ཕྱི་ལོ་ ༢༠༢༠ ཟླ་ ༥ ཚེས་ ༥ རེས་གཟའ་མིག་དམར།
༄༅། །རྒྱ་ནག་དམར་པོའི་སྲིད་གཞུང་གིས་ཡུལ་དེའི་ནང་གི་ཕུ་དན་མཐོ་སློབ་ཁང་དང་ Fudan University མཐོ་སློབ་ཁང་གཞན་གཅིག་ལ་ཏོག་དབྱིབས་ཅན་གྱི་ཕྲ་སྲིན་ coronavirus ཐོག་ཉམས་ཞིབ་བྱ་རྒྱུ་མཚམས་འཇོག་དགོས་པའི་བཀའ་རྒྱ་བསྡམས་པར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་སྐྱོན་བརྗོད་ཤུགས་ཆེ་གནང་བ་དང་སྦྲགས། སྤྱི་ཚོགས་ཐོག་འགན་ཁུར་རྩ་བ་ནས་མེད་པའི་བཀའ་རྒྱ་དེ་ལྟར་བསྡམས་པ་འཕྲལ་མར་ཕྱིར་འཐེན་དགོས་པའི་རེ་འདུན་ཤུགས་ཆེ་བཏོན་འདུག
ཏོག་དབྱིབས་ཅན་གྱི་འབུ་སྲིན་དེར་ཉམས་ཞིབ་བྱ་རྒྱུ་དང་། ཉམས་ཞིབ་བྱས་པའི་གྲུབ་དོན་རྣམས་ཕན་ཚུན་སྦ་གསང་མེད་པར་ཤེས་ཡོན་གྱི་རྣམ་པའི་ཐོག་ནས་བརྗེ་ལེན་བྱེད་དགོས་པ་ཧ་ཅང་གནད་འགག་ཆེ་ལ། རྒྱལ་སྤྱིའི་ནུས་པ་མཉམ་སྤུང་གིས་ནད་ཡམས་དེར་གདོང་ལེན་བྱ་རྒྱུར་ཡང་ཕན་ཐོགས་ཡོད་ངེས། ཞེས་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་གསུངས། དེ་ཡང་ཟླ་འདིའི་ཟླ་མགོར་ཀྲུང་གོའི་ཚན་རིག་དང་འཕྲུལ་རིག་ཁང་གིས་གོང་གི་མཐོ་སློབ་གཉིས་ལ་བཀའ་རྒྱ་བཏང་ནས་སླད་ཕྱིན་ཏོག་དབྱིབས་ཅན་གྱི་ཕྲ་སྲིན་ coronavirus ཐོག་ཉམས་ཞིབ་བྱ་རྒྱུ་དང་དེ་འབྲེལ་གནས་ལུགས་འདོན་སྤེལ་བྱས་པར་ཐོག་མར་ཀྲུང་གོའི་ཚན་རིག་དང་འཕྲུལ་རིག་ཁང་ནས་ཆོག་མཆན་ངེས་པར་ཞུ་དགོས་པ་བཀའ་བཏང་ཡོད། མཐོ་སློབ་དེ་གཉིས་ཀྱི་དྲ་རྒྱའི་སྟེང་རྒྱ་ནག་གཞུང་གིས་ལམ་སྟོན་གྱི་གསལ་བསྒྲགས་དེ་དག་བཀོད་འདུག
གསལ་བསྒྲགས་དེའི་ནང་ཏོག་དབྱིབས་གཉན་རིམས་ཀྱི་ཐོག་མའི་འབྱུང་ཁུངས་ཞིབ་གཅོད་བྱས་པའི་ཉམས་ཞིབ་ཀྱི་སྙན་ཐོ་ཕྱིར་བསྒྲགས་བྱ་རྒྱུའི་ཐོག་ངེས་པར་དོ་ནན་ཚོད་འཛིན་བྱེད་དགོས་པ་དང་། དེང་སྐབས་ཁྱབ་གདལ་འགྲོ་བཞིན་པའི་ཏོག་དབྱིབས་གཉན་རིམས་ཐོག་བྲིས་པའི་ཉམས་ཞིབ་ཀྱི་གྲུབ་དོན་དེ་དག་ཐོག་མཐོ་སློབ་ཤེས་ཡོན་སྡེ་ཚན་ནས་ངེས་པར་བསྐྱར་ཞིབ་བྱེད་དགོས་པ་མ་ཟད། ཉམས་ཞིབ་ཀྱི་ཆེད་རྩོམ་དེ་དག་གཞུང་གི་ལམ་སྟོན་ལས་བརྒལ་མི་ཆོག་ཅིང་གཞུང་གི་ལམ་སྟོན་དང་ཏག་ཏག་མཐུན་པ་ཞིག་འགྲོ་དགོས་པ་བཀོད་འདུག
རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་འགན་འཛིན་སྐུ་ཞབས་ Cédric Alviani ཁོང་གིས་གསུང་དོན། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་རྒྱ་ནག་གཞུང་ལ་རེ་འདུན་ཞུ་རྒྱུར། ཚན་རིག་པས་ཉམས་ཞིབ་བྱས་པའི་གྲུབ་དོན་བརྗེ་ལེན་བྱ་རྒྱུའི་ཐོག་གཞུང་གིས་དམ་བསྒྲགས་བྱས་པ་དེ་འཕྲལ་མར་མཚམས་འཇོགས་བྱེད་དགོས། དམ་བསྒྲགས་དེ་ལྟར་བྱས་པ་དེས་ཏོག་དབྱིབས་གཉན་རིམས་ལ་རྒྱལ་སྤྱིའི་མཉམ་རུབ་ཀྱིས་གདོང་ལེན་བྱེད་བཞིན་པའི་ནུས་པ་ཉམ་དམས་སུ་གཏོང་བཞིན་འདུག པེ་ཅིང་གཞུང་གིས་ཚན་རིག་གི་གནས་ལུགས་གསར་རྙེད་ཐོག་དམ་བསྒྲགས་བྱས་པ་དང་། ཚན་རིག་གི་ལམ་ནས་དངོས་ཡོད་གནས་ཚུལ་བརྗེ་ལེན་མ་བཅུག་པར་སྦ་གསང་བྱེད་བཅུག་པ་ནི་རྒྱལ་སྤྱིའི་ཐོག་འགན་ཁུར་རྩ་བ་ནས་མེད་པ་ཞིག་དང་། པེ་ཅིང་གཞུང་གིས་ཁེངས་དྲེགས་ཀྱི་རྣམ་པ་གསལ་འདོན་བྱས་པ་ཁོ་ན་ཡིན། བྱེད་བབ་དེ་ལྟ་བུ་རྒྱ་ནག་གཞུང་གིས་དེ་སྔ་ཏོག་དབྱིབས་གཉན་རིམས་ཆེས་ཐོག་མ་ཁྱབ་གདལ་སྐབས་ནས་ལག་བསྟར་བྱས་ཡོད། ཅེས་སོགས་གསུངས། །