༢༠༡༡ ཟླ་ ༦ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༡༣ རེས་གཟའ་ཟླ་བའི་ཉིན་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡའི་གྲོང་ཁྱེར་མེལ་བྷོན་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་ཀེན་བྷེར་རར་ཆིབས་སྒྱུར་བསྐྱངས། དེ་ཡང་གྲོང་ཁྱེར་མེལ་བྷོན་དུ་ཉིན་གྲངས་གསུམ་རིང་བཀའ་ཆོས་སྩོལ་སྐབས་དད་ལྡན་མང་ཚོགས་གྲངས་ ༤༥༠༠ ཙམ་གྱིས་དངོས་སུ་བཀའ་ཆོས་ཞུ་བར་བཅར་ཡོད་པ་མ་ཟད། མགོན་པོ་གང་ཉིད་མཆོག་གི་བཀའ་ཆོས་དེ་བཞིན་ཐེངས་དང་པོར་ཨོ་སི་ཊོ་ལི་ཡའི་དྲྭ་རྒྱའི་ཐོག་ཐད་ཀར་རྒྱང་བསྲིང་ཞུས་ཏེ་མི་གྲངས་ ༣༢༠༠༠ ཙམ་གྱིས་བཀའ་ཆོས་ཞུས་ཐུབ་པ་བྱུང་ཡོད་པ་དང་། གཞན་ཡང་རེས་གཟའ་ཉི་མའི་ཉིན་༸གོང་ས་མཆོག་དང་བགྲོ་གླེང་གི་ལས་རིམ་དེར་མི་གྲངས་ ༦༠༠༠ ཙམ་གྱིས་མཉམ་ཞུགས་བྱས་པ་དང་ཕྱོགས་མཚུངས་སྐབས་དེར་མེལ་བྷོན་གྲོང་ཁྱེར་གྱི་མི་ཚོགས་འདུ་འཛོམས་བྱེད་ཡུལ་ལྟེ་བར་མི་གྲངས་ ༥༠༠༠ ཙམ་ལ་གྱང་རས་ཆེན་པོ་ཞིག་གི་སྟེང་བརྙན་འཕྲིན་བརྒྱུད་ཐད་ཀར་བསྟན་ཡོད།
དེ་ཡང་ཆོས་འབྲེལ་ཉིན་མཐའ་མའི་སྐབས་༸གོང་ས་མཆོག་གིས་བདེན་བཞི་དང་རྒྱུ་འབྲས་ཀྱི་རྣམ་གཞག རྟེན་འབྲེལ་བཅས་གཞི་རྩའི་ནང་པའི་ལྟ་གྲུབ་དང་འབྲེལ་ནས་བཀའ་ཆོས་མཛད། དེ་རྗེས་མགོན་པོ་གང་ཉིད་མཆོག་གིས་དད་ལྡན་ཆོས་ཞུ་བ་རྣམས་ལ་བྱང་ཆུབ་སེམས་དཔའི་སྡོམ་པ་འབོགས་ཆོག་མཛད། ཕྱོགས་མཚུངས་མགོན་པོ་གང་ཉིད་མཆོག་གིས་སྐབས་དེར་སྤྱོད་འཇུག་གི་བཀའ་ཆོས་འཕྲོས་ལེའུ་གཉིས་པ་སྡིག་པ་བཤགས་པའི་ལེའུ་དང་ལེའུ་གསུམ་པ་བྱང་ཆུབ་ཀྱི་སེམས་ཡོངས་སུ་བཟུང་བའི་ལེའུ། ལེའུ་དྲུག་པ་བཟོད་པའི་ལེའུ། ལེའུ་བདུན་པ་བརྩོན་འགྲུས་ཀྱི་ལེའུ། ལེའུ་བརྒྱད་པ་བསམ་གཏན་གྱི་ལེའུ་བཅས་ཀྱི་གོ་དོན་འགྲེལ་བརྗོད་མཛད་རྗེས་མང་ཚོགས་ཀྱི་དྲི་བར་བཀའ་ལན་མཛད་དེ་ཆོས་འབྲེལ་ལེགས་པར་གྲུབ།
དེ་རྗེས་༸གོང་ས་མཆོག་གིས་རྒྱ་སྐད་བརྙན་འཕྲིན་ (SBS Mandarine Service) ཞེས་པའི་གསར་འགོད་པས་ཆེད་དོན་དྲི་བར་བཀའ་ལན་མཛད་ཡོད་པ་དེ་གྲུབ་མཚམས། གྲོང་ཁྱེར་མེལ་བྷོན་ནས་མཁའ་ལམ་བརྒྱུད་ཨོ་སི་ཊོ་ལི་ཡའི་གྲོང་ཁྱེར་ཀེན་བྷེར་རར་ཆིབས་ཞལ་བསྒྱུར་ཏེ་གྲོང་ཁྱེར་དེར་༸ཞབས་སོར་འཁོད་སྐབས་རྒྱ་གར་གཞུང་ཚབ་ཁང་གི་སྐུ་ཚབ་བགྲེས་པ་ཞིག་དང་ས་གནས་བོད་མི་ ༧༠ ཙམ་གྱིས་ཕེབས་བསུ་གཟབ་རྒྱས་ཞུས་ཡོད། མགོན་པོ་གང་ཉིད་མཆོག་གིས་ཁུལ་དེར་ཨོ་སི་ཊོ་ལི་ཡའི་ཆབ་སྲིད་ཀྱི་མཐོ་རིམ་དཔོན་རིགས་ཁག་གཅིག་དང་ཆབ་སྲིད་ཚོགས་པ་ཆེ་གྲས་ཚང་མའི་གྲོས་ཚོགས་འཐུས་མི་རྣམས་དང་མཇལ་འཕྲད་མཛད་རྒྱུ་མ་ཟད། ཁོང་རྣམ་པས་༸གོང་ས་མཆོག་ལ་ཨོ་སི་ཊོ་ལི་ཡའི་གྲོས་ཚོགས་སུ་གདན་ཞུ་གནང་སྟེ་དམིགས་བསལ་ཆེ་མཐོང་ཞུ་རྒྱུ་ཡིན་འདུག་པ་བཅས།།
