༢༠༡༡ ཟླ་ ༦ ཚེས་ ༡༧ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༡༦ ཉིན་སུད་སི་གྲོང་ཁྱེར་ཇི་ནི་ཝའི་ནང་འཚོགས་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སྐབས་ཨ་རི་དང་ཡུ་རོབ་སྤྱི་མཐུན་ཚོགས་པ། དེ་བཞིན་ཡུ་རོབ་སྤྱི་མཐུན་ཚོགས་པའི་ཁོངས་སུ་ཡོད་པའི་སྦེལ་ཇམ་དང་ཅེཀ་སྤྱི་མཐུན་རྒྱལ་ཁབ། སུ་ཝི་ཌེན་ (Belgium,Sweden ,Czech Republic) བཅས་ཀྱི་སྐུ་ཚབ་འཐུས་མི་ཚོས་རྒྱ་ནག་གཞུང་གིས་རྒྱ་ནག་ནང་ཁྲིམས་རྩོད་པ་དང་དྲ་རྒྱ་བེད་སྤྱོད་བྱེད་མཁན། ལས་འགུལ་བ། ཆོས་པ་ཚོའི་འགྲོ་བ་མིའི་ཐོབ་ཐང་ཐོག་དམ་བསྒྲགས་ཤུགས་ཆེ་རུ་བཏང་སྟེ་ཉེས་མེད་འཛིན་བཟུང་བྱེད་རྒྱུ་མང་དུ་བཏང་ཡོད་པ་དེར་སེམས་འཚབ་ཤུགས་ཆེ་ཡོད་སྐོར་བརྗོད་ཡོད་པ་མ་ཟད། བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་རྣམས་ལ་དྲག་གནོན་བྱེད་རྒྱུ་འཕྲལ་དུ་མཚམས་འཇོག་བྱེད་དགོས་པའི་རེ་འདུན་བཏོན་ཡོད།
དེ་ཡང་ཡུ་རོབ་སྤྱི་མཐུན་ཚོགས་པའི་སྐུ་ཚབ་ཀྱིས་རྒྱ་ནག་གཞུང་ལ་བཏོན་པའི་ཞུ་སྙན་ནང་འཁོད་དོན། རྒྱ་ནག་ཏུ་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དེར་སེམས་འཚབ་ཧ་ཅང་ཆེན་པོ་འདུག རྒྱ་ནག་གཞུང་གིས་བཙན་དབང་འོག་ཉེས་མེད་འཛིན་བཟུང་བྱེད་རྒྱུ་དང་བཙན་དབང་འོག་གར་སོང་ཆ་མེད་གྱུར་བ་རྣམས་གང་དུ་ཡོད་མེད་དང་། སྨྲ་བརྗོད་རང་དབང་ཆེད་འཐབ་རྩོད་བྱེད་མཁན་རྣམས་འཕྲལ་དུ་གློད་བཀྲོལ་གཏོང་དགོས་པ་མ་ཟད། རྒྱ་ནག་གཞུང་གིས་བོད་མདོ་སྨད་རྔ་པ་ཀིརྟི་དགོན་པར་དྲག་གནོན་བྱེད་རྒྱུ་འཕྲལ་དུ་མཚམས་འཇོག་བྱས་ཏེ་ཀིརྟི་དགོན་པའི་ནང་ད་ལྟ་དངོས་ཡོད་གནས་ཚུལ་ཇི་འདྲ་ཡིན་མིན་ཤེས་རྟོགས་ཆེད་རང་དབང་ཅན་གྱི་ཞིབ་འཇུག་ཚོགས་ཆུང་བསྐྱོད་དེ་ཞིབ་འཇུག་བྱེད་འཇུག་དགོས་ཞེས་སོགས་འཁོད་ཡོད།
དེ་བཞིན་ཨ་རིའི་སྐུ་ཚབ་མཆོག་གིས་རྒྱ་ནག་གཞུང་ལ་སྤྲད་པའི་ཞུ་སྙན་ནང་འཁོད་དོན། རྒྱ་ནག་ནང་ཁྲིམས་རྩོད་པ་དང་དྲ་རྒྱ་བེད་སྤྱོད་བྱེད་མཁན། ལས་འགུལ་བ། ཆོས་པ་ཚོ་དང་ཁོང་ཚོའི་ནང་མི་བཅས་ཀྱི་འགྲོ་བ་མིའི་ཐོབ་ཐང་ཐོག་དམ་བསྒྲགས་ཤུགས་ཆེ་རུ་བཏང་སྟེ་རྒྱལ་ཁབ་ཀྱི་རྩ་ཁྲིམས་ལ་རྩིས་མེད་རྡོག་རོལ་བཏང་ནས་ཉེས་མེད་འཛིན་བཟུང་བྱེད་རྒྱུ་མང་དུ་བཏང་ཡོད་པ་དེར་སེམས་འཚབ་ཤུགས་ཆེ་ཡོད་སྐོར་བརྗོད་ཡོད་པ་མ་ཟད། བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་ ༣༠༠ ཙམ་དགོན་པ་ནས་བཙན་དབང་གིས་ཕྱིར་འབུད་བྱས་པའི་གནས་ཚུལ་དེ་རིགས་མཚམས་འཇོག་དགོས། ཞེས་སོགས་ཀྱི་རེ་འདུན་བཏོན་ཡོད།
དེ་བཞིན་སྦེལ་ཇམ་སྐུ་ཚབ་མཆོག་གི་ཞུ་སྙན་ནང་འཁོད་དོན། རྒྱ་ནག་ནང་ཟླ་བ་སྔོན་མ་ནས་འགྲོ་བ་མིའི་ཐོབ་ཐང་གི་གནས་སྟངས་ཐོག་ཡར་རྒྱས་གང་ཡང་ཕྱིན་མེད། རྒྱ་ནག་གཞུང་གིས་དྲྭ་རྒྱའི་ཐོག་དམ་བསྒྲགས་བྱེད་རྒྱུ་ཤུགས་ཆེ་རུ་བཏང་ཡོད་པ་དང་རྒྱལ་ས་པེ་ཅིང་དུ་ཡོད་པའི་གསར་འགྱུར་བརྒྱུད་ལམ་ཁག་ལ་དམ་བསྒྲགས་བྱས་ནས་གསར་འགོད་པ་ཚོའི་ལས་ཀའི་ཐོག་འགོག་རྐྱེན་བཟོ་བཞིན་ཡོད། སྦེལ་ཇམ་སྲིད་གཞུང་གིས་རྒྱ་ནག་གཞུང་ལ་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་གར་སོང་ཆ་མེད་བཟོས་པ་རྣམས་ཀྱི་གནས་སྟངས་ཇི་ཡིན་གསལ་བཤད་དགོས་ཞེས་སོགས་འཁོད་ཡོད།
ཕྱོགས་མཚུངས་སུ་ཝི་ཌན་སྲིད་གཞུང་གི་ཞུ་སྙན་ནང་འཁོད་དོན། རྒྱ་ནག་གཞུང་གིས་རྒྱལ་ཁབ་ཀྱི་རྩ་ཁྲིམས་ཇི་བཞིན་ཁྲིམས་ལུགས་ལག་བསྟར་མ་ཐུབ་པ་དང་སྨྲ་བརྗོད་རང་དབང་། འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་ཚོར་སུན་གཙེ་བཟོ་རྒྱུ་ཤུགས་ཆེ་རུ་བཏང་བ་དེར་སེམས་འཚབ་ཆེན་པོ་ཡོད། དེ་བཞིན་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་ཚོར་དྲག་གནོན་བྱེད་རྒྱུ་འཕྲལ་དུ་མཚམས་འཇོག་བྱེད་དགོས་པ་དང་དངོས་ཡོད་གནས་ཚུལ་ཤེས་ཆེད་ཁུལ་དེར་རང་དབང་ཅན་གྱི་ཞིབ་འཇུག་ཚོགས་ཆུང་འགྲོ་འཇུག་དགོས་པ་དང་། བོད་མི་ཚོར་རང་གི་ཐོབ་ཐང་སྤྲོད་དགོས་ཞེས་སོགས་འཁོད་ཡོད།
དེ་བཞིན་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་འཐུས་མིས་རྒྱ་ནག་གཞུང་ལ་སྤྲད་པའི་ཞུ་སྙན་ནང་འཁོད་དོན། རྒྱ་ནག་ཟི་ཁྲོན་ཞིང་ཆེན་དུ་ཡོད་པའི་ཀིརྟི་དགོན་པའི་ཛ་དྲག་གི་གནས་སྟངས་ཐོག་ང་ཚོར་སེམས་འཚབ་ཧ་ཅང་ཆེན་པོ་ཡོད། ང་ཚོས་རྒྱ་ནག་གི་གྲངས་ཉུང་མི་རིགས་ཤིང་ཅང་དང་བོད་མི་ཚོར་སྨྲ་བརྗོད་རང་དབང་དང་འདུ་འཛོམས་རང་དབང་སྤྲོད་དགོས་པའི་རེ་འདུན་འདོན་བཞིན་ཡོད་ཅེས་སོགས་འཁོད་ཡོད།
ཕྱོགས་མཚུངས་ཚོགས་ཆེན་དེའི་སྐབས་འཇིགས་ཉེན་མི་རིགས་སྲུང་སྐྱོབ་ཀྱི་ཚོགས་གཙོ་བོད་མི་བསྟན་འཛིན་བསམ་འཕེལ་སྐྱེ་ཏ་ལགས་ཀྱིས་བོད་ནང་ཕྱི་ལོ་ ༢༠༠༨ ལོར་ས་བྱི་ཞི་རྒོལ་ཆེན་མོའི་སྐབས་བོད་མི་མང་པོ་རྒྱ་མིའི་སྐོར་སྲུང་དམག་མིས་དྲག་གནོན་བྱས་ཏེ་ཚེ་སྲོག་ཤོར་ཡོད་སྐོར་དང་། བོད་ནང་ད་ལྟའི་ཆར་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་གནས་སྟངས་སྐོར་ཞིབ་ཕྲ་གསལ་བཤད་གནང་ཡོད། དེ་བཞིན་ཁོང་གིས་རྒྱ་ནག་གཞུང་ཕྱོགས་ནས་ད་ཆ་བོད་ནང་ཕྱི་མི་ནང་དང་ནང་མི་ཕྱིར་འགྲོ་མ་བཅུག་པར་བོད་ལ་ཕྱི་རྒྱལ་ཡུལ་སྐོར་སྤྲོ་འཆམ་འགྲོ་རྒྱུ་སོགས་ལ་དམ་བསྒྲགས་བྱེད་རྒྱུ་ཡིན་འདུག ཐེངས་འདིར་བོད་སྒོ་བརྒྱབ་པ་དེ་ཐེངས་གཉིས་པ་ཆགས་ཡོད་ཅེས་སོགས་ཀྱི་གསལ་བཤད་གནང་ཡོད་པ་མ་ཟད། ཁོང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དོན་ཚན་ ༣༥ ནང་སྨྲ་བརྗོད་དང་བསམ་ཚུལ། གསར་འགྱུར། འདུ་འཛོམས། ངོ་རྒོལ་བྱེད་རྒྱུའི་རང་དབང་སོགས་ཡོད་ནའང་དོན་དངོས་ལག་ལེན་ཐོག་རྒྱ་ནག་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་དང་གསར་འགོད་པ། དྲྭ་རྒྱ་བེད་སྤྱོད་བྱེད་མཁན་རྣམས་ལ་རྒྱལ་ཁབ་ཀྱི་བདེ་འཇགས་ལ་ཁ་གཡར་ཏེ་སུན་གཙེར་བཟོ་བཞིན་ཡོད།
དཔེར་ན་ཟླ་ ༦ ཚེས་ ༢ ཉིན་རྔ་པའི་འབྲིང་རིམ་མི་དམངས་ཁྲིམས་ཁང་ནས་རྒྱལ་ཁབ་ཁ་བྲལ་གྱི་ཉེས་མིང་འོག་ཤར་དུང་རི་ཞེས་པའི་དཔེ་དེབ་རྩོམ་པ་པོ་བཀྲིས་རབ་བརྟན་ལགས་སུ་ལོ་ ༤ ཁྲིམས་ཆད་བཏང་ཡོད། དེ་བཞིན་ཁྲིམས་ཁང་དེ་རང་ནས་ཕྱི་ལོ་ ༢༠༡༠ ཟླ་ ༡༢ ནང་རྒྱལ་ཁབ་ཁ་བྲལ་གྱི་ཉེས་མིང་འོག་བོད་མི་རྩོམ་པ་པོ་དོན་ཀོ་དང་བྷུ་དྷ་གཉིས་ལ་ལོ་ ༤ ཁྲིམས་ཆད་དང་། བོད་མི་སྐལ་བཟང་སྦྱིན་པ་ལ་ལོ་ ༣ ཁྲིམས་ཆད་བཏང་ཡོད། ཕྱོགས་མཚུངས་ཕྱི་ལོ་ ༢༠༠༨ ལོའི་ཟླ་ ༡༡ ནང་རྔ་པའི་བུད་མེད་རྩོམ་པ་པོ་ནོར་འཛིན་དབང་མོར་གནས་ཚུལ་ཁ་པར་ཐོག་གསང་བསྒྲགས་བྱས་པའི་ཉེས་མིང་འོག་ལོ་ ༥ ཁྲིམས་ཆད་བཏང་ཡོད་སྐོར་གྱི་གསལ་བཤད་གནང་ཡོད་པ་བཅས། །
