༠༨།༦།༠༢
དེ་སྔའི་ངོ་རྒོལ་ནང་ཞུགས་མཁན་ཁག་ཅིག་འཛིན་བཟུང་བྱས་པ།
ཕྱི་ཟླ་ ༥ ཚེས་ ༢༤ ཉིན་དཀར་མཛེས་ས་ཁུལ་གསེར་ཐར་རྫོང་མཁན་ལེབ་ཤང་ཚེ་ཤེས་སྡེ་བ་ནས་ཡིན་པའི་གཟུངས་སྐྱབས་ཞེས་པ་ཉི་སྟོད་ཤང་ནས་རྫོང་སྤྱི་བདེ་ཉེན་རྟོག་པས་འཛིན་བཟུང་བྱས་འདུག ཁོང་དེ་སྔ་ཕྱི་ཟླ་ ༣ ཚེས་ ༢༠ ཉིན་གསེར་ཐར་རྫོང་ཁོངས་ཀྱི་ཉི་ཆུ་ས་གནས་སུ་ངོ་རྒོལ་བྱུང་བའི་ཁོངས་མཉམ་ཞུགས་བྱས་ཏེ་རྨས་སྐྱོན་ཕོག་ཡོད།
གཞན་ཡང་ཤོས་ཐལ་སྡེ་བ་ནས་ཡིན་པའི་འབྲུག་པོའི་བཟའ་ཟླ་བུད་མེད་རང་ལོ་ ༣༠ ཙམ་ཡིན་པ་ཞིག་ཀྱང་རྫོང་ཉེན་རྟོག་པས་འཛིན་བཟུང་བྱས་འདུག
ཕྱི་ཟླ་ ༥ ཚེས་ ༡༦ ཡས་མས་སུ་བོད་མི་གསུམ་སྟེ་རིགས་བདག་དང་། སྨན་སྐྱབས། གོས་གསོ་བཅས་ཀྱང་འཛིན་བཟུང་བྱས་ཡོད་པའི་གནས་ཚུལ་འདུག ཁོང་གསུམ་པོ་ནི་གསེར་ཐར་རྫོང་ཉི་སྟོད་ཤང་ཕུ་འུ་སྡེ་བར་ཕྱི་ཟླ་ ༣ ཚེས་ ༡༨ ཉིན་ངོ་རྒོལ་བྱེད་མཁན་གྲས་ཡིན་ཞིང་།སྐབས་དེར་འཛིན་བཟུང་མ་ཐུབ་སྟབས་རྒྱ་གཞུང་འབྲེལ་ཡོད་ཚན་པས་ངོ་རྒོལ་བྱེད་མི་ཁག་འཛིན་བཟུང་བྱ་རྒྱུའི་མིང་གཞུང་བརྡ་ཐོ་བཏང་བའི་གྲས་སུ་ཡོད་འདུག
ཀིརྟི་དགོན་པའི་གྲྭ་གཉིས་ཀྱིས་སློབ་གསོར་དང་ལེན་མ་བྱས་པར་འཛིན་བཟུང་བྱུང་བ།
ཕྱི་ཟླ་ ༥ ཚེས་ ༢༣ ཉིན་གྱི་སྔ་དྲོའི་ཆུ་ཚོད་ ༩།༠༠ ཐོག་ཨ་མདོ་རྔ་བ་རྫོང་གི་སྤྱི་བདེ་ཉེན་རྟོག་པས་ཀིརྟི་དགོན་པའི་གྲྭ་བློ་བཟང་རྡོ་རྗེ་དང་། ཀུན་དགའ་གཉིས་དགོན་པ་ནས་འཛིན་བཟུང་བྱས་འདུག དེ་ཡང་དགོན་པར་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་སྐབས་ཁོང་གཉིས་ཀྱིས་རྣམ་འགྱུར་ཡག་པོ་མ་བསྟན་པའི་རྒྱུ་རྐྱེན་འོག་འཇུ་བཟུང་བྱས་པ་ཞིག་ཡིན་འདུག
དིང་རི་ཤེལ་དཀར་ཆོས་སྡེའི་གྲྭ་པ་ཚོས་སློབ་གསོའི་ལས་འགུལ་དང་ལེན་མ་ཞུས་པར་གྲྭ་པ་ ༡༢ འཛིན་བཟུང་བྱུང་བ།
ཕྱི་ཟླ་ ༥ ཚེས་ ༡༩ ཉིན་སྟོད་དིང་རི་རྫོང་ཁོངས་ཤེལ་དཀར་ཆོས་སྡེ།ར་རྒྱལ་གཅེས་རིང་ལུགས་ཟེར་བའི་སློབ་གསོའི་ལས་འགུལ་སྤེལ་སྐབས་དགེ་འདུན་པ་ཚོས་དང་ལེན་མ་བྱས་པར་བརྟེན། དགོན་པའི་དམངས་གཙོ་བདག་གཉེར་ཨུ་ཡོན་ལྷན་ཁང་གི་ཨུ་ཡོན་གྲྭ་མཁྱེན་རབ་མཐར་ཕྱིན་དང་། དེ་མིན་གྲྭ་ཆོས་དབང་བསྟན་འཛིན། བསྟན་འཛིན་དགེ་འཕེལ། མཁྱེན་རབ་བཀྲིས། སྟོབས་རྒྱལ། བསྟན་འཛིན་ཚེ་རིང་། བློ་བཟང་འཇིགས་མེད། མཁྱེན་རབ་ཉི་མ། བཀྲིས། བསྟན་པ། བསམ་གཏན། ཆོས་ལྡན་བཅས་དགེ་འདུན་པ་བཅུ་གཉིས་ ༡༢ རྫོང་སྤྱི་བདེ་ཉེན་རྟོག་པས་ལམ་འཕྲལ་འཛིན་བཟུང་བྱས་འདུག་པ་མ་ཟད། ཕྱི་མི་དགོན་པར་གནས་མཇལ་དུ་མི་གཏོང་བ་དང་། གྲྭ་པ་རྣམས་ཕྱིར་ཐོན་དུ་མི་བཅུག་པ། ལག་ཐོག་ཁ་པར་བཙན་འཕྲོག་བྱས་པ་བཅས་ཀྱིས་ཕྱི་ཕྱོགས་སུ་གནས་ཚུལ་ཁྱབ་སྤེལ་འགྲོ་རྒྱུར་བཀག་འགོ ག་བྱེད་མུས་དང་།གྲྭ་ཤག་ཁག་ཀྱང་སྔོག་བཤེར་བྱས་འདུག
འཛིན་བཟུང་བྱས་པའི་ཁྲོད་ནས་གྲྭ་པ་ ༤ དིང་རི་རྫོང་བཙོན་ཁང་དུ་བཀག་ཉར་བྱས་འདུག་པ་དང་།འཕྲོས་གྲྭ་པ་ ༨ གཞིས་རྩེ་ས་ཁུལ་དུ་འཁྲིད་ཡོད་པའི་གནས་ཚུལ་ཐོན་འདུག
དགོན་པའི་དམངས་གཙོ་བདག་གཉེར་ཨུ་ཡོན་ལྷན་ཁང་གི་ཨུ་ཡོན་བློ་བཟང་སྱིན་པ་ཞུ་བ་ཞིག་ཕྱི་ཟླ་ ༣ པའི་ནང་ལྷ་སར་ཡོད་པར་བརྟེན། ལྷ་སའི་ཞི་རྒོལ་དུ་ཞུགས་ཡོད་པར་བསྙད་དེ་བཀག་ཉར་བྱས་ཡོད་འདུག་ཀྱང་། ཕྱི་ཟླ་ ༥ ཚེས་ཤར་དུ་གློད་གྲོལ་བཏང་འདུག འོན་ཀྱང་ཤེལ་དཀར་ཆོས་སྡེ་དགོན་པར་གོང་གསལ་གནས་ཚུལ་བྱུང་རྗེས་ཁོང་ཚོ་ངན་འབྲེལ་ཡོད་པར་དོགས་ཏེ་ཁོང་ཡང་འཛིན་བཟུང་བྱས་ཡོད་འདུག
ཤེལ་དཀར་ཆོས་སྡེ་དགོན་པའི་གྲྭ་པ་ཁག་ཅིག་ནས་དེ་སྔ་ཕྱི་ལོ་ ༡༩༩༣ ལོ་སོགས་སུ་ངོ་རྒོལ་གྱི་ལས་འགུལ་སྤེལ་བར་འཛིན་བཟུང་བཙོན་བཅུག་བྱུང་བའི་གནས་ཚུལ་ཐོན་མྱོང་ཡོད།།
