༢༠༡༡ ཟླ་ ༧ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༢༢ ནས་ ༢༤ བར་བྱང་ཨ་ཕི་རི་ཀའི་ནང་དུ་ཡོད་པའི་ཏུ་ནི་ཤི་ཡའི་རྒྱལ་ཁབ་ཀྱི་རྒྱལ་ས་ཏུ་ནི་སིའི་(Tunis)ནང་ཨི་ཊ་ལིའི་ཆབ་སྲིད་ཚོགས་པ་(Nonviolent Radical party Transnational and Transparty General Council) ཞེས་པས་གོ་སྒྲིག་འོག་ཚོགས་འདུ་ཞིག་ཚོགས་ཡོད། བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་ཀྱང་ལྷན་ཚོགས་སུ་མགྲོན་འབོད་ལྟར་ལྷན་ཞུགས་ཀྱིས་གསུང་བཤད་གནང་ཡོད། ཕྱོགས་མཚུངས་ལྷན་ཚོགས་དེར་ཨ་རི་དང་ཨི་ཊ་ལི། ཨི་ཇིབ། ཨལ་བྷེ་ནི་ཡ། སི་པེན། བྷ་རེན། ཨུ་རུ་སུ། ནི་ཇེ་རི་ཡ། ཏུ་ནེ་སི་ཡ་སོགས་རྒྱལ་ཁབ་ ༢༤ ཙམ་གྱི་གྲོས་ཚོགས་འཐུས་མི་དང་། ཆབ་སྲིད་མི་སྣ། རྩོམ་སྒྲིག་པ་དང་ཉམས་ཞིབ་པ་སོགས་གནད་ཡོད་མི་སྣ་ ༨༣ ཙམ་མཉམ་ཞུགས་གནང་ཡོད།
དེ་ཡང་ཕྱི་ཚེས་ ༢༡ ཉིན་གྱི་ཕྱེད་ཡོལ་ཆུ་ཚོད་ ༣ ཐོག་པེ་ལེ་སིའི་(Palais des Congres)མགྲོན་ཁང་དུ་ལྷན་ཚོགས་ཀྱི་དམིགས་ཡུལ་དང་འབྲེལ་བའི་གསར་འགོད་གསལ་བསྒྲགས་སྤེལ། དགོང་དྲོའི་ཆུ་ཚོད་ ༨།༣༠ ཐོག་ཕྱོགས་མཐའ་ཁག་ནས་ཚོགས་འདུར་ཕེབས་མཁན་སྐུ་མགྲོན་ཚོར་ཕེབས་བསུའི་མཛད་སྒོ་གཟབ་རྒྱས་ངང་ཚོགས་ཡོད།
ཕྱི་ཚེས་ ༢༢ ཉིན་ཚོགས་འདུ་དབུ་འཛུགས་ཀྱི་མཛད་སྒོ་ཚོགས་ཡོད།
ཉིན་གསུམ་གྱི་ལྷན་ཚོགས་དེའི་རིང་ཡུལ་གྲུ་འདྲ་མིན་ནས་ཕེབས་པའི་སྐུ་ཚབ་འཐུས་མི་རྣམས་ཀྱིས་ཨ་རབ་རྒྱལ་ཁབ་ཁག་གི་ནང་ཆབ་སྲིད་འཕོ་འགྱུར་འགྲོ་བཞིན་པའི་གནས་སྟངས་དང་། འགྲོ་བ་མིའི་ཐོབ་ཐང་སྲུང་སྐྱོབ་ཆེད་རྒྱལ་སྤྱིའི་ཁྲིམས་ལུགས་ཀྱི་དབང་ཆའི་ཁྱབ་ཚད། ཡུ་རོབ་དང་ཨ་རབ་ཡུལ་གྲུའི་ནང་ཞི་བདེ་དང་མང་གཙོའི་ལྟ་གྲུབ། ཚན་རིག་ཉམས་ཞིབ་ཀྱི་རང་དབང་སླད་རྒྱལ་སྤྱིའི་ཚོགས་པ་ཞེས་པའི་བརྗོད་གཞི་འདྲ་མིན་ཐོག་གསུང་བཤད་དང་ཆེད་རྩོམ་སོགས་སྒྲོགས་སྦྱང་གནང་ཡོད་པ་མ་ཟད། སྐབས་དེར་བོད་མི་མང་སྤྱི་འཐུས་ཚོགས་གཞོན་མཆོག་གིས་ཚོགས་པ་དེས་བོད་དོན་ལ་རྒྱབ་སྐྱོར་གནང་བར་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་སྦྲགས།
ཉེ་ལམ་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་རྣམས་མང་ཚོགས་ཀྱིས་འོས་འདེམས་བྱས་པའི་དབུ་ཁྲི་ཚོར་རྩིས་སྤྲོད་མཛད་པའི་མང་གཙོའི་ལམ་བཟང་ཡང་དག་པ་ཕྱག་བསྟར་མཛད་ཡོད་སྐོར་དང་། རྒྱ་ནག་གིས་བོད་ནང་དབང་བསྒྱུར་བྱས་པ་ནས་བཟུང་ཉིན་རེ་ནས་ཉིན་རེར་བོད་ནང་བོད་མི་ཚོར་འགྲོ་བ་མིའི་ཐོབ་ཐང་དང་ཆོས་དད་རང་དབང། ཁོར་ཡུག་གནས་སྟངས་ཇེ་སྡུག་ཏུ་འགྲོ་བཞིན་ཡོད་པ་མ་ཟད། བོད་མི་འབྲོག་པ་རྣམས་ལ་རྒྱ་གཞུང་གིས་བཙན་དབང་འོག་རྩྭ་ཐང་ནས་ཕྱིར་འབུད་བྱས་ཏེ་ཁང་ཁྱིམ་གསར་འཛུགས་བྱེད་རྒྱུར་ཁ་གཡར་ཏེ་གཞུང་ནས་བུ་ལོན་མང་པོ་ལེན་འཇུག་པ་སོགས་ཀྱི་དཀའ་ངལ་འཕྲད་བཞིན་ཡོད་པ་མ་ཟད། རྒྱ་བོད་མི་རིགས་གཉིས་དབར་དཔལ་འབྱོར་གྱི་གནས་སྟངས་ཆ་མི་སྙོམ་པ་ཆགས་པར་བརྟེན་མི་རིགས་གཉིས་དབར་འཁོན་རྩོད་ཡོང་གཞི་བཟོ་བཞིན་ཡོད་པ་དང་། རང་ཕྱོགས་ནས་རང་བཙན་མ་རྩོད་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཆེད་རྒྱ་ནག་དཔོན་རིགས་ཚོ་དང་འབྲེལ་མོལ་བྱ་རྒྱུའི་འབད་བརྩོན་ཇི་ཙམ་བྱས་ཀྱང་རྒྱ་ནག་གཞུང་ཕྱོགས་ནས་བཟང་ཕྱོགས་ཀྱི་རྣམ་པ་གང་ཡང་མི་སྟོན་པའི་ཁར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ལ་ཁ་བྲལ་བ་ཞེས་སྙོན་འཛུགས་ཞུས་དང་ཞུ་མུས་ཡིན། བོད་ནང་ཆོས་དད་རང་དབང་དང་བོད་ཀྱི་སྐད་ཡིག་རིག་གཞུང་དང་བཅས་པར་དམ་བསྒྲགས་ཆེ་རུ་གཏོང་བཞིན་ཡོད་པའི་གནས་སྟངས་སོགས་ཞིབ་ཕྲ་གསལ་བཤད་གནང་ཡོད། དེ་བཞིན་ཚོགས་གཞོན་མཆོག་གིས་སྐབས་དེར་བོད་ནི་ཨེ་ཤི་ཡའི་ཆུ་ཆེན་མང་པོའི་ཆུ་མགོ་ཡིན་པ་མ་ཟད། བོད་དེ་བཞིན་རྒྱ་ནག་དང་རྒྱ་གར་ལྟ་བུ་སྟོབས་ཆེན་གྱི་ཁྱིམ་མཚེས་རྒྱལ་ཁབ་གཉིས་ཀྱི་དབུས་སུ་ཆགས་ཡོད་པར་བརྟེན་བོད་ཀྱི་གནད་དོན་སེལ་ཐུབ་པ་བྱུང་ཚེ་སྤྱིར་འཛམ་གླིང་སྤྱི་དང་བྱེ་བྲག་ཨེ་ཤི་ཡའི་མངའ་ཁུལ་དུ་དོན་དམ་གྱི་བརྟན་ལྷིང་དང་ཞི་བདེ་ལྷིང་འཇགས་ཡོང་རྒྱུར་ཏན་ཏན་ཕན་ཐོགས་ཆེན་པོ་ཡོད་པ་དང། བོད་མི་ཚོར་མཚོན་ན་བོད་ཀྱི་གནད་དོན་སེལ་ཆེད་འཚེ་མེད་ཞི་བའི་ཐབས་ལམ་ཉག་གཅིག་ཐོག་འགྲོ་རྒྱུའི་ཆོད་སེམས་བརྟན་པོ་ཡོད་སྐོར་སོགས་ཀྱི་གསུང་བཤད་གནང་བར་ཚོགས་ཞུགས་པ་མང་པོས་ཚོགས་གཞོན་གྱི་གསུང་བཤད་ལ་རྒྱབ་སྐྱོར་དང་དགའ་བསུ་ཞུས་ཡོད་པ་་བཅས།།
