད་པས། ང་ཚོ་ཚང་མ་མཐུན་སྒྲིལ་རྡོག་རྩ་ཆིག་སྒྲིལ་བྱ་དགོས་པ་སོགས་ཀྱི་གཏམ་བཤད་གནང་ཡོད་པ་རེད།མཇུག་ཏུ་ལས་འགུལ་གོ་སྒྲིག་གནང་མཁན་སྲས་མོ་ལིན་ལགས་ཀྱིས་ངོ་སྤྲོད་གནང་དོན། ཐོག་མའི་འཆར་གཞིར་ཐའེ་ཝན་ནང་ཡོད་པའི་རྒྱ་ནག་གི་དངུལ་ཁང་ཐོག་རྩེག་ཆེན་མོའི་མདུན་ཐང་དུ་གཞི་རྒྱ་ཆེ་བའི་མཚན་ཚོགས་གོ་སྒྲིག་བྱ་གཏན་འཁེལ་ཡང་། ཉིན་ཤས་རིང་ཐའེ་ཝན་ནང་གློ་བུར་དུ་ནད་ཡམས་གཞི་རྒྱ་ཆེ་རུ་སོང་བས། འདུ་འཛོམས་མཚམས་འཇོག་གིས་དྲ་རྒྱའི་བརྒྱུད་ལམ་ནས་ལས་འགུལ་སྤེལ་དགོས་བྱུང་ཞེས་དང་། གཞུང་འབྲེལ་མིན་པའི་ཚོགས་པ་ཁག་བརྒྱད་ནས་མཉམ་སྦྲེལ་ཐོག་ལས་འགུལ་སྤེལ་བ་ཞིག་ཡིན་པ་རེད།
གཞན་ཡང་། འདི་ཚེས་ ༡༦ ཉིན་ཐའེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས། ཐའེ་ཝན་ཀ་ཁ་ག་ངའི་ཚོགས་ཁང་ནས་དྲ་རྒྱ་བརྒྱུད་༸ཀུན་གཟིགས་པཎ་ཆེན་རིན་པོ་ཆེ་མཆོག་གིས་བོད་ནང་དུ་མི་རིགས་སྐད་ཡིག་ཆོས་དང་རིག་གཞུང་ཆེད་དུ་སྐུ་ལས་དཔག་མེད་བསྐྱོན་གནང་བར་བཀའ་དྲིན་རྗེས་དྲན་དང་མྱུར་དུ་མཇལ་བའི་མཆོད་མེའི་སྨོན་ལམ་ཞིག་གོ་སྒྲིག་གནང་ཡོད་པ་དང་། དེ་བཞིན་འདི་ག་དོན་ཁང་ནས་གྲོས་ཚོགས་འཐུས་མི་དང་། གཞུང་འབྲེལ་མིན་པའི་ཚོགས་པ་ཁག་གཅིག་ལ་དྲ་ལམ་ཐོག་ནས་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་གློད་འགྲོལ་ཡོང་བའི་འབོད་སྐུལ་ཞུས་དོན་ལྟར་དྲ་ལམ་ཐོག་ནས་རྒྱབ་སྐྱོར་གནང་ཡོད་པ་རེད། །