ཕྱི་ལོ་ ༢༠༢༠ ཟླ་ ༡༢ ཚེས་ ༢༢ རེས་གཟའ་མིག་དམར།
༄༅། །བོད་རྔ་བ་རྫོང་རྨེའུ་རུ་མ་ནས་ཡིན་པའི་བོད་ཀྱི་ཆབ་སྲིད་བཙོན་ཟུར་ཨ་ཀྱཱ་ཀྱཱ་ལགས་ཀྱི་ལོ་ ༥ བཙོན་འཇུག་དུས་ཡུན་རྫོགས་ཏེ་ཀློད་གྲོལ་ཐོབ་ཡོད་འདུག
དེ་ཡང་ཨེ་ཤེ་ཡ་རང་དབང་རླུང་འཕྲིན་ཁང་ནས་ནང་གནས་ཚུལ་སྤེལ་གསལ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༦ ལོར་བོད་མི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མཆོག་གི་༸སྐུའི་གྱ་སྟོན་གོ་སྒྲིག་རྒྱ་ཆེར་གནང་བ་སོགས་ལ་ཉེས་འཛུགས་ཀྱིས་འཛིན་བཟུང་བརྒྱུད་རྔ་བ་བོད་རིགས་རང་སྐྱོང་ས་ཁུལ་གྱི་འབར་ཁམས་འབྲིང་རིམ་མི་དམངས་ཁྲིམས་ཁང་གིས་ལོ་ལྔ་ལ་དུས་བཀག་བཙོན་འཇུག་གི་ཁྲིམས་ཐག་བཅད་པ་མདོ་སྨད་རྔ་བ་རྫོང་གི་རྨེའུ་རུ་མའི་བོད་མི་ཨ་ཀྱཱ་ཀྱཱ་ལགས་བཙོན་འཇུག་དུས་ཡུན་གྱི་ཁྲིམས་ཁ་བཀངས་ནས་ཕྱི་ཟླ་ ༡༢ ཚེས་ ༡༠ ཉིན་མོར་གློད་བཀྲོལ་ཐོབ་ཡོད་པ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་སུ་བོད་ནས་ཁུངས་ལྡན་ལྡན་གནས་ཚུལ་འབྱོར་བར་ངོ་སྤྲོད་གནང་ཡོད།
ཆབ་སྲིད་བཙོན་པ་ཨ་ཀྱཱ་ཀྱཱ་ལགས་དང་ལྷན་དུ་ལོ་དེར་རྔ་བ་ནས་ཡིན་པ་བོད་མི་གཞན་དགུ་ལ་བཙོན་འཇུག་ཁྲིམས་ཐག་བཅད་ཡོད་པ་རྣམས་ད་དུང་ཡང་བཙོན་གྲོལ་ཐོབ་མེད་པ་དང་། སྐབས་དེར་འཛིན་བཟུང་གི་གྲྭ་འབྲུག་སྒྲ་ལྟ་བུ་ནི་ཁྲིམས་ཐག་མ་བཅད་པའི་ལོ་གཅིག་གོང་ནས་འཛིན་བཟུང་བྱས་ཡོད་པ་དང་། ཨ་ཀྱཱ་ཀྱཱ་ལགས་ཁྲིམས་ཐག་མ་བཅད་པའི་ཟླ་ ༥ གོང་ནས་འཛིན་བཟུང་བྱས་ཡོད་སྟབས། ཨ་ཀྱཱ་ཀྱཱ་ལགས་ཁྱོན་ལོ་ ༦ མ་ཟིན་ཙམ་བཙོན་འཇུག་བྱས་ཡོད་པ་རེད་ཅེས་འགྲེལ་བརྗོད་གནང་གི་འདུག་པ་མ་ཟད།
ཨ་ཀྱཱ་ཀྱཱ་ལགས་ནི་ཕྱི་ལོ་༢༠༡༡ལོར་རྔ་བ་ཀིརྟི་དགོན་པའི་གྲྭ་བློ་བཟང་ཕུན་ཚོགས་ལགས་ཀྱིས་རང་ལུར་མེར་སྲེག་གནང་སྐབས། ངོ་རྒོལ་སྐད་འབོད་གནང་བའི་རྐྱེན་གྱིས་འཛིན་བཟུང་གིས་ལོ་གསུམ་ལྷག་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་ཟུར་ཞིག་ཡིན་པ་ཡང་འགྲེལ་བརྗོད་གནང་ཡོད་པ་བཅས། །
