༢༠༡༡ ཟླ་ ༦ ཚེས་ ༡༨ རེས་གཟའ་སྤེན་པ།
༄༅། །འདི་གར་སེར་བྱེས་ཏྲེ་གྲྭ་དཀར་མཛེས་པདྨ་ཚེ་དབང་གིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༦ ཚེས་ ༡༧ ཉིན་བོད་ནང་ཆུ་ཚོད་ ༡༢།༣༠ ཙམ་ལ་ཁམས་དཀར་མཛེས་རྫོང་། ཁང་དམར་དགོན་གྱི་དགེ་འདུན་པ་རིན་ཆེན་རྒྱ་མཚོ་དང་།  བླ་མ་ཚེ་རིང་གཉིས་ཀྱིས་དཀར་མཛེས་རྫོང་ཐོག་ཏུ་༧རྒྱལ་བ་བསྟན་འཛིན་རྒྱ་མཚོ་ཁྲི་ལོ་བརྟན་པར་ཤོག བོད་རང་བཙན་ཡིན།  བཀའ་ཁྲི་བློ་བཟང་སེང་གེ་བོད་ལ་གདན་འདྲེན་ཞུ་དགོས།  བོད་ནང་འགྲོ་བ་མིའི་ཐོབ་ཐང་སྤྲོད་དགོས།  ཞེས་པ་སོགས་ཀྱི་འབོད་སྒྲ་སྒྲོག་བཞིན་ཁྲོམ་སྐོར་བྱས་ཡོད་པ་དང་།  འཕྲལ་དུ་རྒྱ་གཞུང་གི་ཉེན་རྟོག་པ་ཡོང་སྟེ་ཁོང་གཉིས་འཛིན་བཟུང་བཙན་ཁྲིད་བྱས་ཡོད་འདུག  དགེ་འདུན་པ་བླ་མ་ཚེ་རིང་ནི།  སྐྱེས་ཡུལ་ཟི་ཁྲོན་ཞིང་ཆེན་དཀར་མཛེས་རྫོང་། སུ་ངོ་ཤང་། ཞི་ལམ་ནང་ཞེས་པའི་གྲོང་ཚོར་ཕ་ཕུར་པ་དང་། མ་བློ་ཆོས་སྒྲོན་གཉིས་སུ་ཕྱི་ལོ་ ༡༩༨༩ ལོར་སྐྱེས་ཤིང་ད་ལྟ་རང་ལོ་ ༢༢ ཡིན་འདུག དེ་བཞིན་དགེ་འདུན་པ་རིན་ཆེན་རྒྱ་མཚོ་ནི།  སྐྱེས་ཡུལ་དཀར་མཛེས་རྫོང་། སུ་ངོ་ཤང་། འགྱུར་ག་གྲོང་ཚོར་ ༼ཁྱིམ་མིང་འགྱུར་ག་སྒ་ཚང་༽ཕ་རྣམ་རྒྱལ་རིན་ཆེན་དང་།  མ་བློ་སྒྲོལ་མ་གཉིས་སུ་ ཕྱི་ལོ་ ༡༩༩༠ ལོར་སྐྱེས་ཤིང་ད་ལྟ་རང་ལོ་ ༢༡ ཡིན་འདུག
གཞན་ཡང་ད་ལྟའི་ཆར་དཀར་མཛེས་རྫོང་ཁུངས་སུ་ཡུལ་དགོན་གཉིས་ལ་དམ་བསྒྲགས་ཤུགས་ཆེན་བྱེད་བཞིན་ཡོད་པ་ནི། དཔེར་ན། ཁམས་དཀར་མཛེས་སྤྱི་བདེ་ལས་ཁུངས་ནས་དཀར་མཛེས་སུ་ཡོད་པའི་དགོན་པ་ཁག་ནས་གྲྭ་བཙུན་སུ་ཡིན་ཡང་གྲོང་ཁྱེར་ནང་། གང་བྱུང་འགྲོ་འོང་མི་ཆོག་པ་དང་། གལ་སྲིད་ན་ཚ་བྱུང་ནས་འགྲོ་དགོས་བྱུང་ཚེ་ས་གནས་དང་ཤང་གི་ལས་ཁུངས་ནས་ངོ་སྤྲོད་ཡི་གེ་བླངས་ཏེ་ཁག་ཐེག་ཁུར་མཁན་ལས་བྱེད་མི་སྣ་གཅིག་མཉམ་དུ་མ་ཡོང་ན་འཛིན་བཟུང་བྱ་རྒྱུ་ཡིན་སྐོར་བཤད་མུས་ཡིན་པ་བཅས།།