༢༠༡༡ ཟླ་ ༧ ཚེས་ ༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༢ ཉིན་བོད་མདོ་སྨད་རྔ་པ་འབྲིང་རིམ་མི་དམངས་ཁྲིམས་ཁང་ཟེར་བ་ནས་ཤར་དུང་རི་དཔེ་དེབ་རྩོམ་པ་པོ་བཀྲིས་རབ་བརྟན་ལགས་ལ་ལོ་བཞིའི་བཙོན་འཇུག་གི་ཁྲིམས་ཐག་བཅད་ཡོད་པ་མ་ཟད། ཁྲིམས་ཁང་དེ་རང་ནས་ཤར་དུང་རིའི་དཔེ་དེབ་ནང་རྩོམ་ཡིག་འབྲི་མཁན་གཞན་དོན་ཁོ་དང་བྷུདྡཱ་གཉིས་ལ་ལོ་བཞི་དང་། སྐལ་བཟང་སྦྱིན་པ་ལགས་སུ་ལོ་གསུམ་བཙོན་འཇུག་གི་ཁྲིམས་ཐག་བཅད་པའི་གསལ་བསྒྲགས་ཕྱི་ལོ་ ༢༠༡༠ ཟླ་ ༡༢ ཚེས་ ༣༠ ཉིན་བྱས་འདུག  ཤར་དུང་རིའི་དཔེ་དེབ་ཀྱི་བྱུང་རབས་ནི་དེ་སྔ་ཕྱི་ལོ་ ༢༠༠༨ ལོར་བོད་མདོ་དབུས་ཁམས་གསུམ་གྱི་ནང་རྒྱ་གཞུང་གིས་བོད་མི་ཚོར་འཛིན་པའི་སྲིད་བྱུས་དེར་བཟོད་ཐབས་བྲལ་ཏེ་བོད་མི་ཚོས་སྙིང་སྟོབས་ཆེན་པོས་རྒྱ་གཞུང་ལ་ཞི་རྒོལ་བྱས་པར་རྒྱ་ནག་གཞུང་གིས་བོད་མི་ཚོར་མི་སྤྱོད་ལས་འདས་པའི་དྲག་གནོན་ཚབས་ཆེ་བྱས་པ་དང་། ཁྲིམས་ཐོག་ནས་བོད་མི་ཞི་རྒོལ་བ་ཚོར་ཉེས་མེད་ཉེས་འཛུགས་ཀྱིས་སྲོག་ཁྲིམས་ཀྱི་མཚོན་བཙོན་འཇུག་དུས་བཀག་འདྲ་མིན་འོག་ཁྲིམས་ཐག་བཅད་པའི་གནད་དོན་དང་འབྲེལ་ནས་བྲིས་པའི་རྩོམ་ཡིག་འདྲ་མིན་ཕྱོགས་བསྒྲིགས་བྱས་པའི་དཔེ་དེབ་གཅིག་ཡིན་པ་དང་། དེབ་དེར་རྒྱ་ནག་གཞུང་གིས་རྒྱལ་ཁབ་ཁ་བྲལ་གྱི་ཉེས་འཛུགས་འོག་དམ་བསྒྲགས་བཀག་སྡོམས་བྱས་ཡོད། རྒྱ་ནག་གཞུང་གིས་རྩོམ་པ་པོ་བཀྲིས་རབ་བརྟན་ལགས་ལ་ཁྲིམས་ཐག་མ་བཅད་གོང་ལོ་གཅིག་ལྷག་ཙམ་རིང་འཛིན་བཟུང་བཀག་ཉར་བྱས་སྟབས། ཁོང་གར་ཡོད་སུས་ཀྱང་ཤེས་རྟོགས་མེད་པར་གྱུར་ཡོད། བཀྲིས་རབ་བརྟན་ལགས་ནི་བོད་མདོ་སྨད་ལན་གྲུའུ་ནང་རྟེན་གཞི་བྱས་པའི་ནུབ་བྱང་མི་རིགས་སློབ་གྲྭ་ཆེན་མོ་ (Northwest Nationalities University) ནས་སློབ་མཐར་སོན་ལ་ཉེ་བའི་སློབ་མ་ཞིག་ཡིན་འདུག ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ (ICT) ནས་ཤར་དུང་རིའི་རྩོམ་ཡིག་འགའ་ཤས་དབྱིན་སྐད་ཐོག་ཕབ་བསྒྱུར་གནང་འདུག་པ་བཅས།།