༄༅། །བོད་མིའི་སྒྲིག་འཛུགས་ཀྱིས་ཨ་རིའི་ཕྱི་སྲིད་ལྷན་ཁང་གི་མཐོ་རིམ་ལས་བྱེད་ཁག་གཅིག་དང་ལྷན་བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་དུ་གཞུང་འབྲེལ་གྱི་ཚོགས་འདུ་ཐེངས་དང་པོ་ཚོགས་གནང་ཡོད།
དེ་ཡང་ཏོག་དབྱིབས་གཉན་རིམས་ཀྱི་རྐྱེན་པས་ཨ་རིའི་སྲིད་གཞུང་གསར་པ་སླེབས་པ་ནས་བཟུང་ཕྱི་མི་སྐུ་མགྲོན་སུ་ཡིན་རུང་ཨ་རིའི་ཕྱི་སྲིད་ལྷན་ཁང་ལ་ཕེབས་ཆོག་གི་མེད་པའི་དམ་བསྒྲགས་ནན་པོ་གནང་བཞིན་ཡོད། འོན་ཀྱང་ད་ལན་བྱང་ཨ་རིའི་སྐུ་ཚབ་དོན་ཁང་གིས་ཨ་རིའི་ཕྱི་སྲིད་ལྷན་ཁང་གི་མཐོ་རིམ་ལས་བྱེད་ཁག་གཅིག་བྱང་ཨ་རིའི་སྐུ་ཚབ་དོན་ཁང་དུ་ཚོགས་འདུར་གདན་འདྲེན་ཞུས་ཐུབ་པ་ནི་བོད་མིའི་སྒྲིག་འཛུགས་ལ་མཚོན་ན་ལོ་རྒྱུས་རང་བཞིན་ལྡན་པའི་གྲུབ་འབྲས་ཆེན་པོ་ཞིག་དང་སྤོབས་པ་བྱེད་འོས་པའི་དུས་སྐབས་ཤིག་བྱུང་ཡོད།དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཊམ་སྲིད་གཞུང་སྐབས་བསྐོ་གཞག་གནང་བའི་ཨ་རིའི་བོད་དོན་དམིགས་བསལ་འབྲེལ་མཐུད་པ་དང་ལྷན་ན་ནིང་ཕྱི་ཟླ་ ༡༠ པའི་ནང་མཇལ་འཕྲད་གནང་ཡོད། དཔལ་ལྡན་སྲིད་སྐྱོང་མཆོག་གིས་དེ་སྔ་ཨ་རིའི་གཞུང་གི་མཐོ་རིམ་ལས་བྱེད་རྣམས་མཇལ་འཕྲད་གནང་སྐབས་འཚིག་ཇ་ཁང་དང་། ཟ་ཁང་། མགྲོན་ཁང་སོགས་ནང་མཇལ་འཕྲད་གནང་དགོས་བྱུང་ཡོད།
དེ་ཡང་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་ལས་དོན་ཚན་པའི་དྲུང་ཆེ་ལས་རོགས་ལི་ས་པེ་ཊར་སན་ (Lisa Peterson) ལགས་དང་། དྲུང་གཞོན་ལས་རོགས་ལས་ཚབ་གཙོ་བོ་སི་ཁོ་ཊི་ (Scott Busby) ལགས། ཕྱི་འབྲེལ་ཞབས་འདེགས་ལས་དོན་ཚན་པའི་ལས་བྱེད་ཨན་ཊོན་(Anton Jongeneel) ལགས་བཅས་ཚོགས་འདུར་དངོས་སུ་ཕེབས་ཡོད་པ་དང་། ཚོགས་མི་གཞན་རྣམས་དྲ་ལམ་བརྒྱུད་མཉམ་ཞུགས་གནང་ཡོད། དེ་བཞིན་ཨ་རིའི་ཤར་ཨེ་ཤི་ཡ་དང་ཞི་བདེ་རྒྱ་མཚོ་ས་ཁུལ་ལས་དོན་ཚན་པའི་དྲུང་གཞོན་ལས་རོགས་ཇོ་ན་ཐན་ (Jonathan Fritz) ལགས་དང་། ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་འགན་འཛིན་ལས་རོགས་མར་སེར་ (Mariah Mercer) ལགས། གཞན་ཡང་ཨ་རིའི་རྒྱལ་ཡོངས་བདེ་སྲུང་ལྷན་ཁང་གི་ཚོགས་མི་ཁག་གཅིག་བཅས་དྲ་ལམ་བརྒྱུད་ཚོགས་འདུར་མཉམ་ཞུགས་གནང་ཡོད།
དེ་བཞིན་ཉིན་དེའི་ཕྱི་དྲོར་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚན་པའི་ཚོགས་གཙོ་དང་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇེམ་སི་མེག་གྷོ་ཝན་ (James McGovern) མཆོག་དང་ལྷན་སྲིད་སྐྱོང་གི་མཚན་ཐོག་ནས་མཐའ་མའི་མཇལ་འཕྲད་དེ་གནང་ཡོད། སྐབས་དེར་སྐུ་ཞབས་མེག་གྷོ་ཝན་མཆོག་གིས་ཏོག་དབྱིབས་གཉན་རིམས་སླར་ཡང་ཁྱབ་གདལ་ཕྱིན་པ་ནས་བཟུང་དཔལ་ལྡན་སྲིད་སྐྱོང་མཆོག་ཁོང་གི་ལས་ཁུངས་སུ་དངོས་སུ་ཕེབས་མཁན་སྐུ་མགྲོན་ཐོག་མ་དེ་ཡིན་ཞེས་དང་། དམ་བསྒྲགས་ཀྱི་རྐྱེན་པས་དཔལ་ལྡན་སྲིད་སྐྱོང་མཆོག་སྐུ་མགྲོན་མཐའ་མ་དེའང་ཡིན་སྲིད་ཅེས་ཞལ་ཤོབ་དང་སྦྲགས་གསུངས།
གཞན་ཡང་སྐུ་ཞབས་མེག་གྷོ་ཝན་མཆོག་གིས། ཁོང་དང་དཔལ་ལྡན་སྲིད་སྐྱོང་མཆོག་གི་ལས་ཡུན་རིང་ཁོང་བཞུགས་སྒར་རྡ་སར་འཚམས་གཟིགས་དང་། བོད་དོན་ཆེད་ཁྲིམས་འཆར་མང་པོ་གཏན་འབེབས་གནང་ཐུབ་པ་སོགས་ཁོང་གཉིས་ཀྱི་འདོད་དོན་མཐའ་དག་ལེགས་གྲུབ་བྱུང་ཐུབ་པར་ཧ་ཅང་དགའ་ཚོར་ཆེན་པོ་བྱུང་ཞེས་དང་། བོད་མིའི་སྒྲིག་འཛུགས་ཀྱི་འབྱུང་འགྱུར་གྱི་མདུན་ལམ་ཡག་པོ་ཞིག་བཟོས་ཡོད། ཅེས་གསུངས།
སྐུ་ཞབས་ཁོང་གིས་སྔ་ཕྱི་བར་གསུམ་དུ་བོད་དང་བོད་མིའི་གནད་དོན་ཆེད་སྐུ་ངལ་འཛེམས་ཀྱིས་བོད་དོན་ཞུ་གཏུག་གི་ལས་འགུལ་གྱི་མཚོན་པའི་ཕྱག་ལས་སྣ་མང་གནང་ཡོད་པས་ཁོང་ནི་བོད་མིའི་ཁྲོད་དུ་ངོ་ཤེས་པའི་མི་སྣ་གལ་ཆེན་ཞིག་ཆགས་ཡོད།དེ་བཞིན་ཉིན་དེའི་སྔ་དྲོར་དཔལ་ལྡན་སྲིད་སྐྱོང་མཆོག་དང་ཨ་རིའི་སློབ་ཡོན་ལས་གཞིའི་ལྷོ་དབུས་ཨེ་ཤི་ཡའི་ཡན་ལག་འགན་འཛིན་ཇུ་ལི་ཡ་ (Julia Findlay) ལགས་དང་། དྲུང་གཞོན་ལས་རོགས་མ་རིན་ནེ་ ( Marianne Craven) ལགས་རྣམ་གཉིས་དང་ལྷན་དྲ་ལམ་བརྒྱུད་ཚོགས་འདུ་ཞིག་ཚོགས་གནང་ཡོད། ཨ་རིའི་སློབ་ཡོན་ལས་གཞིའི་ལྷོ་དབུས་ཨེ་ཤི་ཡའི་ཡན་ལག་འགན་འཛིན་ཇུ་ལི་ཡ་ལགས་དང་དྲུང་གཞོན་ལས་རོགས་མ་རིན་ནེ་ལགས་རྣམ་གཉིས་ཀྱིས་ཨ་རིའི་བོད་མིའི་སློབ་ཡོན་ལས་གཞི་དང་འབྲེལ་བའི་ཕྱག་ལས་གནང་གི་ཡོད་པ་བཅས།།