ཕྱི་ལོ་ ༢༠༢༠ ཟླ་ ༡ ཚེས་ ༤ རེས་གཟའ་སྤེན་པ། 

༄༅། །འཛམ་གླིང་ཞི་བདེའི་དེད་དཔོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་ཞུ་བར་བཅར་མཁན་ཕྱི་རྒྱལ་ཡུལ་གྲུ་ཁག་ ༦༩ ཙམ་ནས་ཕེབས་པའི་དད་ལྡན་ཆོས་ཞུ་བ་ ༣༠༠༠༠ ལྷག་ལ་དམིགས་ཏེ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གནས་མཆོག་རྡོ་རྗེ་གདན་དུ་ཕྱི་ལོ་ ༢༠༢༠ ཟླ་ ༡ ཚེས་ ༢ ནས་རིན་མེད་སྨན་སྒར་འགོ་འཛུགས་གནང་སྟེ་སྨན་བཅོས་ཀྱི་ཞབས་ཞུ་སྒྲུབ་མུས་ཡིན་འདུག

སྨན་པ་བསྟེན་གཏུགས་དང་སྨན་སྦྱིན། རྨས་མར་རྨ་དཀྲིས་སོགས་ཀྱི་མཐུན་འགྱུར་གནང་བཞིན་ཡོད་འདུག སྨན་སྒར་དུ་འཕྲོད་ལས་ཞབས་ཞུ་བ་ལས་བྱེད་གསུམ་དང་། འཕྲོད་བསྟེན་ཁྱབ་ཁྱོངས་ས་གནས་ལྔ་ནས་འབྲེལ་ཡོད་ལས་བྱེད་དགུ་བཅས་ཕེབས་ཡོད།

འཕྲོད་བསྟེན་རིན་མེད་སྨན་སྒར་མཐུན་འགྱུར་རོགས་རམ་གནང་མཁན་ཏཱ་ལའི་བླ་མ་དགེ་རྩ་ཚོགས་པ་ His Holiness the Dalai Lama Charitable Trust ཡིན་འདུག་པ་དང་། རིན་མེད་སྨན་སྒར་དེས་ཕྱི་ལོ་ ༢༠༢༠ ཟླ་ ༡ ཚེས་ ༦ བར་སྨན་བཅོས་ཀྱི་ཞབས་ཞུ་བསྒྲུབ་རྒྱུ་ཡིན་པ་བཅས། །