༢༠༡༡ ཟླ་ ༧ ཚེས་ ༢༦ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༨ སྔ་དྲོ་ཆུ་ཚོད་ ༨།༣༠ ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་ཆོས་རར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་དབུས་བོད་མིའི་སྒྲིག་འཛུགས་ཀྱི་སྐབས་གསུམ་པའི་བཀའ་ཁྲིར་འདེམས་འཐོན་བྱུང་བ་མཁས་དབང་བློ་བཟང་སེང་གེ་མཆོག་གིས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་གི་དྲུང་ནས་དམ་འབུལ་ཞུ་རྒྱུ་ཡིན་འདུག
དམ་འབུལ་གྱི་མཛད་སྒོ་གྲུབ་མཚམས་༸གོང་ས་མཆོག་གིས་བཀའ་སློབ་སྩལ་རྒྱུ་དང། དེ་རྗེས་འདེམས་འཐོན་བཀའ་ཁྲི་མཆོག་གིས་གསུང་བཤད་གནང་རྒྱུ་ཡིན་འདུག དེ་བཞིན་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན་གཉིས་དང་སྤྱི་འཐུས་ཚོགས་གཙོ་མཆོག བཀའ་ཁྲི་ཟམ་གདོང་རིན་པོ་ཆེ་མཆོག སྤྱི་འཐུས་ཚོགས་གཞོན་མཆོག དབུས་འོས་བསྡུ་ལས་ཁང་དང་ལས་བྱེད་འདེམས་ལྷན་གྱི་འགན་འཛིན་གཅིག་ལྕོགས་འཇམ་ དཔལ་ཆོས་བཟང་མཆོག་དང་འགན་འཛིན་ལས་འཕར་རྣམ་གཉིས།  དབུས་བོད་མིའི་སྒྲིག་འཛུགས་ཀྱི་རྩིས་ཞིབ་སྤྱི་ཁྱབ་འགན་འཛིན་མཆོག སྤྱི་འཐུས་རྒྱུན་ལས་རྣམ་པ། དབུས་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ཟུང་དྲུང་ཡན་གྱི་དྲུང་ཆེ་ཆུང་རྣམ་པ་མཛད་སྒོའི་ཐོགས་ལྷན་ཞུགས་གནང་རྒྱུ་མ་ཟད། སྲི་ཞུའི་མཛད་གཙོ་རྣམ་པས་བཀའ་ཁྲི་གསར་པ་མཆོག་ལ་མཇལ་དར་འབུལ་རྒྱུ་ཡིན་འདུག
ཕྱོགས་མཚུངས་ཕྱི་ཚེས་ ༩ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་ཆོས་རར་སྐབས་གསུམ་པའི་བཀའ་ཁྲི་མཁས་དབང་བློ་བཟང་སེང་གེ་མཆོག་མཛད་སྒོའི་ཐོག་གདན་ཞུས་གནང་སྟེ་ཕྱི་ནང་སྐུ་མགྲོན་རྣམས་དང་ཕྱི་རྒྱལ་གྲོས་ཚོགས་ཀྱི་འཐུས་མི་རྣམ་པ། བོད་ཀྱི་གྲོགས་པོ་རྣམ་པ། རྒྱ་རིགས་ཁག་གཅིག་བཅས་ཀྱིས་འཚམས་འདྲི་ཞུ་རྒྱུ་ཡིན་འདུག་པ་བཅས། །