༢༠༡༡ ཟླ་ ༧ ཚེས་ ༡༤ རེས་གཟའ་ཕུར་བུ།
པར་ལེན་སྐུ་སྒེར་ཡིག་ཚང་གི་པར་པ་ཆོས་འབྱོར་ལགས།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིར་རྟེན་གཞི་བྱས་པའི་བྱམས་བརྩེའི་གཅེས་སྐྱོང་ཁང་གིས་ (Caring Institute) ཨ་མ་ཊེ་རེ་སའི་རྒྱལ་སྤྱིའི་གཟེངས་རྟགས་(Mother Teresa International Award) འབུལ་ལམ་ཞུས་ཡོད། དེ་ཡང་གོང་ཚེས་ཉིན་༸གོང་ས་མཆོག་གིས་ཨ་རིའི་གྲོས་ཚོགས་གོང་མའི་འཐུས་མི་རྣམས་དང་ལྷན་མཇལ་འཕྲད་གྲུབ་མཚམས། བྱམས་བརྩེའི་གཅེས་སྐྱོང་ཁང་དུ་ཆིབས་སྒྱུར་བསྐྱངས་ཡོད། ༸གོང་ས་མཆོག་གིས་སྐུ་ཚེ་ཧྲིལ་པོར་བྱམས་བརྩེའི་རིན་ཐང་གོང་འཕེལ་གཏོང་གནང་གི་མཛད་རྗེས་དང་སྤྱི་ཚོགས་ཞབས་ཞུའི་སླད་ཐུགས་བརྩོན་མཛད་པར་ངོས་འཛིན་གྱིས་བསྟི་གནས་ཁང་ནས་མགོན་པོ་གང་ཉིད་མཆོག་ལ་གཅེས་སྐྱོང་གཟེངས་ (Caring Award) རྟགས་འབུལ་ལམ་ཞུས་ཡོད།
༸གོང་ས་མཆོག་ལ་གཟེངས་རྟགས་འབུལ་མཁན་རྣམས་ནི་དེ་སྔའི་ཨ་རིའི་གྲོས་ཚོགས་ཀྱི་འཐུས་མི་རོ་བྷར་ཊི་ཌོལ་མཆོག་དང། ཊོམ་ཌེ་ཤལ་(Tom Daschle) མཆོག གཅེས་སྐྱོང་བསྟི་གནས་ཁང་གི་འཛིན་སྐྱོང་འགན་འཛིན་སྐུ་ཞབས་ཝལ་ཇེ་ཧ་ལ་མན་ཌ་རི་སི་(Val.J Halamandaris) ལགས་བཅས་ཡིན་འདུག
སྐབས་དེར་སྐུ་ཞབས་ཊོམ་ཌེ་ཤལ་མཆོག་གིས་གསུང་དོན། དེ་རིང་ང་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཁ་ཞེ་གཉིས་མེད་ཐོག་ནས་མི་མང་རྣམས་ལ་བྱམས་བརྩེ་དང་འཚེ་མེད་ཞི་བ་གོང་མཐོར་གཏོང་བའི་མཛད་རྗེས་ལ་ངོས་འཛིན་ཞུ་རྒྱུའི་གོ་སྐབས་བྱུང་བར་དགའ་སྤོབས་ཆེན་པོ་བྱུང། ཞེས་གསུང་བཤད་གནང་རྗེས་སྐུ་ཞབས་རོ་བྷར་ཊི་ཌོལ་མཆོག་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་མི་མང་ལ་བྱམས་བརྩེ་ཡང་དག་པ་ཞིག་སྤེལ་གནང་མཛད་ཡོད།
པར་ལེན་སྐུ་སྒེར་ཡིག་ཚང་གི་པར་པ་ཆོས་འབྱོར་ལགས།
བྱམས་བརྩེའི་གཅེས་སྐྱོང་བསྟི་གནས་ཁང་འདི་ཡང་གཞི་རྩའི་ལྟ་གྲུབ་འདིའི་ཐོག་བཙུགས་པ་ཞིག་ཡིན། བསྟི་གནས་ཁང་གི་དམིགས་ཡུལ་ནི་ཨ་མ་ཊེ་རི་སའི་ལམ་སྟོན་བཞིན་དེང་སང་འཛམ་གླིང་ནང་བྱམས་བརྩེ་ཕོངས་པའི་སྤྱི་ཚོགས་དེ་ལས་ལྡོག་སྟེ་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་རྒྱུ་དེ་ཡིན། ཞེས་གསུང་བཤད་གནང་རྗེས་སྐུ་ཞབས་ཧལ་མན་ཌ་རི་མཆོག་གིས་གསུང་བཤད་གནང་ཡོད་པ་མ་ཟད། སྐུ་ཞབས་རོ་བྷར་ཊི་ཌོལ་མཆོག་གིས་༸གོང་ས་མཆོག་ལ་གཟེངས་རྟགས་འབུལ་ལམ་ཞུ་རྒྱུ་བྱུང་བར་དགའ་ཚོར་བྱུང་སྐོར་ཡང་གསུང་ཡོད། སྤྱིར་བྱམས་བརྩེའི་གཅེས་སྐྱོང་ཁང་དེ་ནི་ཕྱི་ལོ་ ༡༩༨༥ ལོར་བྱམས་བརྩེ་དང་སྤྱི་ཚོགས་ཞབས་ཞུ་གོང་སྤེལ་གཏོང་ཐབས་ཆེད་བཙུགས་པ་ཞིག་ཡིན། ཨ་མ་ཊེ་རི་ས་དམ་པ་མཆོག་ལའང་གཟེངས་རྟགས་འདི་ཐོབ་མྱོང་ཡོད་པ་བཅས།།
