༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཕྱི་ལོ་ ༢༠༢༡ ཟླ་ ༠༤ ཚེས་ ༥ ནས་ ༡༦ བར་ལ་དྭགས་བསོད་ནམས་གླིང་བོད་མིའི་གཞིས་ཆགས་དང་། ལྷོ་གཞིས་ཁག་ལྔ་བཅས་སུ་གཞུང་དོན་ཕྱོགས་ཕེབས་གནང་གཏན་འཁེལ་ཡོད།
སྐབས་དེར་བཀའ་བློན་མཆོག་ཁྱབ་ཁོངས་ས་གནས་སུ་གཞུང་འབྲེལ་ཐོན་མཇལ་དང་བསྟུན་ཕྱི་ཚེས་ ༦ ཉིན་ལ་བྱང་མ་ཁྱུ་དང་ཆུ་ཤུལ་གཉིས་ཀྱི་འདུ་སྡོད་མི་མང་ཆེད་བསོད་ནམས་གླིང་ཨག་གླིང་དུ་ས་ཆ་བསྩལ་སོན་བྱུང་བ་འདི་ཉིད་དབུ་འབྱེད་དང་གསུང་བཤད་གནང་རྒྱུ། དེ་བཞིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་མཆོག་དང་ཁུལ་དེའི་དཔོན་རིགས་བཅས་མཇལ་འཕྲད་གནང་རྒྱུ། གཞན་ཡང་ལ་སྤྱི་ལས་ཁུངས་གསར་རྒྱག་ལས་གཞི་ལེགས་གྲུབ་ཟིན་པས་དབུ་འབྱེད་གནང་རྒྱུ།
ལྷོ་ཕྱོགས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་སཾ་བྷོ་ཊ་ཉིན་སློབ་ཀྱི་འཛུགས་སྐྲུན་ལས་གཞི་ལེགས་གྲུབ་ཟིན་པ་ཁག་དང་། སྦེལ་ཀོབ་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་དུ་མགྲོན་ཁང་གསར་རྒྱག ཧུན་སུར་རབ་རྒྱས་གླིང་ས་གནས་འགོ་འཛིན་ལས་ཁུངས་གསར་རྒྱག་བཅས་དབུ་འབྱེད་གནང་རྒྱུ། གཞན་ཡང་ཀརནཱ་ཊཀ་མངའ་གཞུང་ནས་རོགས་དངུལ་བཀའ་འཁྲོལ་བསྩལ་བའི་ལས་གཞི་འགྲོ་མུས་ཁག་ལ་མཇུག་གནོན་རྟོགས་ཞིབ་བཅས་ཀྱི་ཆེད་གཞུང་དོན་ཕྱོགས་ཕེབས་གནང་གཏན་འཁེལ་ཡོད་པ་བཅས། །
