༢༠༡༡ ཟླ་ ༧ ཚེས་ ༡༩ རེས་གཟའ་མིག་དམར།
ངག་དབང་ཕུན་ཚོགས་ལགས།
༄༅། འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༡༡ ཟླ་ ༧ པའི་ཚེས་ ༡༥ ཉིན་དཀར་མཛེས་རྫོང་ཁྲོམ་གཞུང་དུ་དཀར་མཛེས་དར་རྒྱས་དགོན་ཁུལ་རི་མགོ་གྲོང་དུས་ཁག་བརྒྱད་པ་ནས་ཡིན་པ་ངག་དབང་ཕུན་ཚོགས་ལགས་སོགས་ཀྱིས་སྔ་དྲོའི་ཆུ་ཚོད་ ༩ པ་ཙམ་དུ་ཞི་བའི་སྐད་འབོད་བྱས་རྗེས་ས་གནས་ཉེན་རྟོག་པས་བཀག་འགོག་བྱ་རྒྱུའི་ཆེད་ཉེས་རྡུང་ཚབས་ཆེ་བཏང་བའི་གནས་ཚུལ་ཐོན་འདུག་ཅིང་། ཁོང་རྣམས་འཛིན་བཟུང་བྱས་རྗེས་ད་ལྟའི་གནས་སྟངས་ཇི་ཡིན་ཤེས་རྟོགས་མེད་པར་གྱུར་ཡོད་པ་རེད།
བསམ་འཕེལ་དོན་གྲུབ།
ངག་དབང་ཕུན་ཚོགས་ལགས་ནི་ད་ལྟ་རང་ལོ་ ༣༤ ལྷག་སོན་གྱི་ཡོད་པ་དང་། ཕ་མིང་ལ་དགེ་འདུན་བཀྲ་ཤིས་དང་། མ་མིང་ལ་ཡེ་ཤེས་མཁའ་འགྲོ་ཚེ་འདས་ཞུ་བ་དང་། ཁོང་དེ་སྔ་རྒྱ་གར་དུ་ཡོང་སྟེ་སེ་ར་དགོན་པར་སློབ་གཉེར་གྱིས་བོད་དུ་ཕྱིར་ལོག་རྗེས་བཟའ་ཟླ་ཚེ་རིང་སྒྲོལ་མ་གཉེན་སྒྲིག་བྱུང་སྟེ་ད་ལྟ་ཕྲུ་གུ་གཉིས་ཀྱང་ཡོད་པ་རེད། ཁོང་འཛིན་བཟུང་བྱས་རྗེས་ད་ལྟའི་ཆར་གནས་སྟངས་ཇི་ཡིན་ཤེས་རྟོགས་མེད་པར་གྱུར་ཡོད།
བློ་བཟང་ཕུན་ཚོགས།
དེ་མིན་ཡང་ཟླ་ ༧ ཚེས་ ༡༠ ཉིན་དཀར་མཛེས་རྫོང་ཐོག་ཏུ་ཉིན་རྒྱབ་ཆུ་ཚོད་ ༤ ཙམ་དུ་ཕོ་གསར་བཞི་ཙམ་ནས་ཞི་བའི་ངོ་རྒོལ་བྱས་འདུག་ཅིང་། ངོ་རྒོོལ་བྱེད་མཁན་དེ་དག་ནི་དཀར་མཛེས་རྫོང་ལམ་སྣ་གྲོང་ཚོ་ནས་ཡིན་པ་རང་ལོ་ ༢༣ ཙམ་དུ་སོན་པ་བསམ་འཕེལ་དོན་གྲུབ། ཕ་མིང་ལ་ཤེས་རབ་རྒྱ་མཚོ་དང་། མ་མིང་ལ་དབྱང་ཅན་ལྷ་མོ་ཅན་བརྗོད་ཀྱི་འདུག དཀར་མཛེས་རི་མགོ་གྲོང་འབྲུག་ཐར་ཚང་གི་རང་ལོ་ ༡༧ ཙམ་དུ་སོན་པ་བློ་བཟང་ཕུན་ཚོགས། ཕ་མིང་ལ་དཀོན་མཆོག་ཚེ་བརྟན། མ་ནི་ཚེ་འདས་དབང་ཕྱུག་ཡིན་འདུག དཀར་མཛེས་ནོར་འཛིན་གྲོང་ནས་ཡིན་པ་བློ་བཟང་ལྷུན་གྲུབ། མ་མིང་ཨ་བདེ་བཅས་ཡིན་འདུག་ཅིང་། ད་དུང་ཁོང་ཚོ་གསུམ་མཉམ་ངོ་རྒོལ་བྱེད་མཁན་གཞན་ཞིག་ཀྱང་ཡོད་འདུག་པ་ཞིབ་གནས་ཤེས་རྟོགས་མི་འདུག་ཀྱང་། ན་གཞོན་དེ་དག་གིས་རྫོང་ཐོག་ཏུ་ཞི་བའི་སྐད་འབོད་བྱས་རྗེས་ཉེས་རྡུང་ཚབས་ཆེ་བཏང་སྟེ་འཛིན་བཟུང་བྱས་རྗེས་ད་ལྟའི་གནས་སྟངས་ཇི་ཡིན་ཤེས་རྟོགས་མེད་པར་གྱུར་ཡོད་པ་བཅས།།
