ཕྱི་ལོ་ ༢༠༢༡ ཟླ་ ༣ ཚེས་ ༡༦ རེས་གཟའ་མིག་དམར།༄༅། །སུད་སིའི་གཞུང་གིས་བོད་མི་གྲངས་ ༣༠༠ ཙམ་ལ་སྐྱབས་བཅོལ་བའི་ཡིག་ཆ་གནང་མེད་སྟབས། ཕྱི་ལོ་ ༢༠༢༡ ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ དང་བསྟུན་མི་གྲངས་ ༣༠༠༠ ལྷག་གིས་མཚན་རྟགས་བཀོད་པའི་ཞུ་ཡིག་ཅིག་སུད་སིའི་གཞུང་ (Swiss Federal Chancellery) ལ་ཕུལ་ཡོད།  སྐབས་དེར་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་དང་སུད་སིའི་གྲོས་ཚོགས་གོང་མའི་གྲོས་ཚོགས་འཐུས་མི་ཧྥེ་བྷི་ཡེན་མོ་ལི་ནཱ་ (Fabian Molina) མཆོག་དང་། སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས། སུད་སི་དང་ལིག་ཏེན་སིཊཡན་བོད་རིགས་སྤྱི་མཐུན་ཚོགས་པའི་ཚོགས་གཞོན་ཟུར་པ་ཕུན་ཚོགས་ལགས་དང་ཚོགས་གཞོན་གསར་པ་བསྟན་འཛིན་དབང་འདུས་ལགས། སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་བྷུ་ཆི་ལི་ (Thomas Buchli) ལགས་དང་ལས་བྱེད་བྷེ་ཊི་ན་ (Bettina Eckert) ལགས། སུད་སིའི་བོད་ཀྱི་བུད་མེད་ཚོགས་པའི་ཚོགས་གཙོ་བདེ་སྐྱིད་ལགས། ཡུ་རོབ་བོད་ཀྱི་གཞོན་ནུ་ཚོགས་པའི་ཚོགས་གཙོ་བཀྲ་ཤིས་ལགས་དང་ཚོགས་གཞོན་དགྲ་ལྷ་ལགས་བཅས་ལྷན་བཅར་གནང་ཡོད།སུད་སིའི་གྲོས་ཚོགས་གོང་མའི་གྲོས་ཚོགས་འཐུས་མི་ཧྥེ་བྷི་ཡེན་མོ་ལི་ནཱ་མཆོག་གིས་མུ་མཐུད་བོད་དོན་དང་བོད་མི་རྣམས་ལ་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད། བོད་མི་གྲངས་ ༣༠༠ ཙམ་ལ་སྐྱབས་བཅོལ་ངོས་འཛིན་གྱི་ཡིག་ཆ་ཐོབ་ཐབས་སུ་སུད་བོད་མཛའ་འབྲེལ་ཚོགས་པ་དང་། སུད་སི་དང་ལིག་ཏེན་སིཊཡན་བོད་རིགས་སྤྱི་མཐུན་ཚོགས་པ། སུད་སིའི་བོད་ཀྱི་བུད་མེད་ཚོགས་པ། ཡུ་རོབ་བོད་ཀྱི་གཞོན་ནུ་ཚོགས་པ་བཅས་ནས་གཞི་རྒྱ་ཆེ་བའི་མཚན་རྟགས་བསྡུ་རུབ་ཀྱི་ལས་འགུལ་སྤེལ་ཡོད། 

ལོ་གཉིས་ཀྱི་གོང་སུད་སིའི་གཞུང་གིས་སུད་སིའི་སྐྱབས་བཅོལ་བའི་ཁྲིམས་བསྐྱར་བཅོས་གནང་བར་བརྟེན་བོད་མི་སྐྱབས་བཅོལ་ཞུ་མཁན་གྲངས་ ༣༠༠ ཙམ་ལ་སྐྱབས་བཅོལ་བའི་ཡིག་ཆ་མ་རག་པའི་དཀའ་ངལ་འཕྲད་བཞིན་ཡོད་པ་བཅས།།