༢༠༡༡ ཟླ་ ༦ ཚེས་ ༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༥ ཉིན་རྡ་ས་གངས་སྐྱིད་གསོལ་ཐབ་ཡང་སྟེང་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གིས་གོ་སྒྲིག་ཐོག་མཐོ་རིམ་སློབ་གཉེར་བ་རྣམས་ལ་དེང་གི་ན་གཞོན་དང་མ་འོངས་པའི་འགོ་ཁྲིད་ཅེས་པའི་ཟབ་སྦྱོང་ཐེངས་བཅུ་པ་འགོ་འཛུགས་གནང་ཡོད།
དེ་ཉིན་སྔ་དྲོ་ ༩།༣༠ ཐོག་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་རྒྱུན་གཏན་གྱི་ལས་དོན་དང་ཟབ་སྦྱོང་གི་ལས་འཆར་ངོ་སྤྲོད་གནང་རྗེས་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་དབུ་འབྱེད་ལམ་སྟོན་གསུང་བཤད་གནང་ཡོད། དེ་ནས་རིམ་བཞིན་ཉིན་དགུའི་རིང་མང་གཙོའི་ཀ་བ་གསུམ་གྱི་སྤྱི་ཚོགས་ལ་དགེ་ཕན་ཇི་བྱུང་དང། མང་གཙོའི་ནང་རང་དབང་ཅན་གྱི་སྡེ་ཚན་ཕན་རླབས་དང་དགོས་གལ། སོ་སོའི་དམིགས་ཡུལ་དང་མཚུངས་པའི་བོད་མིའི་སྤྱི་ཚོགས་ནང་འགན་འཁུར་བཞེས་ཕྱོགས། རྒྱ་གཞུང་དང་དམར་ཤོག་ཚོགས་པའི་སྒྲོམ་གཞི་དང་བོད་དང་ཐད་ཀར་འབྲེལ་ཡོད་སྡེ་ཚན་གྱི་ངོ་སྤྲོད། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་རྒྱ་གཞུང་ནས་ཆབ་སྲིད་བཙོན་པ་རྣམས་ལ་མནར་གཅོད་གཏོང་ཚུལ། བོད་ཀྱི་རྒྱ་རབས་དང་། རྒྱལ་སྤྱི་དང་བོད་ཀྱི་ཁོར་ཡུག་གནས་སྟངས། དྲ་རྒྱའི་ཐོག་རྒྱ་གཞུང་གིས་ཧམ་བཤད་དྲིལ་བསྒྲགས་བྱེད་ཚུལ། ཆོས་བརྒྱུད་ཁག་གི་བྱུང་རབས་དང་ནང་ཆོས་ཉམས་ལེན་གནང་ཕྱོགས། གཞུང་འབྲེལ་མིན་པའི་ཚོགས་པ་ཁག་གི་རྩ་དོན་ཐོག་འགན་ཁུར་གནང་ཕྱོགས། དེ་བཞིན་བཀའ་ཁྲི་ཟམ་གདོང་རིན་པོ་མཆོག་གིས་སྤྱི་ཚོགས་ཀྱི་འཕེལ་རྒྱས་དང་ཤེས་ཡོན་ལམ་སྟོན་ཐོག་གསུང་བཤད་གནང་རྒྱུ་བཅས་གནད་ཡོད་མི་སྣ་ཉི་ཤུ་བརྒལ་བས་བརྗོད་གཞི་སྣ་ཚོགས་ཐོག་གསུང་བཤད་དང་དྲི་བ་དྲིས་ལན་གནང་རྒྱུ་ཡིན་འདུག་པ་རྣམས་ཡོངས་སུ་གྲུབ་རྗེས་ཟབ་སྦྱོང་བ་རྣམས་ནས་དབུས་བོད་མིའི་སྒྲིག་འཛུགས་ཀྱི་ལས་ཁུངས་ཁག་ལ་སྐོར་བསྐྱོད་སོགས་གནང་རྒྱུ་ཡིན་འདུག ཐེངས་འདིའི་ཟབ་སྦྱོང་ནང་ས་གནས་ཁག་བཅུ་ནས་བོད་པའི་མཐོ་རིམ་སློབ་གཉེར་བ་ཁྱོན་སློབ་ཕྲུག་གྲངས་ ༦༠ ནས་མཉམ་ཞུགས་གནང་ཡོད་པ་བཅས། །
