སི་ལོ་ཝག་ཡུལ་གྱི་གྲོས་ཚོགས་འཐུས་མི་ ༢༢ ཀྱིས་ཀུན་གཟིགས་པཎ་ཆེན་རིན་པོ་ཆེ་མགྱོགས་མྱུར་གློད་བཀྲོལ་དགོས་པའི་རེ་འདུན་ཤུགས་ཆེ་བཏོན་པ།

གསར་ལས་ཁང་གི་གསར་འགོད་པས།

༢༠༢༠-༠༥-༡༩

ཕྱི་ལོ་ ༢༠༢༠ ཟླ་ ༥ ཚེས་ ༡༩ རེས་གཟའ་མིག་དམར།

༄༅། །སི་ལོ་ཝག་ Slovak ཡུལ་གྱི་གྲོས་ཚོགས་ཀྱི་ཚོགས་གཞོན་སྐུ་ཞབས་ Mr. Gábor Grendel མཆོག་དང་སྐུ་ཞབས་ Mr. Juraj Šeliga མཆོག་བཅས་ཀྱི་སྣེ་ཁྲིད་འོག ཡུལ་དེའི་གྲོས་ཚོགས་འཐུས་མི་ཁྱོན་ ༢༢ ཀྱིས་རྒྱ་ནག་གཞུང་ལ་ཀུན་གཟིགས་པཎ་ཆེན་རིན་པོ་ཆེ་མཆོག་དང་ཁོང་གི་ནང་མི། དེ་བཞིན་བོད་མི་ཆབ་སྲིད་བཙོན་པ་རྣམས་མགྱོགས་མྱུར་གློད་བཀྲོལ་དགོས་པའི་རེ་འདུན་ཤུགས་ཆེ་བཏོན་འདུག

དེ་ཡང་གྲོས་ཚོགས་འཐུས་མི་ཁོང་རྣམས་ཀྱིས་རྒྱ་ནག་གཞུང་གི་བྱེད་བབ་ལ་སྐྱོན་བརྗོད་ཤུགས་ཆེ་གནང་བ་དང་སྦྲགས། ཐུན་མོང་གི་བསྒྲགས་གཏམ་ཞིག་སྤེལ་བའི་ནང་དུ། རྒྱ་ནག་དམར་པོའི་སྲིད་གཞུང་གིས་བོད་མི་ནང་པ་དང་ཡུ་གུར་བ་ཁ་ཆེ་དང་ཡེ་ཤུའི་ཆོས་པ་བཅས་ཀྱི་ཆོས་ལུགས་བྱེད་སྒོར་ཐེ་བྱུས་དང་དམ་བསྒྲགས་སུན་གཙེར་ཧ་ཅང་བཟོས་དང་བཟོ་བཞིན་པ་མ་ཟད། བོད་བརྒྱུད་ནང་བསྟན་གྱི་བླ་སྤྲུལ་རྩད་གཅོད་ཞུ་རྒྱུའི་ལོ་ངོ་བརྒྱ་ཕྲག་བརྒལ་བའི་སྲོལ་རྒྱུན་ལམ་ལུགས་དེར་ཐེ་བྱུས་བྱེད་བཞིན་ཡོད།

རྒྱ་ནག་གཞུང་གིས་མི་ལོ་ཧྲིལ་པོ་ ༢༥ རིང་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་བཅས་ས་གནས་གང་དུ་བཀག་ཉར་བྱས་མིན་དང་། གནས་སྟངས་ཇི་འདྲ་ཞིག་འོག་བཞུགས་ཡོད་མེད་ད་བར་གསལ་བཤད་འདོད་བློ་ཚིམ་པ་ཞིག་རྩ་བ་ཉིད་ནས་བྱེད་མྱོང་མེད་ཁར། ཁྲིམས་འགལ་གྱི་བྱ་སྤྱོད་དེ་མུ་མཐུད་སྤེལ་བཞིན་པ་ནི་རིན་པོ་ཆེ་མཆོག་དང་ཁོང་གི་ནང་མི་ཙམ་མ་ཟད། བོད་མིའི་ཐོག་ལའང་དྲང་བདེན་ཞིག་རྩ་བ་ཉིད་ནས་ཆགས་ཐབས་བྲལ། ཞེས་འཁོད་པ་མ་ཟད། ཡུལ་དེའི་སྲིད་གཞུང་དང་ཡུ་རོབ་སྤྱི་མཐུན་ཚོགས་པ། འཛམ་གླིང་མཉམ་འབྲེལ་རྒྱལ་ཚོགས་ལའང་གྲོས་ཚོགས་འཐུས་མི་རྣམས་ཀྱིས་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་བཅས་མགྱོགས་མྱུར་གློད་བཀྲོལ་ཡོང་སླད། རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་རེ་འདུན་ཤུགས་ཆེ་བཏོན་འདུག

གཞན་ཡང་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གོང་གི་གྲོས་ཚོགས་འཐུས་མི་རྣམ་པས་ཞལ་ཞེ་གཉིས་མེད་ཐོག་ནས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་དོན། སི་ལོ་ཝག་ Slovak གྲོས་ཚོགས་ནས་འདི་ལྟ་བུའི་རྒྱབ་སྐྱོར་ཤུགས་ཆེ་གནང་བ་ཆེས་ཐོག་མ་ཡིན། དེར་བརྟེན་ང་ཚོས་བསྒྲགས་གཏམ་སྤེལ་མཁན་གྲོས་ཚོགས་འཐུས་མི་ཡོངས་དང་ཡུལ་དེའི་མི་མང་བཅས་ལ་བོད་མིའི་དྲང་བདེན་གྱི་འཐབ་རྩོད་ཐོག་རྒྱབ་སྐྱོར་དེ་འདྲ་གནང་བར་སྙིང་ཁུང་རུས་པའི་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། རྒྱབ་སྐྱོར་འདི་ལ་བརྟེན་ནས་བོད་མིའི་དྲང་བདེན་གྱི་འཐབ་རྩོད་ལ་ནུས་ཤུགས་གསར་པ་ཞིག་བསྐྲུན་ཐུབ་ཡོད།

རྒྱ་ནག་གཞུང་གིས་ལོ་ངོ་ ༦༠ ལྷག་རིང་བོད་མིའི་ཐོག་དྲག་གནོན་དང་སྡུག་སྦྱོང་མནར་གཅོད་ཚད་མེད་བཏང་དང་གཏོང་བཞིན་ཡོད་ཀྱང་བོད་མི་ཚོས་ད་བར་འཚེ་མེད་ཞི་བའི་ལམ་ནས་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་ལ་ཞི་རྒོལ་རྔམ་སྟོན་བྱས་པ་མ་ཟད། ལྷག་པར་ཕྱི་ལོ་ ༢༠༠༩ ནས་ད་བར་བོད་ནང་གི་བོད་མི་གྲངས་ ༡༥༤ རང་ལུས་མེར་སྲེག་གི་ལམ་ནས་ཞི་རྒོལ་རྔམ་སྟོན་ཤུགས་ཆེ་གནང་ཡོད། དྲག་པོའི་ལམ་ནས་ཞི་བདེ་བརྟན་ལྷིང་དང་འཆམ་མཐུན་ཟེར་བ་ཡོང་ཤེས་ཐབས་མེད་པ་རྒྱ་ནག་གཞུང་གིས་ད་གཟོད་ཤེས་རྟོགས་ཐུབ་རྒྱུར་ང་ཚོས་རེ་བ་བྱེད་བཞིན་ཡོད། རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་གྲོས་མོལ་བསྐྱར་གསོ་ཞུས་པ་བརྒྱུད་བོད་ཀྱི་གནད་དོན་དེ་བཞིན་འཚེ་མེད་ཞི་བའི་ལམ་ནས་གསལ་ཐབས་བྱེད་དགོས། དེར་བརྟེན་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་། བོད་མི་ཆབ་སྲིད་བཙོན་པ་རྣམས་མགྱོགས་མྱུར་གློད་བཀྲོལ་གཏོང་དགོས་པ་དེ་ནི་གྲོས་མོལ་གྱི་ཁོར་ཡུག་བཟང་པོ་ཞིག་སྐྲུན་རྒྱུར་ཕན་ཐོགས་ཡོང་ངེས། ཞེས་གསུངས།

གྲོས་ཚོགས་འཐུས་མི་ ༢༢ རྣམས་ནི།

Mr. Gábor Grendel

Juraj Šeliga

Peter Osuský

Miroslav Kollár

Ondrej Dostál

Radovan Kazda Vladimíra Marcinková

Peter Pollák

Miroslav Žiak

Jarmila Halgašová

Anna Zemanová

Dominik Drdul