༢༠༡༡ ཟླ་ ༧ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༣༠ ཉིན་ཡུ་རོབ་སྐུ་ཚབ་དོན་གཅོད་སྐལ་བཟང་རྒྱལ་མཚན་མཆོག་གིས་བོད་རྒྱ་འབྲེལ་མོལ་མདུན་སྐྱོད་མ་ཐུབ་པ་དེ་རྒྱ་གཞུང་གི་དཔོན་རིགས་རྣམས་དོགས་པ་རྣམ་རྟོག་ཆེ་དྲགས་པ་ལས་བྱུང་བ་ཡིན་སྐོར་གསུང་དོན། ངའི་བསམ་པར་རྒྱ་ནག་གཞུང་ཕྱོགས་ནས་ད་ལྟ་རྒྱ་བོད་གཉིས་ཀྱི་འབྲེལ་ལམ་ཐོག་ནས་བོད་ཀྱི་དཀའ་རྙོག་སེལ་ཐབས་དང་། རྒྱ་བོད་གཉིས་ཀྱི་ལངས་ཕྱོགས་དེ་འགལ་ཟླ་ཆུང་དུ་འགྲོ་རྒྱུའི་གོམ་པ་མདུན་སྤོས་མ་ཐུབ་པའི་གནད་དོན་མང་དག་ཅིག་ཡོད་པ་རེད་བསམ་གྱི་ཡོད། འོན་ཀྱང་གནད་འགག་གཙོ་བོ་དེ་རྒྱ་ནག་གཞུང་གི་འགོ་ཁྲིད་རྣམས་ལ་བོད་ཀྱི་དཀའ་རྙོག་སེལ་རྒྱུའི་སྙིང་སྟོབས་དང་ཆོད་སེམས་མི་འདུག
དེ་དག་མེད་པའི་རྐྱེན་ནི་དོགས་པ་རྣམ་རྟོག་མང་པོ་ཞིག་ཡོང་གི་ཡོད་པ་རེད་བསམ་གྱི་ཡོད། ཕྱོགས་གཅིག་ནས་རྒྱ་ནག་གཞུང་གིས་ཡོངས་གྲགས་ཐོག་ངོས་ལེན་བྱས་རུང་མ་བྱས་རུང་། གནས་ཚུལ་གསལ་པོ་ཞིག་གང་རེད་དམ་ཞེ་ན། རྒྱ་ནག་གཞུང་ནས་བཅིངས་འགྲོལ་ལ་ཁ་གཡར་ནས་བོད་ལ་དྲག་པོའི་དམག་དཔུང་བེད་སྤྱོད་བཏང་སྟེ་བཙན་འཛུལ་བྱས་པ་ཞིག་རེད། དུས་དེ་ནས་བཟུང་ད་ལྟ་བར་དུ་འཛིན་པའི་སྲིད་བྱུས་དེར་གུ་བཤངས་མ་བྱས་པར་གནས་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོའི་ངོས་ནས་རང་བཙན་རྩོད་ཀྱི་མེད་ལ་ཁ་བྲལ་བྱེད་ཀྱི་མེད། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་གཉིས་ཀར་ཕན་ཐོགས་ཡོད་པའི་ལམ་ནས། བོད་ཀྱི་དཀའ་རྙོག་སེལ་རྒྱུའི་ཐག་གཅོད་གཙང་མ་བྱས་ཡོད་ཅེས་བཀའ་སློབ་རབས་དང་རིམ་པ་ཕེབས་པ་དེར་ད་ལྟ་ཡིན་ནའང་རྒྱ་ནག་གཞུང་གི་འགོ་ཁྲིད་རྣམས་ནས་དོགས་པ་རྣམ་རྟོག་ཆེ་དྲགས་པའི་དབང་གིས་མགོན་པོ་གང་ཉིད་མཆོག་གི་བཀའ་སློབ་ལ་ཡིད་ཆེས་བྱེད་ཀྱི་མི་འདུག་ཅེས་གསུངས་ཡོད།
རྩ་བའི་བོད་རྒྱ་ཞི་མོལ་མདུན་སྐྱོད་མ་ཐུབ་པའི་རྐྱེན་ནི་བཅིངས་འགྲོལ་ལ་བསྙད་ནས་དོན་དངོས་བོད་དེ་འབུ་ཆེ་བས་ཆུང་ཟོས་བྱས་སྟབས་རྒྱ་གཞུང་ལ་རང་གནོངས་ཡོད་པར་བརྟེན། བོད་མིའི་ངོས་ནས་དགོས་འདུན་གང་འདྲ་ཞིག་བཏོན་ཡང་དོགས་པ་རྣམ་རྟོག་དང་། དེ་བཞིན་རྒྱ་གཞུང་གི་འགོ་ཁྲིད་རྣམས་བསམ་བློ་གུ་དོག་པའི་རྒྱུ་མཚན་ལ་རྟེན་ནས་བྱུང་བ་ཞིག་ཡིན་པ་བཅས། །