ཕྱི་ལོ་ ༢༠༢༠ ཟླ་ ༡༡ ཚེས་ ༡༡ རེས་གཟའ་ལྷག་པ།
༄༅། །ཏོག་དབྱིབས་གཉན་རིམ་ཁྱབ་གདལ་འགྲོ་བཞིན་པའི་དཀའ་ཚེགས་ཆེ་བའི་དུས་སྐབས་སུ་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་བོད་མི་ཉམ་ཐག་རྣམས་ལ་ཛ་དྲག་ངལ་སེལ་གྱི་རོགས་དངུལ་གནང་ཡོད་པ་དང་། ངལ་སེལ་རོགས་དངུལ་དེ་བཞིན་བོད་མི་རྒན་གཅོང་དང་ཉམ་ཐག་རྣམས་ལ་བགོ་འགྲེམས་གནང་སྟེ་བོད་མི་རྒན་གཅོང་དང་ཉམ་ཐག་རྣམས་ལ་ཕན་ཐོགས་ཆེན་པོ་བྱུང་ཡོད།
ལས་གཞི་འདི་ཉིད་ཨ་རིའི་རོགས་ཚོགས་ PRM (U.S) ནས་འདི་ལོའི་ཕྱི་ཟླ་ ༧ ནས་མ་དངུལ་གནང་སྟེ། རྒན་གཅོང་དང་ཉམ་ཐག་རྣམས་ལ་དུས་གཅིག་གི་བཟའ་ཆས་འགན་སྲུང་དང་ཟླ་བ་གསུམ་རིང་གི་འཚོ་ནོན་གནང་ཐུབ་པ་བྱུང་ཡོད།
ད་ལྟའི་གཉན་འཕྲང་ཅན་གྱི་དུས་སྐབས་འདིར་ངལ་སེལ་རོགས་རམ་འདི་ལྟ་བུ་གནང་ཐུབ་པ་དེས་ཉམ་ཐག་མང་པོར་ཕན་ཐོགས་ཆེན་པོ་བྱུང་ཡོད་པ་དང་། ནང་སྲིད་ལས་ཁུངས་ནས་ལས་གཞི་འདིར་མགོ་མཇུག་བར་གསུམ་དུ་རྒྱབ་སྐྱོར་དང་ཞལ་འདེབས་གནང་མཁན་ཡོངས་ཀྱི་བཀའ་དྲིན་ཚོར་བཞིན་ཡོད།
དེ་བཞིན་ངལ་སེལ་ལས་གཞི་སྐབས་བོད་མིའི་གཞིས་ཆགས་ཁག་གི་ས་གནས་འགོ་འཛིན་རྣམས་ཀྱིས་མཐུན་འགྱུར་གནང་བ་ལ་བརྟེན་ནས་ནང་སྲིད་ལས་ཁུངས་ནས་རྒྱ་གར་དང་འབྲུག་ནང་གི་བོད་མིའི་གཞིས་ཆགས་ ༣༨ ནང་གི་བོད་མི་ ༡༤༡༤ ལ་ཁྱོན་ངལ་སེལ་རོགས་དངུལ་ཧིན་སྒོར་ ༧༤༣༡༧༨༩ ཐམ་པ་གནང་ཐུབ་པ་བྱུང་ཡོད། དེ་དག་གི་ཁོངས་ནས་ཛ་དྲག་འཚོ་སྣོན་ཧིན་སྒོར་ ༤༨༤༥༠༠༠ གནང་ཡོད་པ་བཅས། །
