༢༠༡༡ ཟླ་ ༦ ཚེས་ ༡༧ རེས་གཟའ་པ་སངས།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༦ ཚེས་ ༡༦ ཉིན་འབྱོར་བའི་ཨ་མདོ་རྔ་པའི་གནས་ཚུལ་ཁག་ཅིག རྔ་པ་ཀིརྟི་དགོན་པའི་ནུབ་ཕྱོགས་གླིང་གི་ཕྱི་རོལ་ཏུ་ཡོད་པའི་སྲུང་མ་ཁང་ལ་ཉིན་བཅོ་ལྔ་རེའི་མཚམས་སུ་ལྷ་ཚེས་ཤིག་འཚོགས་རྒྱུ་ཡོད་པ་དེ་ཕྱི་ཚེས་ ༡༥ ཉིན་ཁེལ་ཡོད་ཅིང་། ཉིན་ཤས་གོང་གློ་བུར་དུ་ཚེས་ ༡༥ ཉིན་ལྷ་ཚེས་འཚོགས་དགོས་ལུགས་བརྗོད་ཡོད་པར་མ་ཟད། མི་མང་ལ་ཡང་ལྷ་ཚེས་འཚོགས་རྒྱུ་ཡིན་པས་མཇལ་དུ་ཡོང་ན་ཆོག་ཚུལ་གྱི་གནས་ཚུལ་གློ་བུར་བ་ཞིག་དངོས་ཤུགས་བརྒྱུད་གསུམ་ནས་སྤེལ་བཅུག་ནས་ཉིན་དེར་མི་མང་ཧ་ཅང་མང་པོ་འདུ་འཛོམས་བྱེད་བཅུག་ཡོད་མོད།
འོན་ཀྱང་ཉིན་དེའི་ཞོགས་ཀ་སྔ་པོ་ནས་སྲུང་མ་ཁང་གི་ཕེབས་ལམ་ཚང་མར་གློག་བརྙན་ལེན་བྱེད་ཀྱི་དཔར་ཆས་དང་སྤྱིར་བཏང་གི་དཔར་ཆས་མང་པོ་བཀལ་ནས་དགེ་འདུན་པ་རྣམས་ཕེབས་སྒུག་བྱས་པར་བརྟེན་དགུང་ལོ་ ༦༠ ། ༧༠ ཡིན་པའི་དགེ་འདུན་རྒན་པ་བཞི་བཅུ་ཙམ་ལས་ལྷ་ཚེས་སུ་ཕེབས་མི་འདུག་ལ། རྒྱ་གཞུང་གི་ལས་བྱེད་པ་སྐོར་ཞིག་གིས་གྲྭ་ཤག་མང་པོར་སོང་ནས་ལྷ་ཚེས་ལ་འགྲོ་དགོས་ལུགས་བརྗོད་ཡོད་ཀྱང་དགེ་འདུན་པ་རྣམས་ཀྱིས་དེ་རིང་ཚོགས་འཚོགས་བཅུག་པ་དེ་གཞུང་གིས་དྲིལ་བསྒྲགས་རྫུན་མའི་རྒྱབ་རྟེན་དུ་འཁྲབ་སྟོན་བྱས་པ་དང་འདྲ་བས་རྩ་བ་ནས་འགྲོ་མི་ཐུབ་ཚུལ་བརྗོད་དེ་ཕེབས་མེད། སྲུང་མ་ཁང་གི་ནང་དང་གཡས་གཡོན་དུ་དམག་ཆས་མ་གྱོན་པའི་དམག་མི་བརྒྱ་ཕྲག་ཙམ་བཀྲམས་སྟེ་མི་མང་གིས་བསང་བཏང་བ་བརྙན་དཔར་བླངས་ཡོད་པ་མཟད། མི་རེ་ཟུང་ལ་སྐད་ཆ་ཡང་དྲིས་འདུག དགེ་འདུན་པ་ཉུང་ཉུང་ཞིག་ལས་མ་ཕེབས་སྟབས་མི་མང་པོ་ཞིག་གིས་གསུམ་པའི་བཅུ་དྲུག་ནས་ད་བར་ཟླ་གསུམ་ཙམ་གྱི་རིང་དགེ་འདུན་པ་རྣམས་ལྷན་ཚོགས་གནང་བ་མཇལ་རྒྱུ་མ་བྱུང་ཚུལ་གླེང་ཞིང་མིག་མཐའ་མཆི་མས་བཀང་སྟེ་ཕྱིར་རང་རང་གི་ནང་དུ་ལོག་འདུག
ཕྱི་ཟླ་ ༦ ཚེས་ ༡༣ ཉིན་རྔ་པ་རྫོང་མཐའ་འགབ་མའི་རུ་ཆེན་དང་པོའི་འཕྲིན་པོ་ཚང་གི་བུ་བུ་མོ་གཉིས་རྒྱ་དམག་གིས་གཅར་རྡུང་དྲག་པོ་བཏང་ནས་རྫོང་སྨན་ཁང་དུ་ཉལ་དགོས་བྱུང་ཡོད། དེ་ཡང་འཕྲིན་ཁོ་ཚང་ལ་ཀིརྟི་དགོན་པའི་ཉེ་འདབས་ཀྱི་གཞུང་ལམ་བཞི་མདོ་རུ་མགྲོན་ཁང་བཞི་ཐོག་ཅན་ཞིག་ཡོད་པ་དེའི་ནང་དམག་མི་སྡོད་དགོས་ཚུལ་བརྗོད་པར་ནང་མི་རྣམས་ཀྱིས་ངོས་ལེན་རྩ་བ་ནས་མ་བྱས་སྟབས་བུ་བུ་མོ་གཉིས་ལ་གཅར་རྡུང་བཏང་བ་ཞིག་ཡིན་འདུག
དེ་བཞིན་ཕྱི་ལོ་ ༢༠༠༨ ལོར་ཡང་མགྲོན་ཁང་དུ་དམག་མི་སྡོད་དགོས་ཚུལ་བརྗོད་སྐབས་ངོས་ལེན་མ་བྱས་པར་བརྟེན་དཀའ་ངལ་མང་པོ་བཟོས་ཡོད། ལོ་དེར་རྔ་པའི་གྲོང་སྡེ་ཁག་གི་ལས་བྱེད་པ་རྣམས་༸གོང་ས་མཆོག་ལ་ངོ་རྒོལ་བྱེད་པའི་ཚོགས་འདུ་རུ་བསྡུས་ཤིང་། སྐབས་དེར་འཕྲིན་པོ་རུ་ཆེན་དང་པོའི་འགོ་བ་ཡིན་སྟབས་ངོ་རྒོལ་བྱེད་དགོས་མཁན་གྱི་གྲས་སུ་ཚུད་ཡོད་ནའང་ཁོས་རྩ་བ་ནས་དང་ལེན་མ་བྱས་སྟབས། རུ་ཆེན་དང་པོའི་འགོ་བ་ནས་གཏན་ཕུད་བྱས་ཡོད་འདུག ཡང་ཉིན་ཤས་གོང་ནས་དགོན་པའི་གླིང་གི་ཕྱི་རོལ་ཏུ་ཡོད་པའི་དམག་མི་རྣམས་སྡོད་སའི་གུར་ཕལ་ཆེ་བ་ཕབ་ཡོད་པར་མ་ཟད། ཤུལ་གཙང་མ་བཟོས་འདུག་པས། དགོན་པའི་ཕྱི་ནང་གི་བོད་མི་རྣམས་ཀྱི་མི་ཤེས་ས་ནས་ཕྱི་ལོག་གི་གསར་འགོད་པའམ། ཡང་ན་རྟོག་ཞིབ་ཚོགས་ཆུང་རེ་ཡོང་གི་ཡོད་པ་ཡིན་ནམ་སྙམ་ནས་མི་མང་གིས་གླེང་སློང་ཆེན་པོ་བྱེད་ཀྱིན་ཡོད་འདུག དམག་མི་རྣམས་སྔར་བཞིན་ཡོད་ཀྱང་ལམ་སེང་གང་ཞིག་ཏུ་ཡིབ་ཆོག་ཆོག་ལྟ་བུའི་ངང་ཡོད་པས། མི་མང་གིས་གལ་སྲིད་དེ་འདྲ་ཞིག་ཡོང་ན་རྒྱ་གཞུང་གི་མགོ་སྐོར་འོག་ཚུད་རྒྱུའི་ཉེན་ཁ་ཡོད་ཚུལ་གླེང་གི་ཡོད། དེ་སྔོན་ཕྱི་ཟླ་ ༤ ཚེས་ ༢༢ ཉིན་སྡེབ་གཅིག་ལ་དགེ་འདུན་པ་སུམ་བརྒྱ་ལྷག་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་པ་རྣམས་ཀྱི་ནང་ནས་ཡུལ་ཤུལ་དང་མགོ་ལོག་ཕྱོགས་ཀྱི་དགེ་འདུན་པ་རྣམས་གློད་བཀྲོལ་བྱས་ཏེ་ཕྱིར་རང་རང་གི་ཕ་ཡུལ་ལ་བསྐྱལ་འདུག་ཀྱང་། ད་ནས་བཟུང་ཕྱིར་ཀིརྟི་དགོན་པའི་ནང་རྩ་བ་ནས་འགྲོ་མི་ཆོག་ཚུལ་བརྗོད་ཡོད་པར་མ་ཟད། དགོན་པའི་ནང་ཡོད་པའི་བཅའ་དངོས་རྣམས་ཀྱང་གཞུང་གིས་ཚུར་བསྐྱལ་ཡོང་རྒྱུ་ལས་ཁྱེད་རང་ཚོ་ཕར་ལེན་དུ་འགྲོ་མི་ཆོག་ཚུལ་བརྗོད་ཡོད་འདུག སྐབས་དེར་འཛིན་བཟུང་བྱས་པའི་རྨ་ཆུ་རྫོང་དང་རེབ་གོང་སོགས་ས་གནས་གཞན་གྱི་དགེ་འདུན་པ་རྣམས་ཀྱི་གནས་ཚུལ་གསལ་པོ་ཤེས་རྟོགས་ཐུབ་མེད།
ཕྱི་ཟླ་ ༦ ཚེས་ ༡༢ རེས་གཟའ་ཉི་མའི་ཉིན་ནས་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་སྐབས་ཀྱི་ཚོགས་ཆུང་རེ་ནས་དགེ་འདུན་པ་གཉིས་རེ་དགོན་པའི་ཕྱི་རོལ་ཀྱི་ཁྲོམ་སོགས་ལ་མངགས་ཡོད་ཀྱང་གཟའ་ཟླ་བ་ནས་སྔར་བཞིན་དགོན་པའི་ནང་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་མུ་མཐུད་སྤེལ་བཞིན་ཡོད་པ་བཅས།།
