ཕྱི་ལོ་ ༢༠༢༠ ཟླ་ ༡ ཚེས་ ༡༧ རེས་གཟའ་པ་སངས། 

༄༅། །རྒྱ་གར་ལྷོ་ཕྱོགས་སུ་རྟེན་གཞི་བྱས་པའོ་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ལྷག་པ་ཚེ་རིང་ལགས་ཀྱིས་གཙོས་གཞིས་ཆགས་ཀྱི་སྤྱི་མི་དང་སོ་ནམ་སློབ་སྟོན་པ་Prakash ལགས་སོགས་ཕྱི་ལོ་ ༢༠༢༠ ཟླ་ ༡ ཚེས་ ༡༤ རེས་གཟའ་མིག་དམར་ཌར་ཝཌ་རྫོང་དུ་ཡོད་པའི་ས་ཞིང་འདེབས་ལས་ཀྱི་མཐོ་སློབ་ཏུ་སོ་ནམ་དང་འབྲེལ་བའི་ལས་གཞིར་རྟོག་ཞིབ་སླད་ཕེབས་འདུག 

སྐབས་དེར་ཐོག་མར་ཁོང་རྣམ་པས་གཞིས་ཆགས་ཀྱི་ས་བབས་གནས་སྟངས་དང་ས་ཞིང་འདེབས་འཛུགས་ཀྱི་འགྲོ་སྟངས་བཅས་ཀྱི་སྐོར་སྙན་སེང་ཞུས་རྗེས་མཐོ་སློབ་ཀྱི་འབྲེལ་ཡོད་སློབ་དཔོན་དང་ལྷན་དུ་སོ་ནམ་འདེབས་ལས་ཐོག་བསམ་ཚུལ་བརྗེ་ལེན་གནང་ཡོད་པ་མ་ཟད། ཕྱོགས་མཚུངས་མཐོ་སློབ་ནས་ཕན་ཚུན་འབྲེལ་ལམ་དང་མཐུན་འགྱུར་གནང་རྒྱུའི་ཁས་ལེན་གནང་འདུག

དེ་ནས་ས་གནས་འགོ་འཛིན་ལྷག་པ་ཚེ་རིང་ལགས་ཀྱིས་མཐོ་སློབ་ཀྱི་རིགས་བདག་སྐུ་ཞབས་ M.B.Chetti ལགས་སུ་དྲན་རྟེན་མཚོན་བྱེད་ཁ་བཏགས་དང་སྐུ་ཐང་ཕུལ་ཡོད་པ་བཅས། །