ཕྱི་ལོ་ ༢༠༢༠ ཟླ་ ༦ ཚེས་ ༡ རེས་གཟའ་ཟླ་བ།
༄༅། །དེ་སྔ་ཀིར་གྷི་སི་ཐན་ནང་རྒྱ་གར་གཞུང་ཚབ་བྱེད་མྱོང་ཡོད་པ་ལ་དྭགས་པ་ཕུན་ཚོགས་སྟོབས་ལྡན་ P Stobdan ཞུ་བ་དེས་རྒྱ་དཀར་ནག་གཉིས་ཀྱི་ས་མཚམས་ཀྱི་རྩོད་གཞི་ཟེར་བའི་གནད་དོན་དང་འབྲེལ་བའི་བརྙན་འཕྲིན་བགྲོ་གླེང་ལས་རིམ་ཞིག་གི་ནང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆོས་ཕྱོགས་ཀྱི་མཛད་འཕྲིན་ཁོ་ན་ལས་ས་མཚམས་ཀྱི་རྩོད་རྙོག་སེལ་ཐབས་ཆེད་རྒྱ་གར་ལ་རྒྱབ་སྐྱོར་མཛད་ཀྱི་མེད་པའི་ཉེན་ཁག་དཀྲི་ཐབས་བྱས་པ་མ་ཟད། ཤོད་སྟངས་དེའང་སྐྱེ་བོ་ཕལ་པ་ཞིག་ལ་ཟུར་ཟ་བྱས་པ་ལྟར། རྒོལ་བརྡུང་བཏང་བར་བརྟེན། ལ་དྭགས་དགོན་པ་ཚོགས་པ་དང་། ལ་དྭགས་ནང་པ་ཚོགས་པ། ལ་དྭགས་ནང་པའི་གཞོན་ནུ་ཚོགས་པ་དང་། ཨ་མ་ཚོགས་པ། སླེ་ཚོང་པའི་ཚོགས་པ། ལ་དྭགས་ཁྲིག་རྩེ་དགོན་པ། ཀླུ་འཁྱིལ་དགོན་པ། བདེ་སྐྱིད་དགོན་པ་སོགས་ཀྱིས་བསྒྲགས་གཏམ་སྤེལ་ནས་ཕུན་ཚོགས་སྟོབས་ལྡན་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འགན་ཁུར་དང་བརྩི་བཀུར་རྩ་བ་ནས་མེད་པའི་རྣམ་འགྱུར་ཐོག་ནས་དྲ་རྒྱའི་ནང་ཉེས་མེད་ཉེས་ཁག་དཀྲི་ཐབས་བྱས་པའི་བྱ་སྤྱོད་ཐལ་ཆ་ཆེ་བ་དེར་མཐའ་གཅིག་ཏུ་ངོ་རྒོལ་ཡོད་པ་ཞལ་གཅིག་གྲགས་ཐོག་ནས་གསལ་འདོན་གནང་འདུག
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཀྱང་ཕུན་ཚོགས་སྟོབས་ལྡན་ལ་སྐྱོན་བརྗོད་དང་ངོ་རྒོལ་ཤུགས་ཆེ་གནང་འདུག དེ་ཡང་ཁོང་གིས་གསུང་དོན། ང་རང་སྒེར་ལ་མཚོན་ན་ཁོ་པས་སྐད་ཆ་དེ་འདྲ་བཤད་པ་ཤེས་རྟོགས་བྱུང་སྐབས་ཧང་སང་དགོས་པ་བྱུང་། ལྷག་པར་ཤོད་སྟངས་དེའང་གུས་བཀུར་གྱི་རྣམ་པ་རྩ་བ་ནས་མེད་ཁར་ཐལ་ཆ་ཆེ་བའི་ངག་གི་རྣམ་འགྱུར་སྒོ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཉེན་ཁག་དཀྲི་ཐབས་བྱས་ཡོད། དེ་སྔ་ཕྱི་ལོ་ ༢༠༡༤ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་སུ་དཔལ་དུས་ཀྱི་འཁོར་ལོའི་དབང་ཆེན་སྩོལ་སྐབས་ང་དང་ལྡི་ལི་སྐུ་ཚབ་དོན་གཅོད་གཉིས་ཁོང་གིས་བསྟི་གནས་ཁང་དུ་གཏམ་བཤད་བྱེད་རོགས་ཞེས་གསུང་པ་ལྟར་ཕྱིན་པ་ཡིན། སྐབས་དེར་ཁོ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བསྔགས་བརྗོད་རྒྱ་ཆེ་ཞུས་སོང་།
འོན་ཀྱང་ད་ཐེངས་ཁོ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་དང་རྩ་བ་ནས་མི་འཚམས་པའི་སྐད་ཆ་ཤོད་སྟངས་ཐབས་སྡུག་དེར་བློ་ཕམ་ཧ་ཅང་བྱུང་། ཁོ་པ་ནང་བཞིན་ལྟ་ཚུལ་འཛིན་མཁན་ཆེས་ཉུང་ཤས་ཡིན། ལ་དྭགས་ཡུལ་མི་ཕལ་མོ་ཆེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རང་གི་རྩ་བའི་བླ་མར་བརྩིས་ནས་དད་གུས་ཧ་ཅང་ཞུ་བཞིན་ཡོད་པ་དང་། མགོན་པོ་གང་ཉིད་མཆོག་གིས་ཀྱང་ལ་དྭགས་ཡུལ་མི་ཚོར་དུས་རྟག་ཏུ་ཐུགས་བརྩེ་བ་ཆེན་པོས་གསུང་ཆོས་དང་། བཀའ་སློབ་ལམ་སྟོན་སོགས་བསྩལ་དང་སྩལ་མུས་ཡིན། དེར་བརྟེན་ཐེངས་འདིར་ལ་དྭགས་སྤུན་མཆེད་ཕོ་མོ་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཐའ་གཅིག་ཏུ་རྒྱབ་སྐྱོར་ཞུས་པར་ངས་སེམས་གཏིང་ནས་ཡི་རང་བསྔགས་བརྗོད་རྒྱ་ཆེ་ཞུ་བཞིན་ཡོད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལ་དྭགས་མི་མང་དབར་གྱི་འབྲེལ་བ་ནི་ཧ་ཅང་ཟབ་ཅིང་། མགོན་པོ་གང་ཉིད་མཆོག་ལ་དྭགས་ཡུལ་དུ་ཡང་ཡང་༸ཞབས་བཅག་གིས་ལ་དྭགས་སེར་སྐྱ་མི་མང་ཚོར་བཀའ་སློབ་གསུང་གི་བདུད་རྩི་ཡང་ཡང་བསྩལ་དང་སྩོལ་མུས་ཡིན། ད་བར་མགོན་པོ་གང་ཉིད་ཀྱིས་ལ་དྭགས་སུ་སྔ་རྗེས་ཆིབས་སྒྱུར་ཐེངས་ ༢༧ ཙམ་བསྐྱངས་པ་མ་ཟད། བཀའ་ཆོས་དང་མང་ཚོགས་ལ་བཀའ་སློབ། ལྷག་པར་དཔལ་དུས་ཀྱི་འཁོར་ལོའི་དབང་ཆེན་ཡང་ལན་གསུམ་བཀའ་དྲིན་བསྐྱངས་པ་དང་། ༸རྒྱལ་བའི་འཁྲུངས་སྐར་ཡང་མགོན་པོ་གང་ཉིད་མཆོག་དབུ་བཞུགས་ཐོག་ལན་འགའ་སྲུང་བརྩི་མཛད་མྱོང་ཡོད། ཅེས་གསུངས།།
