༢༠༡༡ ཟླ་ ༦ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༢༠ ཉིན་རྡ་ས་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་དབུས་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་ནས་གོ་སྒྲིག་ཐོག་དབུས་དང་ས་གནས་ལས་བྱེད་ཁག་གཅིག་ལ་རྩིས་པའི་ཟབ་སྦྱོང་སྤྲོད་འགོ་ཚུགས་ཡོད།
དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་དང་། འོས་བསྡུ་ལྷན་ཁང་དང་གཞུང་ཞབས་འདེམས་ལྷན་གྱི་འགན་འཛིན་གཅིག་ལྕོགས་འཇམ་དཔལ་ཆོས་བཟང་མཆོག རྩིས་ཞིབ་སྤྱི་ཁྱབ་འགན་འཛིན་བཀའ་བརྒྱུད་དོན་གྲུབ་ལགས། གཞུང་ཞབས་འདེམས་བསྐོ་ལྷན་ཁང་གི་དྲུང་ཆེ་སྣང་ས་ཆོས་སྒྲོན་ལགས། དབུས་དང་ས་གནས་ཀྱི་རྩིས་པ་ལས་ཐོག་པ་བཅས་ཁྱོན་ལས་བྱེད་གྲངས་ ༢༥ ཙམ་ལྷན་འཛོམས་ཀྱི་ཐོག་མར་དཔལ་འབྱོར་བཀའ་བློན་མཆོག་གི་སྣང་གསལ་ཞལ་ཕྱེ་གནང་རྗེས་རྟེན་འབྲེལ་གསོལ་ཇ་འབྲས་སིལ་ཕུལ། དེ་ནས་འདེམས་ལྷན་དྲུང་ཆེས་ཟབ་སྦྱོང་གོ་སྒྲིག་ཞུ་ཕྱོགས་ངོ་སྤྲོད་སོ་གནང་གྲུབ་བསྟུན་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན།
གཞུང་ཞབས་འདེམས་བསྐོ་ལྷན་ཁང་གི་ཚོགས་གཙོ་མཆོག་དང་། དེ་བཞིན་སྤྱི་ཁྱབ་འགན་འཛིན་མཆོག གཞུང་ཞབས་འདེམས་ལྷན་གྱི་དྲུང་ཆེས་དབུས་པའི་ལས་བྱེད་རྣམ་པ། ཟབ་སྦྱོང་ལ་མཉམ་ཞུགས་གནང་མཁན་ལས་བྱེད་ཡོངས་ལ་ངས་བཀའ་ཤག་གི་ངོ་ཚབ་མཚོན་པའི་ཐོག་ནས་ཚང་མར་འཚམས་འདྲིའི་བཀྲིས་བདེ་ལེགས་ཞུ་གི་ཡིན། བཀའ་ཤག་གིས་ལས་ཁུངས་དང་སྡེ་ཚན་ཚང་མའི་རྩིས་ཁྲ་ཉར་ཕྱོགས་དེ་དག་ཚད་ལྡན་དང་། ཕྱི་གསལ་ནང་གསལ་ཡོང་རྒྱུ་ཞིག་སྔོན་མ་ནས་གཟིགས་ཀྱི་ཡོད། དེ་གཟིགས་པའི་ཐོག་ནས་སྐབས་དུས་སོ་སོར་བཀའ་ཤག་གི་ངོས་ནས་རྩིས་ཁྲ་ཉར་ཕྱོགས་དང་ལས་དོན་བྱེད་ཕྱོགས་གང་ཅིའི་ཐོག་ལ་ལམ་སྟོན་དུས་ནས་དུས་སུ་གནང་དང་གནང་བཞིན་པ་རེད། བཀའ་ཤག་ལ་དུས་རྒྱུན་དུ་ལས་ཁུངས་དང་སྡེ་ཚན་མང་པོའི་ཐོག་ནས་རྩིས་པ་ཚད་ལྡན་དགོས་ཀྱི་ཡོད་པ་དང་རྩིས་པ་ཚད་ལྡན་ཞིག་འཚོལ་བར་འགྲོ་སྐབས། དེ་འདྲ་ཞིག་རག་གི་མེད་པའི་སྙན་སེང་ཡོང་གི་ཡོད་པ་རེད་ལ་དངོས་ཡོད་ཀྱི་གནས་སྟངས་ཆ་ནས་དེ་འདྲ་ཡོང་གི་ཡོད། སྤྱིར་བཏང་ཁྱེད་རྣམས་ཀྱིས་མཐོ་རིམ་སློབ་གྲྭའི་ནང་ཁྱད་མཁས་རྩིས་ཀྱི་སློབ་སྦྱོང་སྦྱང་གནང་ཡོད། འོན་ཀྱང་ད་ལྟ་ཞབས་ཕྱི་ཞུས་སའི་སྒྲིག་འཛུགས་འདིའི་གནས་སྟངས་ཆ་ནས་རྩིས་ཀྱི་ཐོག་ལ་བསམ་བློ་གཏོང་ཕྱོགས་དང་ལས་དོན་བྱེད་ཕྱོགས་སོགས་གསར་དུ་སྦྱང་དགོས་པ་མང་པོ་ཞིག་ཡོད། དེའི་ཐོག་དོ་སྣང་གནང་དགོས་རྒྱུ་གལ་ཆེན་པོ་རེད། གང་ལྟར་བོད་མིའི་སྒྲིག་འཛུགས་ལ་ཆ་མཚོན་ན། བཙན་བྱོལ་བོད་མི་སྤྱི་ཡོངས་ལ་ལྟ་རྟོག་བྱེད་མཁན་གྱི་སྒྲིག་འཛུགས་ཆེན་པོ་ཞིག་ཆགས་ཡོད་པར་བརྟེན། དེའི་ནང་རྩིས་ཀྱི་གནས་བབས་དེ་ཧ་ཅང་ཆེན་པོ་ཆགས་ཡོད། བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་ཀྱི་ངོ་བོ་དེ་གྲོས་ཚོགས་དབུས་སུ་བཞག་པའི་མང་གཙོའི་མཚན་ཉིད་ལྡན་པའི་སྒྲིག་འཛུགས་ཤིག་ཆགས་ཡོད། དེའི་ངོ་བོ་ཐོག་ནས་འཛིན་སྐྱོང་གིས་ལས་དོན་ག་རེ་སྤེལ་ཡང་དངུལ་དང་འབྲེལ་བ་མ་ཆགས་པའི་ལས་རིམ་སྤེལ་རྒྱུ་གང་ཡང་མེད། སྒོར་མོ་གཅིག་ཡིན་ཡང་གྲོས་ཚོགས་ཀྱི་བཀའ་འཁྲོལ་མེད་པར་འགྲོ་མི་ཆོག་པའི་གནས་བབས་ཤིག་ཆགས་ཡོད། བཀའ་ཤག་གི་དགོངས་པར་ལས་བྱེད་ཆེ་ཕྲ་ཚང་མས་རྩིས་ཀྱི་གནས་སྟངས་ཐོག་ལ་དོ་སྣང་གནང་ཐུབ་པ་ཞིག་དགོས་ཀྱི་ཡོད་པ་གཟིགས་ཀྱི་ཡོད།
བཀའ་ཤག་ངོས་ནས་འབོད་སྐུལ་ཞུས་པ་ལྟར་གཞུང་ཞབས་འདེམས་ལྷན་གྱིས་ཟབ་སྦྱོང་སྤྲོད་རྒྱུའི་ལས་རིམ་ཡོད་མུས་ཡིན། དེའི་མཐར་ཐུག་གི་དམིགས་ཡུལ་དེ་ད་ལྟའི་ཆར་བཙན་བྱོལ་བོད་མིའི་སྒྲིག་འཛུགས་ཀྱི་འདས་པའི་ལོ་རྒྱུས་ལ་བལྟས་ཀྱང་ལས་ཀ་བྱེད་མཁན་ངོས་ནས་གཞུང་དངུལ་བར་བཟོས་བྱས་པའི་གནས་ཚུལ་ཆེན་པོ་ལྷག་པ་དེ་འདྲ་བྱུང་མེད། མང་ཚོགས་ངོས་ནས་བོད་མིའི་སྒྲིག་འཛུགས་ཀྱི་རྩིས་ཁྲར་བལྟས་ཀྱང་རྩིས་ཁྲ་ཕྱི་གསལ་ནང་གསལ་ཡིན་པ་ཞིག་མང་ཚོགས་ནས་ཀྱང་གདེང་འཁེལ་ཡོང་རྒྱུའི་གནས་བབས་བསྐྲུན་ཐུབ་རྒྱུའི་ང་ཚོའི་དམིགས་ཡུལ་དང་པོ་ཡིན། དམིགས་ཡུལ་གཉིས་པ། དེ་ལྟར་ཡོང་བར་མ་འོངས་པར་རྩིས་པ་ཉུང་དྲགས་འདུག་ཅེས་པའི་གནས་ཚུལ་མ་ཡོང་རྒྱུ། གསུམ་པ། སྐབས་དུས་སོ་སོར་རྩིས་པའི་ལས་འགན་ཁྱེར་གྱི་མེད་ཀྱང་ལས་ཁུངས་ནང་ཡོད་པའི་ལས་བྱེད་ཆེ་ཕྲ་ཚང་མས་རྩིས་ཐོག་དོ་སྣང་དང་ཉམས་མྱོང་ཡོང་རྒྱུ་ཙམ་མ་ཟད། མཐོ་རིམ་ལས་བྱེད་ནང་དུ་ཡིན་ལའང་རྩིས་ཐོག་བྱང་ཆུབ་པ་དང་གསལ་པོ་མཁྱེན་ཐུབ་པ་ཡོང་རྒྱུའི་ང་ཚོས་འབད་བརྩོན་ཞུ་གི་ཡོད། ཅེས་སོགས་ཀྱི་གསུང་བཤད་གནང་སྟེ་དབུ་འབྱེད་མཛད་སྒོ་གྲོལ། ད་ཐེངས་དམིགས་བསལ་རྩིས་པའི་ཟབ་སྦྱོང་འདི་ཉིན་གྲངས་ ༡༢ རིང་འཚོགས་རྒྱུ་ཡིན་པ་དང་། དབུས་དང་གཞིས་ཆགས་ས་གནས་ཁག་ ༡༦ ནས་མི་གྲངས་ ༢༥ མཉམ་ཞུགས་གནང་ཡོད། ཟབ་སྦྱོང་གི་དམིགས་ཡུལ་ནི་འཛིན་སྐྱོང་གི་ལས་དོན་གང་ཞིག་ཡིན་ཀྱང་དངུལ་རྩིས་དང་འབྲེལ་བ་ཡོད་པར་པར་བརྟེན། གནས་ཚད་དང་ཉམས་མྱོང་སོགས་ཕྱུག་པའི་རྩིས་པའི་གནས་ཚད་གོང་མཐོར་ཡོང་ཆེད་ཡིན་འདུག་པ་བཅས། །
