༄༅། ། རྒྱ་ནག་གཞུང་གིས་མཚོ་སྔོན་ཞིང་ཆེན་མཚོ་ལྷོ་ཁུལ་ནས་ཡིན་པའི་བོད་རིགས་སློབ་མ་བྱམས་པ་ཚེ་རིང་དང་། གདུགས་དཀར་ཚེ་རིང་རྣམ་གཉིས་ཀྱིས་ས་གནས་རྐང་རྩེད་སྤོ་ལོ་འགྲན་སྡུར་རུ་ཁག་གི་དར་ཆ་དང་མཚོན་རྟགས་རང་བཟོ་བྱས་པའི་ནག་ཉེས་བཙུགས་པ་མ་ཟད། ཁོང་གཉིས་ཀྱི་ལག་འཁྱེར་ཁ་པར་ཡང་བཙན་འཕྲོག་བྱས་འདུག
དེ་ཡང་ཕྱིའི་རྒྱལ་ཁབ་ཀྱི་རྒྱ་རིགས་ཚོགས་སྡེ་ཞིག་ནས་གནས་ཚུལ་བཏོན་པ་ལྟར་ན། བོད་རིགས་སློབ་མ་བྱམས་པ་ཚེ་རིང་ཞུ་བ་ཞིག་ལ་རྒྱལ་ཁབ་ཁ་བྲལ་གྱི་ངན་སྐུལ་བྱས་རབས་ཀྱི་བསྙོན་འཛུགས་འོག་མི་ལོ་གཅིག་དང་ཕྱེད་ཀའི་དུས་བཀག་བཙོན་འཇུག་གི་ཁྲིམས་ཐག་བཅད་པ་མ་ཟད། མི་ལོ་གཅིག་གི་ཆབ་སྲིད་ཐོབ་ཐང་བཙན་འཕྲོག་བྱས་པ་དང་། ཉེས་འཛུགས་ཁྲིམས་ཆད་ཀྱི་དུས་ཡུན་མི་ལོ་གཉིས་རིང་ཕར་འགྱངས་བྱས་ནས་ལྟ་རྟོག་འོག་ཏུ་བཞག་འདུག དེ་བཞིན་གདུགས་དཀར་ཚེ་རིང་ཞུ་བའི་སློབ་མ་གཞན་ཞིག་ཀྱང་བཀག་བསྐྱིལ་གྱིས་ཁོང་གི་ཁྲིམས་འགལ་ཉེས་གསོག་ཐེངས་དང་པོ་ཡིན་ལུགས་ཀྱིས་ཉེས་ཆད་ཆག་ཡང་བཏང་ཡོད་འདུག
བྱམས་པ་ཚེ་རིང་ལ་རྐང་རྩེད་སྤོ་ལོ་འགྲན་སྡུར་རུ་ཁག་གི་དར་ཆ་དང་མཚོན་རྟགས་རང་བཟོ་དང་སྤྱི་ཚོགས་བརྒྱུད་ལམ་ནང་བསྐུར་ལུགས། ཁྲིམས་འགལ་ཉེས་གསོག་གི་པར་རིས་དེ་གདུགས་དཀར་ཚེ་རིང་ལ་འབྲེལ་གཏུག་བྱས་ནས་བླངས་རབས་སོགས་ཀྱི་དོགས་གཞིའི་འོག་བཀག་ཉར་བྱས་པ་དང་། དར་ཆ་སྒྲིག་བཟོ་དང་མཚོན་རྟགས་ལ་བཀོད་པ་ནི་རྒྱལ་ཁབ་ཁ་བྲལ་གྱི་ངན་སྐུལ་དང་མཐུན་སྒྲིལ་ལ་གཏོར་བརླག་བཏང་བའི་ཁྲིམས་འགལ་ཉེས་གསོག་དང་གཅིག་པ་ཡིན་ལུགས་བསྒྲགས་འདུག
རྒྱ་གཞུང་གིས་བྱམས་པ་ཚེ་རིང་ལ་ད་དུང་ཁོས་མཚོ་སྔོན་ཞིང་ཆེན་ཆབ་ཆ་གྲོང་རྡལ་གྱི་བླ་མཚོའི་བུམ་པ་རྟགས་ཅན་གྱི་རྐང་རྩེད་སྤོ་ལོ་འགྲན་སྡུར་སྐབས་དྲུག་པའི་ཐོག་རུ་ཁག་གི་དར་ཆ་དེ་སྤེལ་བ་དང་། སྐབས་དེའི་འགྲན་སྡུར་གྱི་འདྲ་པར་དང་བརྙན་ཐུང་སོགས་སོ་སོའི་འཕྲིན་ཕྲན་རྒྱབ་ལྗོངས་སུ་འཁོད་པར་ས་གནས་དྲ་ཞུགས་བོད་མི་མང་པོས་མཐོང་བ་སོགས་བྱམས་པ་ཚེ་རིང་གིས་སྤྱི་ཚོགས་ལ་ཆབ་སྲིད་ཀྱི་བག་ཆགས་ངན་པ་བཟོས་རབས་བཤད་འདུག།