༄༅། །ཕྱི་ལོ་ ༢༠༡༡ ཟླ་ ༦ ཚེས་ ༢༠ ཉིན་བཞུགས་སྒར་རྡ་སའི་ཉེ་འགྲམ་ས་རཱ་བོད་ཀྱི་སློབ་གཉེར་ཁང་དུ་ཤེས་རིག་ལས་ཁུངས་དང་ཝ་ཎཱ་བོད་ཀྱི་མཐོ་རིམ་སློབ་གཉེར་ཁང་ཟུང་སྦྲེལ་ཐོག་གཞི་རིམ་བར་མའི་དགེ་རྒན་འོས་སྦྱོང་ཁག་གཅིག་ལ་བཀའ་ཁྲི་མཆོག་གིས་ཤེས་ཡོན་སྲིད་བྱུས་སྐོར་ལ་ལམ་སྟོན་གསུང་བཤད་གནང་ཡོད།
དེ་ཉིན་ཕྱི་དྲོ་ཆུ་ཚོད་ ༢ ཐོག་བཀའ་ཁྲི་ཟམ་གདོང་རིན་པོ་ཆེ་མཆོག་དང་། ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་ཚེ་རིང་བསམ་གྲུབ་ལགས། ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས། སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས། ཝ་ཎཱ་མཐོ་སློབ་ཀྱི་སློབ་ཕྲུག་དགེ་རྒན་འོས་སྦྱོང་བ་ ༢༠ བརྒལ་བ་རྣམས་ལྷན་འཛོམས་ཐོག་བཀའ་ཁྲི་མཆོག་གིས་གསུང་བཤད་གནང་དོན།
སྤྱིར་བཏང་ང་ཚོས་སློབ་སྦྱོང་དང་ཤེས་ཡོན་གང་སྤྲད་པ་ཡིན་རུང་། ཡི་གེ་འབྲི་རྒྱུ་དང་། ཀློག་རྒྱུ། རྩིས་རྒྱག་རྒྱུ་ལྟ་བུ་ཞིག་སློབ་གྲྭ་ཁག་གི་ནང་སློབ་ཀྱི་ཡོད། འོན་ཀྱང་དེ་ཙམ་གྱིས་ཤེས་ཡོན་གྱི་མཚན་ཉིད་ཚང་གི་མེད། ཤེས་ཡོན་གྱི་ཡན་ལག་ཡོངས་སུ་རྫོགས་ཀྱི་མེད། ཤེས་ཡོན་ཞེས་པ་དེ་ལས་ལྷག་ཙམ་ཡོད་པ་གནའ་དེང་གཉིས་ཀར་བཤད་སྲོལ་ཡོད། རིག་པའི་གནད་གང་ཡིན་ནའང་དེའི་ཐོག་སློབ་སྦྱོང་བྱེད་སྟངས་ཤེས་པ་ཙམ་གྱིས་ཤེས་ཡོན་ཡོད་པ་རྩིས་ཀྱི་མེད་པ་དེ་ནི་ཡོངས་གྲགས་ཤིག་རེད། སྲོལ་རྒྱུན་གྱི་རྗེས་འཇུག་པ་ཚོ་དང་། དེང་རབས་པ། ཤར་ཕྱོགས་པ། ནུབ་ཕྱོགས་པ་བཅས་ཀྱིས་དེ་ལྟར་བརྗོད་ཀྱི་ཡོད། འོན་ཀྱང་བརྗོད་སྟངས་གཅིག་མཚུངས་ཡིན་པ་གང་ཞིག་ལ་རྒྱབ་ལྗོངས་ཀྱི་བསམ་བློ་གཏོང་སྟངས་སྲོལ་རྒྱུན་དང་དེང་རབས་གཉིས་ཐ་དད་ཡིན་པ་མ་ཟད། ཤར་ནུབ་གཉིས་ཀྱང་ཐ་དད་ཡིན།
ཐ་དད་འགྲོ་རྒྱུའི་འགག་རྩ་གཙོ་བོ་དེ་སློབ་སྦྱོང་སྤྲོད་མཁན་གྱི་དམིགས་ཡུལ་བཟུང་སྟངས་དང་ཀུན་སློང་འཁྱེར་སྟངས་ལ་ཐུག་ཡོད། བསླབ་རྒྱུའི་རིག་གནས་ལ་ཧ་ཅང་གི་ཁྱད་པར་ཆེན་པོ་མེད། གནའ་སྔ་མོའི་རིག་གནས་དང་དེང་རབས་ཀྱི་རིག་གནས་ལ་སྤྱིར་མི་འདྲ་བ་ཁ་ཤས་ཡོད་ཀྱང་ཁྱོན་ཡོངས་ཀྱི་སྒྲོམ་གཞིའི་ཐོག་བསམ་བློ་བཏང་ན། ཤེས་བྱ་རིག་པའི་གནས་གང་ཡང་རུང་བ་ཞིག་རེད། ང་ཚོ་ནང་པའི་བཤད་སྲོལ་ལྟར་ན་རིག་གནས་ལྔ་པོའི་གང་ཡང་རུང་བའི་ནང་བསྡུས་འགྲོ་གི་རེད། ནུབ་ཕྱོགས་པའི་ཤོད་སྟངས་ལྟ་བུ་བྱས་ན་ཚན་རིག་དང་སྒྱུ་རྩལ་གཉིས་ཀྱི་ནང་བསྡུས་འགྲོ་གི་རེད།དེའི་ནང་གསེས་སྣ་་ཚོགས་ཤིག་ཡོང་གི་ཡོད།
སྔོན་འགྲོ་དང་དམའ་རིམ་འཛིན་གྲྭའི་ནང་སློབ་ཕྲུག་གི་བསམ་བློའི་ནང་དགོས་པ་དང་རྒྱུ་མཚན་གང་ཡང་མཐོང་གི་མེད། ཕ་མས་ཨུ་ཚུགས་བརྒྱབ་སྟེ་སློབ་གྲྭར་བསྐྱལ་ཡོད། སློབ་གྲྭའི་ནང་དགེ་རྒན་གྱིས་ཨུ་ཚུགས་བརྒྱབ་སྟེ་བསླབ་ཀྱི་ཡོད། ཕྲུ་གུར་སུན་སྣང་སྐྱེ་པ་མ་གཏོགས་དགོས་པ་དང་དམིགས་ཡུལ་གང་ཡང་ཤེས་ཀྱི་མ་རེད། ཡིན་ནའང་སྔོན་འགྲོའི་འཛིན་གྲྭ་ནས་ཟུང་སྟེ་སློབ་སྦྱོང་སྤྲོད་མཁན་དེ་ཚོས་ཕྲུ་གུའི་བསམ་བློའི་ནང་ཀུན་སློང་གང་འདྲ་ཞིག་བསྐྲུན་གྱི་ཡོད། དེའི་ཐོག་ནས་དབྱེ་བ་ཆེན་པོ་ཕྱེ་འགྲོ་རྒྱུ་དེ་རེད། སྲོལ་རྒྱུན་དང་དེང་རབས་ཀྱི་སློབ་སྦྱོང་གཉིས་ཀྱི་དབར་གནམ་སའི་ཁྱད་པར་འགྱུར་འགྲོ་རྒྱུ་དེ་ཆུང་ཆུང་སྐབས་ཐོག་མར་ཕ་མ་དང་དེ་ནས་སྔོན་འགྲོ་དང་དམའ་རིམ་འཛིན་གྲྭའི་དགེ་རྒན་དེ་ཚོས་བྱིས་པ་ཆུང་ཆུང་གི་བསམ་བློ་དྲི་མ་མེད་པ་རས་དཀར་པོ་བཞིན་ཡོད་པ་དེའི་ཐོག་ལ་ཁོང་ཚོའི་ལུས་ངག་གི་ཀུན་སྤྱོད་དང་དངོས་སུ་བསླབ་སྟངས་དེ་འདྲའི་ཐོག་ནས་བྱིས་པའི་བསམ་བློ་དྲི་མ་མེད་པ་དེའི་ཐོག་ལ་ཚོན་འདྲ་མིན་སྣ་ཚོགས་ཤིག་བསྐྲུན་ནས་ཕྲུ་གུ་སོ་སོས་བསམ་བློ་བཏང་ནས་སློབ་སྦྱོང་ཐོག་ལ་འབད་བརྩོན་བྱེད་རྒྱུའི་གོ་སྐབས་ཤིག་དང་རང་གི་འདོད་མོས་ཐོག་བྱེད་རྒྱུའི་བསམ་ཚུལ་ཞིག་བསླེབས་སྐབས་ཁ་ལོ་ཆེན་པོ་ཞིག་བསྒྱུར་འགྲོ་གྱི་ཡོད། ཁ་ལོ་བསྒྱུར་བའི་ངོ་བོ་དང་རྣམ་པ་དེ་གང་འདྲ་ཞིག་ཡོད་པ་དེ་གལ་ཆེན་པོ་རེད། ཅེས་ཤེས་ཡོན་སྲིད་བྱུས་ཀྱི་དམིགས་ཡུལ་སྐོར་གྱི་གསུང་བཤད་གནང་རྗེས་སློབ་གཉེར་བ་ཚོའི་དྲི་བར་ལན་འདེབས་གནང་ཡོད། ད་ཐེངས་དགེ་རྒན་འོས་སྦྱོང་དངོས་གཞི་ནི་སྔ་ལོ་ཕྱི་ཟླ་ ༧ ནང་ཝ་ཎཱ་བོད་ཀྱི་མཐོ་སློབ་ཏུ་དབུ་འཛུགས་གནང་སྟེ་འདི་ལོའི་ཕྱི་ཟླ་ ༧ རིང་ས་རཱ་མཐོ་སློབ་ཏུ་ཟླ་གཅིག་རིང་ཟབ་སྦྱོང་ཐོག་དགེ་རྒན་འོས་སྦྱོང་མཇུག་སྒྲིལ་གནང་རྒྱུ་ཡིན་འདུག་བཅས།
