༢༠༡༡ ཟླ་ ༦ ཚེས་ ༢༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༦ ཚེས་  ༢༢ ཉིན་ནོར་གླིང་རྟེན་བཞེངས་ཆེ་མོ་སྤེན་པ་རྡོ་རྗེ་ལགས་ནོར་གླིང་གི་ཉེ་འཁྲིས་སུ་ཡོད་པའི་ཁོང་རང་གི་གཟིམ་ཤག་ནང་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག རྟེན་བཞེངས་ཆེ་མོ་སྤེན་རྡོ་ལགས་ནི་ཕྱི་ལོ་ ༡༩༣༠ ལོར་རྩེ་གདོང་སྨོན་དཀར་གླིང་ཁང་ཆུང་ལྟག་པ་ཞེས་པའི་ཁྱིམ་དུ་འཁྲུངས་ཏེ་ཆུང་དུས་བོད་ཡིག་འབྲི་ཀློག་ཤེས་པ་སྦྱངས། དེ་རྗེས་དགུང་ལོ་ ༡༤ སྟེང་ཕྱི་ལོ་ ༡༩༤༤ ལོ་ནས་རང་ཉིད་ཀྱི་གཅེན་པོ་འཛམ་ལྷ་རྡོ་རྗེ་ལགས་ཀྱི་དྲུང་ནས་རྟེན་བཞེངས་ཀྱི་སློབ་སྦྱོང་མཐར་ཕྱིན་པ་གནང་། དེ་ནས་བོད་ལྗོངས་ལྷ་ལྡན་གཙུག་ལག་ཁང་དང་གཞིས་རྩེ་བཀྲ་ཤིས་ལྷུན་པོ། ལྷོ་ཤེལ་དཀར་ཆོས་སྡེ་དང་ཤངས་དགའ་ལྡན་ཆོས་འཁོར་དགོན་སོགས་དགོན་དང་གཙུག་ལག་ཁང་མང་པོར་རྟེན་བཞེངས་ཀྱི་ཕྱག་ལས་མང་དག་ཅིག་གནང་མྱོང་ཡོད། ཕྱི་ལོ་ ༡༩༦༣ ལོར་ཁོང་བཙན་བྱོལ་དུ་ཕེབས་འདུག  ཕྱི་ལོ་ ༡༩༦༧ ལོར་རྡ་སར་འབྱོར་རྗེས་གནས་ཆུང་དགོན་དང་དགའ་གདོང་དགོན་གཉིས་ཀྱི་སྐུ་བརྙན་གསར་བཞེངས་ཀྱི་ཕྱག་ལས་གནང་ཡོད་པ་མ་ཟད། ལྷག་པར་རྡ་ས་གཙུག་ལག་ཁང་གསར་བཞེངས་གྲུབ་རྗེས་དེའི་རྟེན་གྱི་གཙོ་བོ་སྟོན་པ་བཅོམ་ལྡན་འདས་ཀྱི་སྐུ་བརྙན་ད་ལྟ་བཞུགས་སུ་གསོལ་བ་འདི་དང་དེ་བཞིན་གུ་རུ་སྣང་སྲིད་ཟིལ་གནོན་ཐོག་ཚད་མ་དང་སྤྱན་རས་གཟིགས་ཕྱག་སྟོང་སྤྱན་སྟོང་བཞེངས་གནང་ཡོད་པ་ནི་ད་ལྟའང་ང་ཚོས་རྡ་ས་གཙུག་ལག་ཁང་ནང་མཇལ་རྒྱུ་ཡོད་པ་འདི་ཡིན་འདུག  ཕྱི་ལོ་ ༡༩༧༦ ཟླ་ ༦ ཚེས་ ༦ ཉིན་རང་གཞུང་དཔལ་འབྱོར་ལྷན་ཁང་ནས་འཛིན་སྐྱོང་གནང་ཐོག་རྡ་ཤོད་ཟུར་གསོག་ཏུ་རྟེན་བཞེངས་ལག་རྩལ་སློབ་གྲྭ་གསར་འཛུགས་གནང་འདུག་པ་དེའི་དགེ་རྒན་གྱི་ཕྱག་ལས་ཡུན་རིང་གནང་། ཕྱི་ལོ་ ༡༩༩༤ ལོར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་ཟླ་བསྒྲིལ་བཏང་འདུག མདོར་ན་རྟེན་བཞེངས་ཆེ་མོ་ཁོང་གིས་དགེ་རྒན་གྱི་ཕྱག་ལས་རབ་དང་རིམ་པ་གནང་ཡོད་པ་མ་ཟད། བོད་ཀྱི་མཆོག་གི་ལུས་བཟོ་འབུར་སྐུའི་མདོ་རྒྱུད་ཐིག་ཡིག་གིས་བརྒྱན་ཅིང་རྩེ་གདོང་རིག་པའི་འབྱུང་གནས་ཀྱི་བཟོ་རྩལ་གྱི་བྱུང་བརྗོད་མཐོང་བརྒྱུད་ལག་ལེན་མན་ངག་གཅིག་ཏུ་བཀོད་པའི་དེབ་ཐེར་རིན་ཆེན་སྣ་བདུན་གྱི་ཁྲ་ཚོམ་ཞེས་བྱ་བའི་དེབ་ཕྲེང་དང་པོ་དང་གཉིས་པ་རྩོམ་བྲིས་གནང་ཡོད། འོན་ཀྱང་སྟབས་མ་ལེགས་པ་ཞིག་ལ་བར་ལམ་ནད་མནར་གྱི་རྐྱེན་པས་ཕྱི་ལོ་ ༢༠༡༡ ཟླ་ ༦ ཚེས་ ༢༢ ཉིན་རང་ཤག་ཏུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག་པ་བཅས།།